JUDE 1 - DVRWQ PVVB

¹ Jisu Kristo nyera hoo Jemsig bor Jud galoqkv- Pwnbo Abwg abyko uraho doonbo Jisu Kristo gab rvkil apnam nyi tulu gab.

² Anyangv, swrsomalongv hoo abynamv nulgab doonka.

Xaalyongam Biswrbo Tulu

³ Ngoqg tumanam ajin tulu, ngo nulam ngulug kaapa paaiyinam ywwt ywwnam pagoqkam xeqdwb ceceqb kwrwb mwwl nyikanum, hoq nulam biywr-bebial vnwqb nulug mwwjwnam pagoqkam ceetor daqn dvb xeqdwb mwwdwql nyinum hoo Pwnbog mwwg xuqlinam nyiib nyim dvb lvkin ciqnyi ho naalinum.

⁴ Hoggab Pwnboam mwwjw maanbo nyi tulu go nulug pengko ho kaapa maadwb nyi tuluhv nulug Pwnbog anyangam xima bvla bulug nyis-nyipeql nyinam mam bibum biyiql ngulug At Sw Jisu Kriston gora At Swam xuqpaq gvdwn. Kol oyuho Dvrwqbo Potangv bulam xuqpaql nyiqry kaal belin apnamv doodwn.

⁵ Hoggab nulv soq mwlw sam cengl doos jaqkam At Pwnbov hoggub nyil Israel nyi tulungam Ijipt gvda hoqgam boolin kunum ham ngo nulam mwwpa mvdwb bepa dvn, hvbmabde kokw so mwwjw maanbo nyi tulungam twrknum.

⁶ Mwwgabto, ao gumtw tulu gon atwg atoram mwwpa maab nyinbo hoo atwg dookam apaqboam bulam nwrba cwtam gob tag korcup tvl kan urahv ap pakun hoo Pwnbov bulam hoq aal koibo Aalam xuqpaq tayin.

⁷ Sodom mam la Gomorra hoo hoq diis-paapho doonbo lvpwngam mwwpa kaato, hoq nyi tuluhv ao gumtw tulungv nyinam hvb nyinum hoo yocu-yabio nyinam mam hur nuul kacboam nyidul doonum. Bulv nwrba cwtam gob wmmwg laqm mam baql doon kun.

⁸ Hoq hvbkalam, nyi tulungv yuma maanam hvb bulug gv ayaqkam ceebiob baql, bulv Pwnbog gamlam tamab ao gvdag atoram hvnyw nyisul nyidwn.

⁹ Ao gumtw ab, gumtw Mikael kam sam nyimanum. Mojesg gv svmangam hiyv naakin dvn ham gaqyaq mins dvk ho, Mikael uiyam bepaq-beyaql hvnyw bisul bedwb hampeq maadwb mwv benum, “At Sw nam yolu betka.

¹⁰ Hvbmabde soq nyi tulu si bulug tacin maanam mwlwngam mwwtaqb hog gotwq bolo ham hvnyw bepal bedo, nyoro svdin nyinam hvb bulug nyinam-wnamv, hoq tulu jaqhv bulam mucu-mviya dvn.

¹¹ Bul gab hentwr jaqkv, bulv Keenwg lamta wkwb wmin gvpa ku. Bulv swwpwq twqdwb nyita kunv Balaamwg hvb nyimur paku. Bulv Korag ceebiob nyinam hvb nyinkun, hoo mwwg hvbkalam nyiin kun.

¹² Durum dvkho bulv twwxum tvl damab nyinam hv bulug vcin kopinlo hwr-taro hvb nyidwn. Bulv at gv gab mwwlwq twqdwn. Bulv gums dooma boam haapam mam dooi nul wgnam hvb, nyodo homabo hvb nyidwn. Bulv aaxy xeed lwb-ral pool moodam kam aaxy xeema bo svvn rwbam butaql busuql bulinam ho singtwrl sikbo svvn hvb nyidwn.

¹³ Bulv sa-svlo hoq iss suduq hvb hoo bulug hvnyw-harv iss xupiqb duql kaakin dvn. Hoqgab Pwnbov bulam nwrba gob doom dvb mwlwngam ura yaanbo ung ak pvvbwql ap jipa kun.

¹⁴ Adam hoqgv ko hotam ax dvn Inok soq sam kol oyu bulug pagoqkam nyiqry bepnum. “At Sw lwwyw-lwwyw lwwg dvrwqbo ao gumtw tulungam bool

¹⁵ almanbo ximanam bonam nyin boam hoo almanbo torbo agam bel nyic nyinbo nyi tulungam, ceebiob benboam pw-hwwtab ipoqtayin!”

¹⁶ Soq nyi tulu si looxiam nyi asaqkam haqdwn hoo nyixiaq kvdaq bogub nyigdo. Bulv atwg hangho almab mwwnam mam nyil doodo. Bulv agam rooxob dul yvdo hoo bulv swwpwq twqklo nyi asaqkam poqyuq-paqmaq dvn.

¹⁷ Hvbmabde ngoqg ajin tulu, nulam kol otuqho ngulug At Sw Jisu Kristog xuqnam nyi tulungv hog hvl bekinnum ham mwwgabto.

¹⁸ Bulv nulam benum, “Vtwr Aalv haai kukam nulam bej-beparbo nyiv lengtayin, atwg mwwlwqkob alman boam nyinbo nyiv lengtayin.”

¹⁹ Soq nyi tulu si dvpar parsaq dvb mvnbov. Bulv almanbo nyinwngam nyinbov hoo bulv Yalam doog maanbov.

²⁰ Hvbmabde ngoqg ajin tulu, nulv nulug dvrwqbo mwwjwngam hindib yumcum bvvl doogto, Dvrwqbo yalwg atoram naal xuml dooto.

²¹ Nulv ngulug At Sw Jisu Kriston kaayal nulam mwwg ayanam galoqkv nulam nwrba cwtam swwgam jik dvb kaayanam hvbkalam nulv Pwnbog abynam uraho dooto.

²² Mwwjw maanboam ayab kaakin to;

²³ Wm haata boam wm hoqgam twqlinto, hoo nyi tuuginam bos sol ayanam mam kaakin to, hvbmabde bulug nyic nyiklo mviyaqnam vjam gvqsiq maab oyum to.

Xuml Paqnam

²⁴ Sija hiyv nulam bwdw hom maab turnbo, pai dooma dvb hvnyir cojor dvb mwwg yuunam agaho boa deenbo,

²⁵ ngulug At Sw Jisu Kriston hentaql ngulam ywwt ywwnbo Pwnbo akinwg yuunamv, atorv, xitor-xilonamv, hoo gora abwb nyinamv kol galoqkv ho sijakam hoo nwrba gob doonka! Amen.