MAIKA 1 - DVRWQ PVVB

¹ Jotam, Ahaj, hoo Hejekiya, Judag lvpw atwb swwl dooi yik moodho Moresetwg Maikanvn At Swg gomcwrv haanum, ho mwv Samariya la Jerusalem pagoqkam kaapanum.

Twryum Deenamv Hoodunam

² Tagabto, nyiilu nulv, nul nyi mwlwngv; swcwngv, hoo hoq uraho doonbo mwlwngv ruucw kwrgabto, hoo At Sw mwwg dvrwqbo namlo hoqgv, Pwnbo At Sw nulam ceekol hvvky swwnka.

³ Hoggab kaato, At Sw mwwg dook hoqgv lvvgwb lingdu do, hoo ipoq layil swcwg aobo nyook mwlwho wtayin.

⁴ Hoo puutu tulungv mwwg uraho jiqtayin, hoo lywpa tulungv tvqnyi gob taqc tayin, takinv wm agaho jiqnam hvb, issiv bwdw hoqgv toolnam hvb.

⁵ Soq mwlw si Jakubg nyixaq ko-gab hoo Israelwg dvparv nyic nyigam gab. Jakubg nyixaqnamv hoggv? Soq si Samariya hvvma yv? Hoo Judag nyook aongv hoggv? Soq si Jerusalem hvvma yv?

⁶ Hoqgab ngo Samariyangam mwlwg kaagaho hwwpum paal apnam hvb mvtayin, roo liik nyook gob mvtayin, hoo ngo mwnwg wlw tulungam lywpab ngurl tayin hoo mwnwg gwwl tulungam diibin tayin.

⁷ Mwnwg guss mvnam mwlwngam vmwq yumgub mvtayin, mwnwg nyijo mwlwngam wm lvgab partayin hoo mwnwg murty tulungam ngo xima dvb mvtayin, hoggab mwn nyimwl nyijonam hoqgv twngkam nookum tayin, hoo nyimwl nyijonam twngk nookumnam hoqgv bulv jikur tayin.

⁸ Hoggab sam ngo nyix-riil hoo sigin gintayin; ngo talo dvb twqbin kotwl wtayin; ngo Jekel sogoqnam hvb sogoq tayin, Ostric pvta tulug ringnam hvb ringtayin.

⁹ Hoggab mwnwg unv mwp lama, hoo hoqhv Juda lo haapa ku; hoqhv ngoqg nyiilug toggoq namgub Jerusalem lo hvvc paku.

¹⁰ Ham Gat lo betam maabv; vcwr gokam xamabv; Bet-le-apra ho nulv atv diimwr ho giqbur-geqnyi to.

¹¹ Sappir ho doonbo mwlwngv, talol hvnyw tvl, nulug lamtab wto; Jaananwg doonbo mwlwngv lvvgwb leng maabv; Bet-ejilwg nyix-riinamv nulug dvqgw nyookam aadob naapaq tayin.

¹² Hoggab Marotwg doonbo mwlwngv hwrcw jaqb albo gab kaaya to, hoggab At Swg hoqgv Jerusalemwg toggoq namgub ciqcaq-bviyaqkv haapa ku.

¹³ Lakiswg doonbo mwlwngv, ceriot svpur tulungam mvtur to; hoqhv Jaiyon nyem ko tulug nyic nyirab kov, hoggab Israelwg nyixaqnam tulungam nulug uraho kaapanum.

¹⁴ Hoggab nulv Moretset-gatam mvpinam akiam jitayin; Akjib dvpar tulungv Israelwg lvpw at tulungam xaalyo lyopaq tayin.

¹⁵ Maresag doonbo mwlwngam, ngo lokta mwlwngam mviya booloq ak nulam boa jitayin; Israelwg yuunamv Adullam ho haatayin.

¹⁶ Hoggab nulug ko tulu hemp gab, nulv atv-atv tuqxo loolto hoo nulug dummam reqpaq to; nulv atv-atv xookam tvb tuqxo dvb mvto, hoggab bulv noqg hoqgv nyumwb wtayin.