HIBRU 1 - DVRWQ PVVB

Jisu Pwnbog Gamlam Baqanum

¹ Kol Pwnbov ok-oksub ngulug ann-ab tulungam vigo luusaq-luusaqb mwwg nyiqry benbo tulungam bilwqtvl goomnum.

² Hvbmabde swnyw-sool moodv vtwr aal so mwwg Ko Tuup galoqkv ngulam agam goodwn, Mwam sulak, ho mwwg galoqkv Pwnbov gvda gvt sam pwmnum ho mwam kolam hog mwlw gumnam bem dukub hvl xuqlin ap pakun.

³ Mwv Pwnbog yuunam hutongam kvvyw tacbov ho Pwnbog nyuqtuq-moor gv vp jaqkv. Mwv gvda gvtam gvbwl bel doog gvdwn. Nyia kog nyicam apaq mvdkub pvvb paxo kokw so mwv mwlwjaqkam ator torbin yanbo ao gvdalo doonbo Pwnbog lvqbwq alaq taqc ho doon kun.

Jisu Ao Gumtw Tulungam Koi Yaadwn

⁴ Ko tuupam ao gumtw tulungam koi yaadwb mvknum ho Pwnbov ao gumtw tulungam emin jinam ham koi yaanbo eminam mwam jipa kun.

⁵ Hoggab Pwnbov nywywngam mwwg ao gumtw tulungam ak gonkam bemanum, “No ngoqg Ko Tuupv; Sool galoqkv ngo noqg Abwb nyidkun.” ho Pwnbov ao gumtw ak gonwg pagoqkam benum, “Ngo mwwg Abwb nyitayin, hoo mwv ngoq ko tuupwb nyitayin.”

⁶ Hvbmabde Pwnbov mwwg dwr hila paaconam ko tuup akam gvda gvtwb kanam nampoq tadwkho mwv benum. “Pwnbog ao gumtw mwlwjaqkv mwam xumto.”

⁷ Hvbmabde ao gumtw tulug pagoqkam Pwnbov benum, “Pwnbov mwwg ao gumtw tulungam dooiyib mvpa, ho mwwg nyera tulungam wm moilib mvpan.”

⁸ Hoqgv ko tuupwg pagoqkam Pwnbov benum, “Pwnbo, noq lvpwngv nwrba cwtam hoqgv nwrba gob dooky nvka! No ngoqg nyi tulug aoho dardar jaqb lvpw pwl doog gvnka.

⁹ No al boam aby bol swwtka, ho almanboam oyum yumt ka. Hoqgab sulak noqg Pwnbov nam xuqpa kun ho hemp xinam jaqkam nam xil noqg ajin tulungam jinam mam koi yaanbo hempam nam jipa kun.”

¹⁰ Mwv hvlakam benum, “At, no kol otuqjaqho gvda gvtam pwnum, ho noqgv atwg alaqngv no ao gvdangam pwnum.

¹¹ Soq mwlwsi niitayin, hvbmabde no dooky tayin; bulv vj hvb nyil niitayin.

¹² No bulam kamt vj hvb cirku tayin, ho bulam vj hvbkalam kooly dvb nyitayin. Hvbmabde no looxiam swly maab dooky tayin. ho noqg swwnamv nywywngam niiram.”

¹³ Pwnbov mwwg ao gumtw ak gon kam nywywngam bemanum, “Ngo noqg ceebio nyemaqkam noqg lvpia niikumho noq lvpia daqtam dvb mvma deedib no ngoqg alaq lvqbwq taqc so dooto,” hvl benum.

¹⁴ Hvb nyiloqkam, ao gumtw tulu si hognvkv yu? Bulv Pwnbog kanamnam mam tanbo Yalv ho Pwnbog ywwt ywwnam mam kaapa bo nyi tulungam svka mvdwb kanamnam, Pwnboam xumn bov.