DOOTIN 1 - DVRWQ PVVB

Cenglaqnam mam Cengrabnam

¹ Israelwg lvpw at, Debidg ko tuup, Solomonwg dootin tinam tulungv:

² mwwlaqkam la tomswrnam mam cengdwb, ho urag gomcwr tulungam cenglaq dvb,

³ Nyilaql tomswrnam mam, dvrwqngam, jvqtwngam, hoo homyinam mam nvvrwq mvm dvb,

⁴ mwwcin maanboam mwwlaq mvm dvb, swwca bo tuudy-yaamy tulungam cenglaqkam henglaq mvm dvb

⁵ mwwlaq boam tapa mvmto hoo viyag cengm to, hoo hiyv akv cenglaq dvn hv tomswrnam mam naadwn,

⁶ dootin tinam mam la niitin-puqtungam, hoo mwwlaq bog gamlam la bulug nwwtam bvlam mam cenglaq dvb

⁷ At Swn bosnamv cenglaq laqrab dvn; nyiidam bo tulungv mwwlaq kamla tomswrnam mam haqpaq dvn.

Nyicbo Tulug Kaabynam

⁸ Tato, ngoqg ko, noqg abwg tomswrnam sam, hoo noqg annwg biswrnam mam apaq maabv,

⁹ hoggab hoq tuluhv noqg dumpo lo anya jaqb oj gvmnum hvb hoo noqg lwwpo lo guj gvnam hvb nyidwn.

¹⁰ Ngoqg ko, nulam kaaby dvb nyicbo tulungv pwqi nyiloqkam, loomin gvmabv.

¹¹ Bulv hvl beinyiloqkam, “Ngulug lvgab haato, nyi mengtab tooiya tuj; pagoq doomab cengma bo nyiam tooiya tuj;

¹² Sux-ywlw hvb, hoo hoggub nyi dorpwngv ung urab yoqlwq dvn hvbkalam ngulv bulam tordwb dvmeqtuj;

¹³ ngulv mwlwg xinam gumn tulungam kaapa tayin, naareqnam gumnv ngulug namho bwwrtayin;

¹⁴ nulam xijiq jinam mam ngulug pengko so hurlwq kvkato; ngul mwlwngv twngk cuk kukin go doog tayin”

¹⁵ ngoqg ko, bulug lamta wkwb wmin gvmab; bulug lamta hoqgv nulug lvpiangv dokur tuku,

¹⁶ hoggab bulug lvpiangv almanbo ho xardwn, hoo bulv nyebia jaqb ywlw twwtab wdwn.

¹⁷ Hoggab pvtangam kaapa dvb pwd-poto peqnamv niqtuq dooma dvn,

¹⁸ hvbmabde hoq nyi tuluhv atv sidwb kvsil kaaya yaal doodwn; bulv atwg swwgam mengdwb tooiya yaal doodwn.

¹⁹ Hiyv rvvswl jvqtw nyimab door tvl swwnbo nyi vxig lamtangv soq si nyidwn; hoqhv door tvnbog swwgam naapaq dvn.

Mwwlaqkv Goqnam

²⁰ Mwwlaqkv vcjaqb lyobu buuxy lo goqkar do, kor mvk haty lookam mwwlaqkv sogoq goqkar yindo;

²¹ Ruuj-pumj dvb dukumko lyobu tuluho mwwlaqkv goqlin do; bopamg haagag toggoq tuluho mwwlaqkv agam goodo:

²² “Mwwcin maanbo ak no, hog hwdgo, noqg mwwcin maanam mam no aby taikun? Hog hwdgo benyi-beya bo tulungv hemp tayin hoo nyiidam bo tulungv cenglaqkam oyum taikun?

²³ Ngoqg yolu ruqkho nulv mwwkur baloqkam, kaato, ngo ngoqg yalam nulam toolin jitayin; ngo nulam ngoqg gomcwr tulungam cengm dvb mvtayin.

²⁴ Hoggab ngo goqnum hoo nulv ngam taram hvl haqpaqnum, ngo ngoqg alaqkam yamganam hoo akjijaqkam tagab maanum,

²⁵ hoggab ngoqg tomswr-honynam mwlwngam nulv tanam-kaacamnum hoo ngoqg yolu ruqyikho akjijaqkam tamanum,

²⁶ nulug dwr-kanongam ngo nyirj tayin; hwdlo nulam cwqnyi maadwb bosnamv haaikam ngo bej-bepar tayin,

²⁷ hwdlo bos soma vrnamv nulam nyodo-taa peea pan hvb peea yin hoo nulam dwr-kanongv cwkeq-lvmeq pwrnam hvb pwra yin, hwdlo vs-axaq kvla vcjaqb vcnamv nulug aoho haaiyin.

²⁸ Hoq kokwb bulv ngam goqtayin, hvbmabde ngo goqrwqram; bulv ngam toxum-taxwl meegaq tayin hvbmabde ngam kaaparam.

²⁹ Hoggab bulv cenglaqkam oyumnum hoo At Swn bosnam mam xuqbwq maanum,

³⁰ akjijaqkam ngoqg tomswr-honynam mam tama pan hoo ngoqg yolu-ruqnam mwlwngam haqpaq pan,

³¹ hoqgab bulug lamta niqtuq nyijongam bulv dvtayin, hoo bulug atwg nyin nan hoqgv bulv bwwrtayin.

³² Mwwcin maanamv bulam lamta wxaq gvl mengnum, hoo nyiidamv, mwwdar lamanamv bulam ciqcaq-bviyaq mvpa kun;

³³ hvbmabde hiyv xeq ngam tanbo hv swrsob dootayin hoo jampwb doonu tayin ho hog akkam bos haai dooram.”