AMOS 1 - DVRWQ PVVB

¹ Tekoag sviya rvkybo pengko hoqgv Amoswg gomcwr agamv haanum, mwv Israelwg pagoqkam kaapanum Ujjiya Judag lvpw atwb swwd moodho hoo Joas gv ko tuup Jeroboam, Israelwg lvpw atwb swwd moodig vnyw nyingwg otuqb nyioby hwqma tai yikho haanum.

Israelwg Door-doopw tulungam Pw-hwwnam

² ‍Hoo mwv benum: “Jaiyon hoqgv At Sw dugum gumdo hoo Jerusalem hoqgv mwwg yalam dulin mvdo; ww hwwtaqho sviya rvkybo tulungv nyix-riido, hoo Karmelwg puutu aongv sengdo.

³ ‍Soq sib At Sw bedo: “Damaskaswg luum go nyixaqnam gab, hoo lwpy deenam gab laqm-baqm deenam mam ngo nookur kuram, hoggab dvvcw am jaaxaqnan lvgab bulv Gilead ammam jaaxaq paku.

⁴ Hoqgab Hajaelwg namho ngo wm ak rwlwq tayin, hoo hoqhv Benhadadwg atorb cwwgwnanam guiyum tayin.

⁵ Damaskas gv dvvcw toggoqkam—ngo mvpia tayin, hoo Ebin lywpa hoqg doonbo tulungam mutum tayin, hoo Beteden hoqgv hiyv mwv lvpw atwg beqnyiangam bwwl doogdvn; hoo Kir urab Siriya nyiilungv nyuum wtayin,’’ At Sw bedo.

⁶ ‍Soq sib At Sw bedo;” “Gajag luum go nyixaqnam gab, hoo lwpy deenam gab, laqm-baqm deenam mam ngo nookur kuram, hoggab bulv nyi mwlwngam Idom mam bulam jipaq taab nyumwb boog nukun.

⁷ Hoqgab Gajag bvly aoho ngo wm ak rwlwq tayin, hoo mwnwg atorb cwwgwnanam guiyum tayin.

⁸ Asdod hoqgv doonbo tulungam mutum tayin, hoo Askelon hoqgv hiyv mwv lvpw atwg beqnyiangam bwwl doogdvn; Ekronnam ngoqg alaqkv ceekol jwwtayin, hoo Palistanwg boumnam tulungv yuupaq tayin,” At Sw Pwnbo bedo.

⁹ ‍Soq sib At Sw bedo: “Taiyarg luum go nyixaqnam gab, hoo lwpy deenam gab laqm-baqm deenam mam ngo nookur kuram, hoggab nyi mwlwngam bulv Idom mam jilwq kunum, hoo vbw-bor gob birnam mam mwwpa kumanum.

¹⁰ Hoggab Taiyarg bvly aoho ngo wm ak rwlwq tayin, hoo hoqhv mwnwg atorb cwwgwnanam guiyum tayin.

¹¹ ‍Soq sib At Sw bedo: “Idomg luum go nyixaqnam gab, hoo lwpy deenam gab laqm-baqm deenam mam ngo nookur kuram, hoggab mwwg vbw-boram mwv lyoqr orioq bvvtwl ruqmin gvnum hoo aya mwwpanam mam ludum kunum, hoo mwwg haaxaqnamv vcjaqb xoqyul doonum, hoo mwwg hang lingtwrnam mam nwrba gob mwv pvvnum.

¹² Hoqgab Teman aoho ngo wm ak rwlwq tayin, hoo hoqhv Bojrag atorb cwwgwnanam guiyum tayin.

¹³ ‍Soq sib At Sw bedo: “Ammon nyi tulug luum go nyixaqnam gab, hoo lwpy deenam gab, laqm-baqm deenam mam ngo nookur kuram, hoggab bulug nyook vrram bulv taqt dvb mvdwb, Gilead ho bulv ko gvnbo nyem kepongam padeq-paiyeq pakun,

¹⁴ Hoqgab Rabbag bvly ho ngo wm ak tolwq tayin, hoo hoqhv mwwg atorb cwwgwnanam guiyum tayin, nyob pady aalam sogoqnam hvb, cwkeq-lemeq dooi yid aalam doogum dooi ak wnam hvb;

¹⁵ hoo bulug lvpw atv, mwv la mwwg ko tuup tulungv lvkin gob nyuum wtayin,” At Sw bedo.