JOYEL 1 - DVRWQ PVVB

¹ At Swg gomcwrv, Pituyelwg ko tuup Joyelnvn haanum.

Komar Takamg Nyob Paanam

² Axa tulu nul, sam tato; gvdag doonbo mwlwngv ruucw kwrgabto! Nulug swwca deek aalho, ho nulug ab tulug aalho soq svk nyinam si nyin mvi yv?

³ Nulug ko tulungam soq sam betamto, hoo nulug ko tulu hoqg bulug ko tulungam betam mvto, hoo bulug ko tulungv akta haata bo ko hotam mam betam mvto.

⁴ Hoggv komar takamv dvngo pan, ham twwiyap yabkarbo takamv duiyum paku. Hoggv twwiyap yabkarbo takamv dvngo pan, ham poqkar yvnbo takamv duiyum paku, hoo hoggv poqkar yvnbo takamv dvngo pan, ham dwtwrbo takamv duiyum paku.

⁵ Huurab to twwxum bo nulv, hoo xabto, hoo vcjaqb sogoql xabto, opo twwnbo nul mwlwngv, hoggab tiiswrbo opongam, nulug agamv twwpa kuram.

⁶ Hoggab ngoqg gvdangam asaq nyook ak ceekol daqrab paku, hoqhv ator jaqpa hoo xinya nyoma; hoqg exiv sony nyot tulu exy go, hoo hoqhv sony nyot nyem akwg lvqky hvb doodo.

⁷ Soq si ngoqg roo annam domyu-damca paku hoo ngoqg taoq svvnam yvqmwq dvb mvnum; hoq si bulug sukuqkam diibin tvl hoo kwrtab paku; haqb tulungam singdwb dvb mvpa ku.

⁸ Mwnwg tvmw swwca yikho begaqnam paada ak gab mvvngam akv tuila vjam kootwl nyix-riinam hvb nyido.

⁹ At Swg nam hoqgv dvnam-twwnam mam aky jinam mam mutum pakun. At Sw gab bon nyinbo tulungv, nyub tulungv nyix-riinam.

¹⁰ Rongo tulungam muiyu-mvcanum, gvdangv kvjnam, hoggab vly axeqngv twryum paku, twwsv xoopa ku, kutiv lengk ma.

¹¹ Hvnyw to, rongo mvnbo tulunga; vcjaqb sogoql xabto, roo boolu mvxaqbo tulunga, hoggab wtw ammam la tanyeq vly naady sanam rongongv yuupaq paku.

¹² Roo annv sengpa ku; taoq svvnv swwnyi kuma. Annar svvnv, pvng svvnv, hoo Appel svvnv, ho rongog hog svvnv mwlwngv sengpa ku, hoo nyia ko tulug hempnamv mooma-sasa paku.

Mwwkur Tvk Hvl Goqnam

¹³ Nyub tulunga, tuila vjam kootwl hoo nyix-riito; vcjaqb sogoql xabto, yugw lo bon nyinbo tulunga. Urab haato, tuila vj kootwl ai yupwngam dooto, ngoqg Pwnbog bon nyinbo tulunga! Hoggab dvnam-twwnam akiam nulug Pwnbog nam hoqgv parl ap paku.

¹⁴ Dvma-twwmab nyedar darxaqto; piwr jwr-jwr dvb dookum lo ak goqto. Axa tulungam goqkum to hoo gvdag doonbo mwlwngam nulug Pwnbo At Swg namho goqkum to, hoo At Swn sogoql goqto.

¹⁵ Mwwdwqto hoqg aal gab! Hoggab At Swg aalv ogum paku, hoo Pwnbo hoqgv twrm tanam moodv haado.

¹⁶ Dvsam nulug vnyiq kaaga hoqgv, ho hwnyir-hvmaram la mwwngam nammam ngulug Pwnbo nam hoqgv mutum kuma yv?

¹⁷ Vly liitanam aaxiv ked ura lo sengpa ku; noosu tulungv suuram paku; noosu tulungam sapia paku hoggab vliv singyum ko-gab.

¹⁸ Hoggub svdin tulungv sigin dvn! Sibin-svv mwlwngv hendar-henpar kuma hoggab bul gab nwmw dvs dooma; sviya yaacam mvkam hentwr dvn.

¹⁹ At Swa, nam, ngo goqdwn. Hoggab nyora raataqg nwmw tulungam wmv guiyum paku, hoo rongog svvn mwlwngam moiliv guiyum paku.

²⁰ Nyorog svdin tulu ngvkam noqg gab singaqnam hoggab pobu kucw mwlwngv xootwr paku, hoo nyora raataqg nwmw tulungam wmv guiyum paku.