LUKE 1 - DVRWQ PVVB

Ngoqg Tumanam Tiyopilas

¹ Vijaqg pota Xeqn bo nyi tulungv ngulug swwca so agam yal mwlwngam xeqpwl ap gvnkun.

² Ngulam hog hvla xeq otuqjaq hoqgv Tugu Puiyam tagab kaagab pel bulug gvk hvl gaqnyia bo hvvky nyi tulug bekinam bvrwqkam bulv xeqpnum.

³ Hoqgab bir ab otuqjaq hoqgv ngo soq bvrwq mwlw sam xwxwjaqb poorynum. Xwxwjaqb poory cootwl noqgab soq sam puqtu pvbw anyab xeqpwl ap nyiloqkam al kimpa hvl ngo mwwnum.

⁴ Nam hog hvla xeq ngo mwwnum ham tomswrnum hoq puqtu mwlwngam nam cengm tvs mwwnv ngo sam xeqg yin.

Jon Baptistnvn Dwrbuqdynam mam Ao Gumtwngv Pui Bekinam

⁵ Juhudi gvdaho Herod lvpw atwb swwca dvkho Jakariya ngvk hvl Abijayag hoolu hoqgv nyub ak doonum. Mwwg nywxw hoq eminv Elijabet soq nyem aksi Aaron gv ko hosiqkv.

⁶ Soq nywxw nyol vnyi si Pwnbog kaagaho nyidjaqb hoo At Swg pvvb tulu ngamla gamlam tulungam tvjwl swwba sunum,

⁷ Hvbmabde bunyiv ko doomanum, hoggab Elijabet twrngumnum, hoo bunyiv xox- nyekam kunum.

⁸ Aal golo mwwg bon nyicw moodam Jakariya Pwnbog kaagaho nyub gob nyinv bon nyidul doonum.

⁹ Nyub hvdwg nyicw-mwcwjaqb mwam Xumk nam ura jaqb haal sulum mwwmdvb xuqlinum. Hoqgab mwv At Swg nammwb haanum.

¹⁰ Uraho mwv sulum mwwduyin, nyi tulungv agaho xuml doonum.

¹¹ Ho At Swg ao gumtw ak mwwg dookub haanv sulum mwwduko dootam lvqbwq daiyaho doqdunum.

¹² Mwam kaapa tvl mwv hog looma twqb nyil bos sonum.

¹³ Hvbmabde ao gumtw akv mwam benum, “Jakariya no bos maabv, Pwnbov noqg swgwnam mam loorwq paku, hoo noqg nywxw Elijabet noqg gab ko ak dootayin. Mwam no Jon hvl emin mindwb nyitayin.

¹⁴ Ho no hemp bvla mwwngam tayin hoqgv mwam ko bwwikam nyiv vigo hemp potayin.

¹⁵ At Swg kaagaho nyiv yuukum dvb swwtayin. Mwv opo twwdwb nyiram. Mwam dwr buqlin twqda kalam mwwg lvgab dvrwqbo yalv dooba tayin,

¹⁶ hoo mwv Israel nyiilungam naleqgo bulug Pwnbo At Sw dookub bookur jitayin.

¹⁷ Mwv nyiqry kaal swwnbo Ilijag hvbkalam hvvjw pwtwl At Swg otuq-otuqb wcol ab tulungam bulug koam aby bominsul bugil swwma bo nyi tulungam nyedarbo nyi tulug mwwlaq-saqpaqngam tal bugil swwm dvb, At Sw gab hang baqxaml doonbo nyi tulungam mwx-mvaql dootwk hvl tomswr tayin.

¹⁸ Jakariya ao gumtwngam toxnum, “Hvbnyiloqkam ngo sam hoggub nyil cengtayin? Ngo nyekam kunbo nyi akwb nyiadvn hoqgv ngoqg nywxw ngvkam xox yaadkun?

¹⁹ “Ngo lak Gabriel hvl ao gumtw akv birwqnum, “Soq tugu pui sam bekin taak hvl kanambo Pwnbo kaagaho ngo doodwn.

²⁰ Hoo kaato, hwdlo soq pagoq tulu si nyima deedib, no agam gookmab cooikab dootayin, hoggab no ngoqg gomcwr tulungam mwwjw ma, hogloqhv mood xikjaqb niqtuq nyilin tanam mam.”

²¹ Hoqho nyi tulungv Jakariyanvn kaaya yoodul agaho doonum. Xumk nam uraho hvkam bvxeq oyul doon kun hvnv nyi tulungv mwam mwwmo sosonum.

²² Kokw so mwv bviywrb lengyi kukam, mwv bulam hog goorwq nyok maanum, ho xumk nam uraho hognvk nyiqry go mwv kaas peeknago bulv mwwnum. Agam goolin kumanum, mwv bulam mwwg alaq lvgab nyik-nyimaql kaakinum.

²³ Xumk nam uraho mwwg bonam nyiyum yukam, mwv nammwb wkur kunum,

²⁴ Soq kokw so mwwg nywxw Elijabet ko gvrab kunv pool barng xaqgub hogloq bvkam caalin caa maab namho looxiam dooknum.

²⁵ “Kokw so At Sw ngam svkanum,” Mwn benum, “Mwv nyi rolu lo ngoqg hvnyw-haram naaxa gvnkun!”

Jisun Dwrbuqdynam mam Ao Gumtwngv Pui Bekinam

²⁶ Kokw so Elijabet ko gvnamv pool barx gob nyidwkho Pwnbov ao gumtw Gabrielnvn Galili gvdaho doonbo Najaret nampamb kanamnum,

²⁷ Debidg ko hosiq Josap gabwk hvl begaql apnam nyem nyijwr ak gab mwv pui bilwqnum, hoq nyem nyijwr hoqg eminv Meeri

²⁸ Ao gumtwngv haabnv mwnwn benum, “Swrsomalongv noqgab kula! At Sw noqg lvgab doobal hindjaqb lvqc cig nukun!”

²⁹ Ao gumtwg puiyam tatwl hog looma twqb nyinv soq pui sam hognvk pagoq gab begyin mwn ham mwwdwqnum,

³⁰ Hoo ao gumtwngv mwnwn benum, “Meeri bos maabv, hoggab Pwnbov nam mwwsw pakun.

³¹ No ko gvl ko ak bwwtayin hoo mwam no Jisu hvl emin mindwb nyitayin.

³² Mwv nyi nyiit radwb swwikukam, mwam mwlw jaqkam koi yaanbo Pwnbog Kov hvl bedwb nyin nvpv. Mwwg at Debid hvbkalam, Pwnbov At Sw mwam Lvpw atwb mvtayin

³³ Nwrba xaqb mwv Jakub ko hosig Lvpw at akwb nyin nvpv hoo mwwg lvpwngv nywywngam nyitwr dooram.”

³⁴ Meeri ao gumtw akam benum. “Ngo mvvngam mvlak, hoggub yu soq si nyitayin?”

³⁵ Ao gumtwngv birwqnum, “Dvrwqbo yalv noqg aoho ipoqtayin hoqgv Pwnbog atorv noqg aoho dootayin. Hoqgab dvrwqbo ko bwwtanam ham Pwnbog Ko Tuupv hvl goqtayin

³⁶ Noqg lwkw Elijabetnvn mwwpa to. Nyi tulungv mwnwn ko dookramwk hvl benum, hvbmabde xox xuguq kujaqkam, sija mwnwg ko gvnamv pool barx yukun.

³⁷ Hoggab Pwnbog nyiny maanam hog bon luugkam dooma dvn.”

³⁸ Meeri birwqnum, “Kaato, ngo Atwg paqnv, noqg bekwb sam ngoqg lvgab nyika mvsv” Ho Ao gumtw akv mwnwg ogum hoqgv wleq kunum.

Meeri Elijabetnvn Kaatab Wnum

³⁹ Oyu maadab Meeri rudw rvqxwl mwx-mvaq layil Judiya gvdag yorn aoho doonbo bopam golo wnum.

⁴⁰ Mwn Jakariya nammwb haabnv Elijabetnvn alpa hvl benum.

⁴¹ Elijabet Meerig alpa hvl benam mam tapayin, Elijabetwg aiyeq uraho ko hv pojuqnum.

⁴² Dvrwqbo yalv mwnwg lvgab doomin gvgam gab Elijabet vc alwb benum, Nyem tulug pengko lo no moloq xinam jaqkv!

⁴³ Hvbmabde hog gabyu ngoqg At Swg ann akv ngam kaatab haadwn.

⁴⁴ Hoggab kaato, noqg alpa hvl benam yalv ngoqg nyuru lo hvvtwqkalam, ngoqg nvmmam nvplo ko doon bov hemp poknv pojuqnum.

⁴⁵ At Sw hog hvla xeq nam dingnum ham mwwjw jwwgam gab no hog hwdgo hemp dvn!

Pwnboam Paql Meerig Bemin Benam

⁴⁶ Meeri benum, “Ngoqg hangv At Swn paqdwn;

⁴⁷ Ngam ywwt ywwnbo Pwnbo gab ngoqg yalv hemp dvn,

⁴⁸ hoggab ngoqg svk mwwg paqnam aya kaapa dvb nyin boam mwv mwwpa pakun! Hoggab kaato, sija galoqkv hotam tomxig nyi mwlwngv ngam xinam jaqkv hvl betayin,

⁴⁹ ngoqgab atorbo Pwnbov xitorbo bonam nyij pakun. Mwwg eminv dvrwqdvn;

⁵⁰ Mwam bosbo nyi tulungam hotam-hotam gob mwv aya mwwpanam mam kaakin dvn,

⁵¹ Mwv mwwg alaq laqtorbo bon nyinam mam kaakin dvn hoo atv atam hanglo xitor gob mwwnbo nyi tulungam mwv cwrsaq-bvraq twqb mvgnukun.

⁵² Mwv koibo lvpw at tulungam bulug pwqlw hoqgv mvgeq pakun, hoo yanbo tulungam koiyib swwmnum,

⁵³ Kano bo nyi tulungam xumdwb mwv albo dvs pootam jinum, hoqgv nyetbo nyi tulungam alaq asarwb wwm gvdkun,

⁵⁴ Ngulug ab apa tulungam dingrwl ap jinam mam pvvj pakun, hoo mwwg nyera Israelam svka taab haapa kun.

⁵⁵ Abraham nvla mwwg ko hosiq tulungam nwrba gob aya mwwpanam mam mwv kaakin pakun!”

⁵⁶ Meeri Elijabetwg lvgab pool borumgo dooba peekul nammwb wkur kunum.

Jon Baptistnvn Ko Bwwnam

⁵⁷ Kokw so Elijabetwg ko bwwd moodv haaikukam mwn ko nyega ak bwwknum.

⁵⁸ Ho mwnwg gutu-gora ngvla at nyi tulungv mwnwn At Sw hog hwdgo albo swrdorxeqkam mwnwn anya kunam mam, hoo bul mwlwngv mwnwg lvgab hemp poknum.

⁵⁹ Aal piin deenso bulv ko nyega akam muxul Jakariya hvl emin mindwb mwwnum,

⁶⁰ Hvbmabde mwwg annv benum, “Hvbma, mwam Jon hvl goqtayin.”

⁶¹ Ho bulv mwnwn benum, “Hvbmabde noqg nyob pengko lo hoqhvk emin mingnam nyi akkam dooma dvn lak.”

⁶² Kokw so ko akam hognvk emin jaqb mimb nyiloqkam altayin hvl bulv ab akam nyiyw nyima nyinv toxnum.

⁶³ Ho Jakariya xeqnam taqg konv “Mwwg eminv Jonnv hvl xeqnum” ho bulv lomnum!

⁶⁴ Ho dara Jakariya lokta agam goolin kunum, hoo mwv Pwnboam paqrab kunum.

⁶⁵ Ho gutu-gorag nyi mwlwngv bos sonyianum, hoqgv Judiya diisw gvda tvqpwho soq benam-nyinam pui si wiyiq kunum.

⁶⁶ Soq pagoq sam tapa bo mwlwngv hoqham mwwkanum hoo toxnum, “Soq ko aksi kokwngam hogbvxeq nyidy bov yu.” Hoggab At Swg atorv mwwg lvgab dooba yvbanyi hvl mwlwngv cengnum.

Jakariyag Nyiqry Benam

⁶⁷ Dvrwqbo yalv mwwg ab Jakariyag lvgab doomin gvgam gab mwv nyiqry benam mam bekinnum:

⁶⁸ “Kuj ngulv Israelwg Pwnbo At Swn paqtuj! Mwv mwwg nyi tulungam svka taab haabnv bulam meelin kunum.

⁶⁹ Ngulam atorjaqb ywwt ywwd bo nyi akv mwv mwwg nyera Debidg ko hosiq ak jipa kun.

⁷⁰ Kol otuqjaq hoqgv mwv sam mwwg dvrwqbo nyiqry benbo tulungam beol apnum.

⁷¹ Mwv ngulam ngulug ceebio baqnbo hoqgv la ngulam oyum yumnbo nyi tulug alaq hoqgv ywwt ywwtayin.

⁷² Mwv ngulug at ab tulungam anya tainvk hvl mwwg dvrwq aldvb goorminsnam mam mwwgabl daqtor tainvk hvl benum.

^73-74 Ngulug ab apa Abrahamnvn piwr jwr-jwr dvb dingrwl mwv ngulam ceebio baqnbo nyi tulug alaq hoqgv vcwr gokam bos somab ngulug swwnam xaqb mwwg gab bon nyim dvn.

⁷⁵ Mwwg kaagalo ngulv dvrwq bvla jvqtw ngulug swwnam bumpw ho doodwn.

⁷⁶ Ngoqg ko nam mwlw jaqkv koi yaanbo Pwnbog nyiqry kaanbo hvl betayin. No Atwg wma daab otuqb wcol lamtangam mwwg gab mwx-mvaqta,

⁷⁷ bulug nyic nyiangam ywwt ywwta yinwk hvl mwwg nyi tulungam bekin mvdwb.

⁷⁸ Hoggab ngulug Pwnbov aya mwwpal hoo hang biidwn. Mwv ngulug aoso nyedar tanam hutongam huurab mvtayin

⁷⁹ hoo sig doonyium kan urab doonbo nyi tulug aolo ao gvda toloqkv huul dvb jitayin, ho mwv ngulug lvpiangam swrsomalo lamtab bool wgtayin.”

⁸⁰ Kokw so hoq ko akv koi kunv yalv la gv ngv hwngkw alwb swwrabnum. Mwv Israel nyi tulug rolu agaho mwx-mvaql lengnam aal xaqb deexa-raraho doonum.