LIBITIKAS 1 - DVRWQ PVVB

Boyuqnam Aky Jinam Tulug Pvvb

¹ At Sw Mojesnvn goqnum hoo kvvrwq minsko tombu hoqgv mwam agam goonv, begamv,

² “Israel nyiilungam agam goog dvl hoo bulam beto, hwdlo nulug pengko hoqgv akgon jaqkam, At Sw gab aky jiyikam, svv loqla sviya loq dorg-dorgwb nulug tuun-mee akiam jidwb nyitayin.

³ “Mwwg svv aky jinam hv boyuqnam aky goloqkam, mwv un-tar gvma bo hvvb loq dorg jidwb nyitayin. Mwv kvvrwq minsko tombug haagaho ham booa tayin, ho mwam At Sw agaho loorwq kodwb.

⁴ ‍Mwwg alaqkv boyuqnam aky jinam svv dumpo ho mwv idaq jitayin, hoo nyic kwly gab pwr ham mwwgab loorwq tayin.

⁵ ‍Ho mwv At Swg agaho hvvb ham patab tayin, hoo Aaron gv ko tuup tulungv nyubv uiyam bwa layil kvvrwq minsko tombu haagag yugw bviywrho pwqyaq tayin.

⁶ ‍Ho mwv boyuqnam aky ham patabl hoo vmwqb twqmwq tayin,

⁷ ‍hoo Aaron gv ko tuup nyub tulungv wm parn dvb wswngam mwx-mvaq layil hoo yugw ho wm pvrlwq tayin.

⁸ ‍Hoo Aaron gv ko tuup nyub tulungv twqmwqnam vdin tulungam, dumpongam kam, hoo oxam kam yugw ho wm gul doonbo wsw aoho vlwq tayin;

⁹ ‍hvbmabde hoqg hara vdinam la hoqg lvpiangam mwv iss lvgab hwrxaqtayin. Hoo nyubv hoq tulu ham yugw ho boyuqnam aky gob partayin, hv At Swn boyuqnam aky bvla dvnam aky sungam bo gob nyitayin.

¹⁰ “Mwwg boyuqnam aky hv tuun-mee hoqgv sviya maalo sibin baloqkam, un-tar gvma bo bimp loq dorg mwv boatayin,

¹¹ ‍hoo mwv At Swg kaagaho nyoodum daiyag yugw ho ham patab tayin, hoo Aaron gv ko tuup nyub tulungv hoqg uiyam yugw bviywrho pwqyaq tayin.

¹² ‍Hoo mwv ham twqmwq tayin, hoqg dumpongam hoo hoqg oxam nyubv yugw ho wm gul doonbo wsw aoho vlwq tayin,

¹³ ‍hvbmabde hoqg hara vdinam la hoqg lvpiangam mwv iss lvgab hwrxaqtayin. Hoo nyubv hoq tulu ham yugw ho boyuqnam aky gob partayin, hv At Swn boyuqnam aky bvla dvnam aky sungam bo gob nyitayin.

¹⁴ “At Sw gab mwwg boyuqnam aky hv pvta baloqkam ho mwwg pukum mam aky jidy sanam mam mwv bwa tayin.

¹⁵ ‍Hoo nyubv ham yugw ho bwatayin hoo hoqg lwwpongam hiqswr tvl ham yugw ho partayin. Hoqg uiyam yugw bviywrb biqpaq mvtayin.

¹⁶ ‍Mwv hoqg ammam la hoqho dooxa kunboam hoo ham yugwg dou-caga daiyag mui dook ho jooxaq tayin.

¹⁷ ‍Mwv hoqg alapam puctayin hvbmabde ham mwlwngam puriqram. Hoo nyubv hoqg ham yugw wm wsw aoho partayin. Hoq boyuqnam aky hv At Swn dvnam aky sungam bo gob nyitayin.