ISTAR 1 - DVRWQ PVVB

Lvpw Atwg Durum

¹ Ahasueruswg moodho, Ahasuerus Indiya hoqgv Itiopiya namgub gvda 127 go pvvb mvl doognum,

² ‍hoq moodho hwdlo Lvpw at Ahasuerus rvviyw Susa ho, mwwg xinam pvlw ho dooyikho,

³ ‍mwwg vnyw nywum go swwiyik ho mwv mwwg saab tulungam la nyera tulungam durum ak dvgnum. Parsiya gvla Mediyag sipai tulungv hoo xinam nyi tulungv hoo gvda hoqg nyiit rad mwlwngv mwwg agaho doonum,

⁴ ‍ho mwv mwwg nyetam xil yuunam mam la kangamnam mam hoo mwwg koijaqb swwnam mam aal 180 go kaakinum.

⁵ ‍Hoo hwdlo aalv wnya yukho, lvpw atv koibo la anyo bo gurum nwqtumnam tulu ho doonbo nyiilu mwlw gab durum ak dvgnum, lvpw atwg namlog boolu deelaho aal kvn go durum mam dvnum.

⁶ ‍Hoqho tacaq vj jipu tortumnan tulungam hoo yob-yol boam kangam bo pud oso lvgab rublwq tvl hoo kaiya-yvvxwql lwwsa-lwwma boam rup dvvcw ho hoo marbol swwrw tuluho rublwqnum, hoo xinam hun la rup kartam nannam kam mwlwngam xibin yaanam marbol wlw gvla xinam wlw tulungam puutwl lamta wk aoho joopnum.

⁷ ‍Twwsam hun pvtaq hoola luusaq-luusaq twwn nan pvtaqho, hoo lvpw atwg haareq ko jaqb xinam roo ala twwsv naleq jaqb hornum.

⁸ ‍Hoo twwsam at mwwlwqb kol twwnum: “Hoqho ningteqnam doomanum.” Hoggab nyi vxig mwwlwq koob nyim dvb lvpw atv mwwg namho bon nyin boam gaml jinum.

⁹ ‍Lvpw at Ahasueruswg nombu ho doonbo nyem tulu gab, Vi-koory Basti kam durum dvgnum.

Vi-koory Basti Haqpaqnam

¹⁰ ‍Kvn deen aalho hwdlo lvpw atwg hangv twwnam hoqgv hwrcw yikho, mwv Mehuman, Bijta, Harbona, Bigta hoo Abagta, Jetar hoo Karkas, Lvpw at Ahasueruswg agaho bon nyinbo nyiipium kvnnam gaml jinum,

¹¹ ‍Vi-koory Bastinvn mwnwg xinam ywr dumtup pam gvtwl lvpw at agaho boolin tvl, mwnwg kangam mam la kaaby dvb nyinam mam nyiilug agaho kaakin mvdwb goqnum.

¹² ‍Hvbmabde Vi-koory Basti lvpw atwg nyiipium tulungam gaml jilwqnam mam haqpaqnum. Hoq moodho lvpw atv vc loodab hang lengnum, hoo mwwg haaxaqnamv mwwg hang uraho wmmwm bioql doonum.

¹³ ‍Hoo lvpw atv moodam cengnbo pumb rwnam nyi tulungam benum (hoggab pvvbam la pw-hwwdynam mam pwbw bo tulungam hoqhvb lvpw atv tox dvb nyinum,

¹⁴ ‍mwwg dvqsinv Karsena, Setar, Admata, Tarsis, Meres, Marsena, hoo Memukan, otuqjaqb Parsiya gvla Mediya hoqg saab koiyib doonbo kvn hv lvpw atwg nyuqm mam kaanum):

¹⁵ “Pvvb nyicw jaqb Vi-koory Bastinvn hoggv mviyin do, hoggab mwn Lvpw at Ahasueruswg nyiipium nyi tulungam gaml jilwqnam mam tamab nyipa ku?”

¹⁶ ‍Hoo Menukan lvpw at gvla saab tulug taga ho benum, “Vi-koory Basti lvpw at arongam nyimur ma, hvbmabde Lvpw at Ahasueruswg gvdaho doonbo saab tulu ngamla nyiilungam ceekol nyij-nyipar paku.

¹⁷ ‍Hoggab vi-koorig nyinam sam nyem mwlwngv cengtayi, ho hoqham bulv kaagwl bulug nyol tulungam kaajab tayi, hoo bulv betayin, ‘Lvpw at Ahasuerus Vi-koory Bastinvn mwwg agaho haam dvb gaml jinum, hvbmabde mwn haamanum.’

¹⁸ ‍Soq aal soqgv Parsiya gvla Mediyag xinam saab tulug nyemv lvpw atwg saab tulungam mwnwg modu maab nyinam hvb nyitayi, hoo hoqho nyijab-nyiyiqnamv la hang lingtwrnamv dootayin.

¹⁹ ‍Soq sam lvpw at mwwlwq panyiloqkam, xinam gaml loq ak mwwg hoqgv lengm to, hoo Bastinvn nywywngam Lvpw at Ahasueruswg agaho haam mvma dukub, pvvb lo ak Parsiya gvla Mediya nyiilug pengko mvdar-mvparl mvpia lama dvb xeqm to. Hoo lvpw atv xinam pwqlwngam mwnnvn alyanbo asaq nyem mam jim tuku.

²⁰ ‍Hoqgab hwdlo lvpw atv soq pvvb sam mwwg lvpw-haty ho pui baqb nyiloqkam, nyem mwlwngv bulug nyolam koi jaqkam ho anyo jaqkam bulv modul xitayin, hoggab hoq nyookv koijaqnum.”

²¹ ‍Soq tomswrnam si lvpw atam la lvpw atwg ko tuup tulungv tvlwqnum, hoo lvpw atv Memukan hoggab benum hvb nyinum.

²² ‍Ho nyiicwr-cwrxig agam xiqcw bvla bulug atwg agam goab, mwv xinam gvda mwlwho potangam nyiilu vxig agam goab jilwqnum, hoo namlo vxy ho nyegangv atwb swwtayin, hoo mwwg nyiilug agam goocw jaqb gootayin.