IPISI 1 - DVRWQ PVVB

¹ Pwnbog mwwlwqkob Jisu Kristog xuqnam Poul galoqkv— Ipisiho doonbo bulug swwca ho Jisu Kriston mwwjwl swwnbo Pwnbog nyi tulu gab.

² Ngulug Ab Pwnbog hoo At Sw Jisu Kristo nulam anyangam la swrsomalongam jignvka!

Kristog Aoho Yalwg Swwgam Lvqc Cinam

³ Ngulug At Sw Jisu Kristog Abwn paqnyatuj! Hoggab mwv ngulam Kriston hentaql yalwg lvqc cinam mam luuxiam ngulv Kristog lvgab doogam gab ao gvdag hog mwlwngam lvqc cidynam mam ngulam lvqc cipa kun.

⁴ Gvda gvt sam bel pwma daab Pwnbov ngulam dvrwqbo hoo nyiidar nyiib nyil mwwg kaagaho Kristog uraho lokub dool swwm dvb xuqknum.

⁵ Hoggab Pwnbov abynam pagoq gab ngulam mwv Jisu Kristo galoqkv mwwg ogumb haal mwwg ko tuupwb mvmdvb hvl otuqho mwwrwl ap pakun, hoo soq sib mwwg mwwgwnamv hoo nyidynam bvrwq niqtuq pagoqkv.

⁶ Ngulv Pwnboam mwwg albo xitor yuunam gab paqtju, hoggab mwv ngulam jinyi loodab mwwg ko tumanam Tuupwg emin gab soq sam ngulam jipan.

⁷ Hoggab Kristo ngul gab sigam gab ngulv nyet nyiib nyidkun ho ngulug nyic-nyimur mwlwngam apaq jipa kun.

⁸ Ngulug mwwc lamanam Pwnbog anyangam ngulam koijaqb jipan. Mwwg hoq anyangv ngulam laleq dvb hog mwlw nyijwq-nyegam hoo mwwcin nannam jipa kun.

⁹ Pwnbov hognvkam nyidwb mwwr kunum ham mwv pwbw jaqb niqtuq nyilin pakun hoo mwwg ura bvrwqngam ngulam cengm dvb Kristog galoqkv jipa kun.

¹⁰ Pwnbov mwwrwl ap kunam mam ham mwv moodv haai kukam pwnam mwlwngam luuxiam olumgob ao gvda gam la gvda gvt soq gam bookuml Kriston hoq tulug lvpw abwb mvtayin.

¹¹ Hoqgab hog mwlw luuxiam Pwnbov mwwg mwwlwq-hinglwqkob nyigdvn; hoo koljaq galoqkv Pwnbov hognvkam nyis tulungam nyidwb mwwrwl ap kunum. Hoggab mwv ngulam Kristog lvgab lokub doom dvb mwwg nyiib nyim dvb ngulam xuqnum.

¹² Hoggab ngulv otuqcob Kriston mwwjwl hingw bo nyi tulungv, hoqgab ngulv Pwnbog yuunam mam paqnyatuj!

¹³ Nulam ywwt ywwnbo jvqtw Tugu Puiyam nulv tapa tvl nulvkam Pwnbog nyi tulub nyiknum. Nulv Kriston mwwjwnum hoo Pwnbov nulam mwwg nyiv ku hvl nulug aoho mux mvgaql aptukul mwv birwl apnam Dvrwqbo Yalam nulam jipa kun.

¹⁴ Yal si Pwnbov mwwg nyi tulungam jitayin hvl birnamv ho Pwnbov hognvkam bir pakun ham ngulv kaapa tayin hoo Pwnbov bid lalal bedwn, hiyv nyiv mwwg nyiib nyidkun bulam nyerab swwl doom kumab nyet swwm dvb jitayin, hoo mwwg eminam koi alnvka hvl mwwg yuunam mam paqnyatuj!

Poulwg Swgwnam

¹⁵ Nulug At Sw Jisun mwwjwnam mam ngo tapa tvl hoo Pwnbog nyi tulu mwlwngam abynam mam tapa tvl,

¹⁶ ngo Pwnboam paqdul doodwn. Ngo swgw yikam Pwnbog agaho nulug eminam bel swgw dvn

¹⁷ hoo ngulug At Sw Jisu Kristog yuunam Ab Pwnboam nulam mwwg Yalam jitwl nulam mwwlaq mvtwk ho Pwnboam kaakin mvdwb jitwk hvl xumdwn, hoggab hoqhvb nyibnyiloqkam nulv mwam pwbwb cengtayin.

¹⁸ Nulug hangam mwwkoq mvdwb jitwl nulam mwwg hutongam kaapa mvdwb jitwk hvl ngo xumdwn, ho mwwg nyi tulungv mwv hog hwdgo mwwc lama dvb lvqc citayin ham nulv mwwg birwl apnam koi albo lvqcam citayin ho nulam hoggab dvgoq goqanum hoq dvgoq goqgwnam hingwnam ham nulv cengtayin,

¹⁹ hoo mwwg atorv mwam mwwjwbo nyi tulu gab nyigw naadwb koi algo ngulug ura si bonam nyidul doodwn. Ngulug uraso dootwl bonam nyinbo ator akin

²⁰ hv sulak Kriston kam sik boam mwv turdkub purab tukul mwwg lvqbwq taqc ho doom dvb ao lvpw haty tv jipan.

²¹ Kristo ao gvda mwlwg aoho lvpw abwb swwdwn, gora abv, atorv, hoo mwlwg at yangv. Mwam emin ak mimpan, hoq emin hv mwlwngam koi yaanbo eminam mwam soq gvdag ho haata bo gvdag gora ab tulungam emin gvnam mam koi yaan boam jipan.

²² Pwnbov hog mwlwngam Kristog lvpia niikum uraho ap pakun hoo mwam dvrwq namlo aoho hog nyiit Atwb mvpa kun.

²³ Ho dvrwq namlongv Kristog gv soodinv, hog mwlw nyik pagoqlo niqtuq nyilin bov, pviyw-mviywngam nyipwl niqtuq nyilin bov.