IJRA 1 - DVRWQ PVVB

Sairaswg Pui Baqnam

¹ Parsiyag lvpw at Sairaswg otuq vnyw ho, At Sw gomcwram Jerimiyag agam hoqgv beknamv niqtuq lengm dvb, At Sw Parsiyag lvpw at Sairaswg yalam huurab mvnum, ho mwwg lvpw-haty mwlwho mwv puiyam baqmnum hoo ham xeqtwl jinum:

² “Soq sib Parsiyag lvpw at Sairas bedo: ao lvpwg Pwnbo At Sw ngam swcw nvg lvpw-hatiam jipa ku, hoo mwv ngam Judaho mwwg gab Jerusalemho nam namg mvm dvb ator jipa ku.

³ ‍Hiyv lajaqkam nulug pengko ho mwwg nyiilu gob nyin boam, mwwg Pwnbov mwam dooba nvka, hoo mwam Juda gvdag Jerusalemb caam to, hoo Israelwg Pwnbo At Swg nammam mvdar mvto—mwv Jerusalem hoqg Pwnbov.

⁴ ‍Hoo swwl doonbo nyiicwr-cwrxiam, mwv hogloq nyook bvxeq nyiody boodwn, ham mwwg doogw ko nyook hog nyiv rup hoo hun, dvs-twws hoo tuun-mee lvgab svka to, hog lvg-lvgab Jerusalemho doonbo Pwnbog namgab at mwwlwqb akiam jito.”

⁵ ‍Ho Juda gvla Benjaminwg nyob hoolug peelo bo tulu ngvla nyub tulungv hoo Lebi nyiilungv wrab kunum, ho nyiicwr-cwrxiam hiyam Pwnbog yalv mvneqnum hv Jerusalemb wl At Swg nammam mvdar taab wnum.

⁶ ‍Hoo bulug door-doopwngv bulam rup pwcwngam, hoq lvgab hunam, ho lvgab dvs-twwsam, ho tuun-mee tulungam, hoo vcjaqb kor xinam dupum-dvrab pam, hoq lvgab hog mwlwngam jinyib aky jinum.

⁷ ‍Lvpw at Sairas At Swg nam hoqg pwcw tulungam Nebukadnejjar Jerusalem hoqgv baqlayil mwwg pwnbo tulug namho apkunam mam baqlin jiknum.

⁸ ‍Parsiyag lvpw at Sairas soq tulu sam Mitredat gumn bwwn bo akwg alaqho jilwq tvl baqlin mvmnum, hoq tuluhv Judag lvpw atwg ko tuup Sesbajjar eminho xeqp kunum.

⁹ ‍Hoo soq tulu si hoqho dupum-dvrab gob doon bov: hun pukaqkv 30 go, rup pukaqkv 1,000 go, cvvkaqkv 29 go,

¹⁰ ‍hun pwcwngv 30 go, rup pwcwngv 410 go, hoo asaq pwcw-uddungv 1,000 go;

¹¹ ‍hun gvla rup pwcw-uddu tulungv 5,400 go. Hwdlo Bebilon hoqgv Jerusalemb nyumwb bool wg yikho, soq mwlw sam Sesbajjar baqal haanum.