OBADIYA 1 - DVRWQ PVVB

¹ ‍Obadiyag nyiqry kaanamv. soq sib Pwnbo At Sw Idomg pagoqkam bedo: Ngulv At Sw hoqgv pui ak tapa tukun, hoo nyob nyi tulug pengko lo pui baqn boam kanam pakun: “Gorabto! Kuj ngulv mwnwn ceebio baql nyob patab daqrab nuj!”

Idom mam Yan dvb Mvtayin

² Kaato, nyob nyi tulug pengko lo nulam ngo anyo dvb mvtayin; nulam vc-loodab haqpaq tayin.

³ Nulug hang larnamv nulam xaalyo lyopaq paku, hiyv nulv bwdwg wlw niqtuq aoho doon bov, nulug ao jaqb dookho doodu bov, nulug hang lo bedwn, “Hiyv ngam bwdw dwwdum hoqgv dwwkob mvgeq nyotayin?”

⁴ Nulv xookam jaanam hvb aob jaas jaqkam, nulug osupam takar pengko tol mvsjaqkam, toloqkv nulam ngo akob mvgeq lotayin, At Sw bibwqdo.

⁵ Dvco bo tulungv nulug dookub haab nyiloqkam, naalil naareqbo tulungv aiyam haab nyiloqkam— hoggub nulam twrk konum!— bulv at aro gab naleq dvb dvco coram yv? Roo aaxy nookum bov nulug dookub haab nyiloqkam, bulv pumab apaq tan yv?

⁶ Hoggub Esunvn dvco coreq konum, mwwg gumnam meelinum!

⁷ Nulam svka bo mwlwngv nulam nulug vrrko ho ruqlin paku; hiyv nulug lvgab swrsongv hvnbov nulam xaalyo lyopaq paku; bulv nulam nyitub-nyic dvb ceeko pakun; hiyv nulug wtwngam dvnbov nulug niikumho pwd-poto ak mvp paku- ham nulv cengpa kuma.

⁸ At Sw bibwqdo, hoq aalam ngo, Idomg mwwlaqbo nyiilungam hoo Esug puutu hoq cenglaq boam twrm ram yv?

⁹ Hoo nulug atorbo nyiilungv mwwdwq dwqtayin, Tamina, hoggab Esug puutu hoqg nyi vxiam mengn bov mengpaq tayin.

Idomv Kwr-Korwl Jakubnvn Ceekonam

¹⁰ Nulug bor Jakubnvn kwr-korb nyigam gab, nulam hvnywngv pulup tayin, hoo nam nwrba gob mvpaq tayin.

¹¹ Hoq aalho nulv aadob daqginnum, hoq aalho mwwg gumnam nyi kooxnam tulungv baql wgnum hoo nyoodo nyiilungv mwwg toggoq tuluho haanum hoo Jerusalem gab tak kaanam, nulv bulug akgon hvb nyinum.

¹² Hvbmabde nulug vbw-borwg aalam larma bv mwwg haqmapaqb almab nyid aalam; Juda nyi tulug aoho hwnyir-hvmar maabv bulug yuupaq de aalam; larma bv bulug vs-axaq aalam.

¹³ Bulug dwr-kano aalam ngoq nyiilug toggoqb haamabv; mwwg ciqcaq-bviyaq aalam ho mwwg dwr-kano aoho larma bv; mwwg dwr-kano aalam mwwg gumnam naareq maabv.

¹⁴ Mwwg kek lamta toobwq mwlw ho doqtum maabv; mwwg mengonam tulungam vs-axaq aalam jipaq maabv.

At Swg Aalv Hvvnwqnam

¹⁵ Hoggab nyob nyi tulug ao lo At Swg aalv hvvnwqnam. Nulv hoggub nyipa kun, hoq hvbkalam nulam nyitayin; nulug bon nyinam mwlwngv nulug atwg dumpo aoho hookur tayin.

¹⁶ Hoggub nulv ngoqg dvrwqbo puutu lo twwxum pakun, hvbkalam nyob nyi mwlwngv twwdul dootayin; bulv twwl hoo meqtayin, hoo bulug nywywngam mwwmiq maanam mam nyitayin.

¹⁷ Hvbmabde hiyv kelinbov hv Jaiyon puutu lo dootayin, hoo hoqhv dvrwq tayin, hoo Jakubg imiqkv bulug at gumnam doog tayin.

¹⁸ Jakubg namlo wmmwb nyitayin, hoo Josapg namlo wm moilib nyitayin, hoo Esug namlongv nomtu tayin; bulv bulam gutayin hoo guiyum tayin, hoo Esug namlo hoqgv akkam mengo dooram, hoggab At Sw goopa kun.

At Swg Lvpw-haty

¹⁹ Negeb hoq nyiilungv Esu puutungam doog tayin, hoo Sepela nyiilungv Palistan gvdangam doog tayin; bulv Iprayim gvdangam la Samariya gvdangam doog tayin, hoo Benjamin Gileadam doog tayin.

²⁰ Nyuum boonam Israel nyiilungv Kanaan nyi tulu hoqgv naalayil Jarepat gvda namgub doog tayin, hoo hiyam Jerusalem hoqgv nyuum bool Separad ho doon bov Negeb bopam mwlwngam doog tayin.

²¹ Ywwlin bo tulungv Jaiyon puutub caatayin Esug puutungam pvvb bwwl doog taab, hoo At Swg Lvpw haty dootayin.