JOB 1 - DVRWQ PVVB

Jobwg Vmiq kvla Nyet

¹ Uj gvdaho nyi ak doonum mwwg eminv Job, hoo nyi ak si dvrwq bvla nyiidar nyiib swwnum, mwv Pwnboam bosnum hoo alman hoqgv aadonum.

² Mwv ko tuupv kvn go hoo ko nyemv oum go doonum.

³ Mwv sviyangv 7,000 go, svjinv 3,000 go, hvvbv 500 go, hoo svdam damn tulungv 500 go, hoo naleqgo nyera-paqnv doonum, hoqgab dou-cagag nyiilu mwlwg pengko hoqgv soq nyi si mwlwngam koi yaanum.

⁴ Mwwg ko tuup tulungv aal looxiam ak-akwg namho wko-wpeql durum dvbaml doonum, hoo bulug any-bwrm oum mam bulv goqnv dvk-twwk ho dvg-twwgnum.

⁵ Hoo hwdlo durum dwd aalv haaikam, Job bulam darxaqtvl hoo bulam kanamnum, hoo mwv ar komcam gorab layil nyiicwr-cwrx gab boyuqnam akiam pwr jinum. Hoggab Job benum, “Lokam ngoqg ko tulungv nyic nyipa nvpv, hoo bulug hvvjw lo Pwnboam beekam pan pv.” Soq sib Job nyikil doonum.

Jobnvn Pooka Mvdwb Uiyam Jinam

⁶ Hoq moodho aal loog golo hwdlo Pwnbog gumtw tulungv bulv atv atam At Swg agaho kaakin dvb haanum, hoo bulug pengko ho Uiyv kam haanum.

⁷ At Sw Uiyam toxnum, “No hogloqkv haai yin i?” Uiyv At Swn birwqnv hoo benum, “Swcw nvg ao bolo wkur-wxeql, hoo hoqho odum-akob wdul yvdu dvn.”

⁸ Hoo At Sw Uiyam benum, “No ngoqg nyera Jobnvn kaapas i, swcw nvg ao bolo mwwg hvb dvrwq bvla nyiidarbo nyi akjijaqkam dooma dvn, hiyv Pwnboam bosil hoo almanam hoqgv aado dvn?”

⁹ Ho Uiyv At Swn birwqnv hoo benum, “Job pagoq doomab Pwnboam bosdvn yv?

¹⁰ No mwam la mwwg nombungam hoo mwwg hog mwlw doognam mam raol doog maad nvi yv? No mwwg alaqho bonam nyinam mam lvqc cipa ku, hoo mwwg gumnv vi-vi yaiya go gvda bv swwl doodo.

¹¹ Hvbmabde noqg alaqkam ilin gvdwn mwwg doognam mam idaq kvka to, hoo mwv noqg nyuqm mam moiya rvxa dvb beetayin.”

¹² Hoo At Sw Uiyam benum, “Kaato, mwwg doognam hog mwlwngam noqg alaqho jigyin. Mwwg gv arongam noqg alaqkv idaq maabv.” Ho Uiyv At Swg dook hoqgv lengknv wknum.

Uiyv Jobwg Gumnam la Ko Tulungam Naanam

¹³ Hoq moodho aal loog golo hwdlo mwwg ko tuup tulu ngvla nyem ko tulungv bulug vbw cociqg namho dvl-twwl doodu yikho,

¹⁴ hoo Jobnvn pui baqn bov haal benum, “Hvvbv hal biidul doonum hoo bulug bviywrho svdam tulungv dudul doonum,

¹⁵ hoo haqma paq galo Sabean nyi tulungv haanum hoo hoq tulu ham naanum hoo nyera tulungam lyoqr orioq hoqgv patabnum, hoo nam betam taab ngo aro kelin yukun.”

¹⁶ Hoqhvb mwv goodu yikho, pui baqn bo asaq ak haanum hoo benum, “Doa toloqkv Pwnbog wmv gulnv sviyangam la nyera tulungam guiyum gvnkun, hoo nam betam taab ngo aro kelin yukun.”

¹⁷ Hoqhvb mwv goodu yikho, pui baqn bo asaq ak haanum hoo benum, “Kaldiya nyi tulungv nyob tommum gob nyil svjin tulungam naareq gvnkun hoo nyera tulungam lyoqr orioq hoqgv patab gvnkun, hoo nam betam taab ngo aro kelin yukun.”

¹⁸ Hoqhvb mwv goodu yikho, pui baqn bo asaq ak haanum hoo benum, “Noqg ko tuup tulu ngvla nyem ko tulungv bulug vbw cociqg namho dudu-twwdul dooi yikho,

¹⁹ hoo kaato, deexa-rara hoqgv ywt dooi ak lyanum hoo nammam ywtabnum, hoo hoqhv tuudy-yaamy nyiilungam yaqjabnum, hoo bulv sipa ku, hoo nam betam taab ngo aro kelin yukun.”

²⁰ Ho Job gorabnum hoo mwwg vjam pumwqnum hoo mwwg dummam riqbinum hoo deela ho geqp tvl hoo xumnum.

²¹ Hoo mwv benum, “Ngoqg annwg nvmmam hoqgv talo tvl lengnum, hoo ngo talo tvl wkur tayin. At Sw jinum, hoo At Sw naapaq gvnkun; At Swg eminv xinam jaqkv.”

²² Soq mwlw so Job nyic nyimanum ho Pwnboam kam alma hvl yolu maanum.