2 JON 1 - DVRWQ PVVB

Kristan Dvn Akam la Mwnwg Ko Tulungam Xeqnam

¹ Nyiixa bo Nyi Ak hoqgv- Ngoqg tumanam jvqtw jaqb abynam dvn no hoo ko tulu, ngo aro twqma, hvbmabde jvqtwngam cengnbo mwlwngv nulam abydvn.

² Hoggab jvqtwngv ngulug urasi doodwn, ho kol godab soq si nwrba gob ngulug lvgab dootayin.

³ Pwnbo Abwg la Abwg Ko Tuup Jisu Kristog anyangam la swrsomalongam ngulam jit beka, hoo jvqtwngv la abynamv ngul gab doonka.

Jvqtwngv la Abynam

⁴ Ngulug ko tulungam Pwnbov ngulam jinam hvbkalam jvqtwngam bugil hoq uraho doonam mam kaapa tvl ngo hemp al mwwpanum.

⁵ Hoggab tumanam dvn, ngo nam begyin, ngul mwlwngv akwn akwn aby bomin suto. Soq ngoqg xeqg dvnsi gaml nit ma, hvbmabde kol galoqkv ngulug dooky gvnamv.

⁶ Soq ngoqg begdvn abynam pagoq si ngulv Pwnbog gaml tulungam tal bugil swwky dvb nyidwn. Kol galoqkv nulv tapanam gamlv si, nul mwlwngv abil swwto.

⁷ Jisu Kriston nyiib nyitwl haan mvk hvl bel xaalyo bo nyiv vigo gvda gvt si swwrab nyapa ku, hoggab Jisu Kriston svk nyiv xaalyo bov hoo ceebio hang baqnbov.

⁸ Hoggab nulv atv atv hvvmin gvdwl hengab nyiato, hvbmabde atv atwg nyijongam niim mvma dvb ham bumpwb naadwb hengab to.

⁹ Hiyv Kristog tomswrnam mam tal doog maanbov, ham pvvb juqbo bo nyi akv mwv Pwnbog ma, hvbmabde hiyv tomswrnam mam tal doodwn mwv Abam la Ko Tuupam doogdvn.

¹⁰ Hoqgab, hiyv akgon nulug nammwb haaikam soq tomswrnam sam bulug lvgab haag mabnyiloqkam, nulv mwam svgagvrwq maadwn, hoo “Swrsomalongv noqg lvgab doonka,” hvlkam bemab.

¹¹ Hoggab hiyv mwam swrsomalongv hvl mwwnbo akv mwwg almanbo nyis tulungam nyikho mwv nyiba dvn.

Svxin Benam Agam

¹² Ngo nulam besv vigo doos do, hvbmabde ngo ham pota rooxob xiqnw ma, hvbmab ngo nulug dookub nulam kaatab wgdvl nyiipv atv goodwb mwwdwn, hoomo lo hemp altayin.

¹³ Ngoqg tumanam bwrmwg ko tulungv nam alwb dootka hvdo.