GALATI 1 - DVRWQ PVVB

¹ Nyia kov ma, ho nyi galoqkv ma, hvbmabde Jisu Kristo hoo mwam sik boam lokta turdkub purabo Pwnbo Abwg xuqnam Poul galoqkv la

² ngoqg lvgab dooba bo vbw-bor tulu mwlwngv Galatiho doonbo dvrwq namlo mwlwngam salam jilwqdo.

³ Ngulug Ab Pwnbo la At Sw Jisu Kristo nulam anyangam la swrsomalongam jignvka.

⁴ Swnyw-soolog almanbo mood soqgv ngulam ywwtab mwv ngul gab Pwnbo Abwg benam gamlam tal Pwnbog mwwlwqkob ngulug nyic mwlw gab atam jipaq suknum.

⁵ Pwnboam yuunamv nwrba cwtam hoqgv nwrba gob doonka.

Tugu Puiyv Akin Gotwq

⁶ Kriston hentaql anya mwwpal nulam dvgoq goqnbo ak hoq pagoqkam apaqpel sija pui asaq ak naapa hvl benam puiyam tapa tvl ngo nulam lomdo.

⁷ Bitw bebaloqkam, “Tugu Pui,” asaq ak dooma dukun, hvbmabde sam ngo bedwn, nyi tuugin Kristog Tugu Puiyam oksub likub-lexeql nulam begbov doodwn.

⁸ Hvbsujaqkam, ngulv jaqkam ho ao gumtwngv sujaqkam, ngulv nulam bekinam tugu pui aoho pui asaqgo oksunbo ak bekin baloqkam, hoq nyi ak ham swwxw-ywlw nyookub imto.

⁹ Ngulv otuqho soq sam nulam bekin tukun, hoq aob sija ngo lokta bedwn, hiyv lajaqkam nulug nvvrwq kunam Tugu Puiyig aoho pui asaqgo tomswr baloqkam, mwv sux-ywlw nyookub im dvb loopaqto.

¹⁰ Ngoq soq benam si nyiam tak dvb mwwl bema hvbmabde ngo Pwnbog kvtaq pa hvl loonam mam mwwdwql bedwn. Ngo nyi tulungam xik dvb nyima. Ngo nyiam xikdvb sija godab mwwnv nyiloqkam, ngo Kristog nyerab nyinyi ram.

Poul Hvvky Nyiib Swwknum

¹¹ Vbw-bor tulu ngo nulam sam bekin tvnwp, tugu pui bekinam hv nyiig bisiqnam pui ma.

¹² Ngo soq sam nyi galoqkv tapa ma, ho hiyvkam ngam sam tomswr maanum. Hvbmabde soq sam Jisu Kristo mwv atv vpjaq ngam kaakinum.

¹³ Ngo Juhudi dormongam xima vrram xil swwdwk ho ngo hoggub nyil Pwnbog dvrwq namlongam aya maab mvnyi-mviyal twrm dvb ngo nyinum hoq bvrwqngam nulam bekin tukun.

¹⁴ Ngoqg swwbam Juhudi nyi mwlwngam ngo Juhudi dormo vrram tengbin yaab rwbin yal swwnum. Ngo kolwg ngulug ann ab tulug nyicw-mwcwngam xil nyi asaqkam laabo yaab nyil swwnum.

¹⁵ Hvbmabde Pwnbov mwwg anyangv ngam ko bwwma da hoqgv ngam xuqlinum, hoo mwwg bonam ngam nyim dvb xuql ap kunum.

¹⁶ Kokw so mwv mwwg Ko Tuupam ngam kaakin dvb mwwr kunum, hoo ngam mwwg Tugu Puiyam Nyoodo nyi tulug agaho bekin mvdwb xuqp kunum. Ngo hiyv nyi dook ogumho tomswr kotab wmanum,

¹⁷ ho Jerusalemho ngoqg wma daab swwco bo xuqlinam xuqnam nyi tulungam kam kaatab wt ma. Hvbmabde ngo hoq kokw daqho Arabiya gvdab wnum, hoq kokwb ngo Damaskaswb wkur kunum.

¹⁸ Ho vnyw nyium kokw so Pitor galoqkv pui tadwb mwwnv Jerusalemb wnum, hoo mwwg lvgab ngo aal camleq loongo doomin gvnum.

¹⁹ Ho ngo hiyv nvkam At Swg bor Jems aoho nyi xuqnam asaq gonkam kaapa maanum.

²⁰ Ngo hognvkv xeqg dvn jvqtwngam xeqdwn. Ngo xaalyob xeqma; hoggab Pwnbo ngam svka dvn!

²¹ Kokw so ngo Siriya la Silisiya gvdaho doonbo nyook tulub wnum.

²² Hoq apo bumpwho Judiya gvdaho doonbo Kristan dvrwq namlo torab pv ngam vp jaqkam bulv hindy alwb cingbwq maatanum.

²³ Bulv nyi asaqkv, “Ngulam mvnyi-mviyal mvnbo, ngulam twrdwb lok nyinbo nyi akv sija hoq mwwg mvnyi-mviyanam nyi tulungam bulug mwwjwnam pagoqkam bekin yvd kuiyuk!” hvl bekinam mam tapa twqnum.

²⁴ Hoqgab bulv Pwnboam ngoqgab paqnum.