MIKHA 1 - SURAT BARASIH BARITA BAHALAP

¹ Mikha asale bara lewu korik arae Moreset. Hong jaman tanah Yuda irentah awi Raja Yotam, Ahas tuntang Hiskia, Mikha manarima auh peteh Tuhan tahiu Samaria tuntang Yerusalem.

Auh tatum akan Samaria tuntang Yerusalem

² Keleh hining o kare bangsa! Seneh o kare oloh hapus kalunen. Tuhan Pangkahai dumah malawan keton samandiai! Keleh hining Ie hakotak bara human Aie je barasih hong sorga.

³ Ie mohon bara eka je barasih tuntang mananjong intu kare tantan bukit hong kalunen.

⁴ Kare bukit lenyoh penda tatap pain Aie sama kilau lilin huang apui je hanyala; petake balasut tame akan kare janah, kilau danum hunjun bukit mahasor akan penda.

⁵ Kakare taloh te kareh manjadi awi oloh Israel badosa tuntang marisang malawan Hatalla. Eweh je mambuku Israel mawi dosa? En dia Samaria lewun rajae te kabuat? Eweh je mawi sabab Yuda menyembah hampatong dewa? En dia Yerusalem kabuat?

⁶ Tagal te Tuhan hamauh, “Aku kareh mawi Samaria manjadi tuyok ramon huma je baduroh intu janah, tuntang eka oloh mimbul batang anggor. Tuyok kaduroh lewu te kareh inganangku akan janah, tuntang kare galange kareh iungkar-Ku.

⁷ Kare hampatonge je barega kareh impahancor-Ku. Tuntang kare ramo je inenga akan kare oloh bawi je bagawi huang human dewa kareh imapui, tuntang kare hampatonge inusul. Kare ramo te iete hasil sombayange akan dewa kasiwoh. Toh kakare taloh te kareh iunda awi kare musohe akan parapah tarimakasih akan kare dewan ewen.”

⁸ Awi te, aku, Mikha, kapehe atei tuntang bakotok. Aku kareh mananjong dia hapakaian tuntang dia basandal uka mamparahan kahain kapehen ateiku. Aku kareh mangaung sama kilau sarigala tuntang manarahing sama kilau burong onta.

⁹ Basa kare himang Samaria dia tau impakeleh, tuntang Yuda kareh buah calaka je kalote kea. Kapehe jari sampai Yerusalem, lawang petak danum bangsa ayung-Ku.

Musoh tokep sampai hong Yerusalem

¹⁰ Ela mansanan akan kare musoh itah intu Gat tahiu calaka je buah itah; ela manalua ewen mite keton manangis. O oloh lewu Bet-Le-Apra, galing arep keton intu kawo kilau tanda keton bageto kaharap!

¹¹ Keton oloh Sapir, lius akan eka tawanan sambil halowai tuntang mahamen! Kare oloh Saanan dia bahanyi balua bara kotan ewen. Tangkariak oloh lewu Bet-Haesel mamparahan akan keton je intu hete jaton eka bakalindong tinai.

¹² Calaka bara Tuhan jari sampai lawang Yerusalem! Awi te, dia bakae oloh Marot maharap pandohop.

¹³ Keton oloh lewu Lakhis, kepan kuda intu kareta parang! Keton manyonto kare dosa je ilalus intu Israel sampai mawi Yerusalem kea badosa.

¹⁴ Toh, o oloh Yuda, lewum je bagare Moreset-Gat kareh nihau. Kare raja Israel dia kareh mandino pandohop tinai bara lewu Akhsib.

¹⁵ O oloh Maresa, Tuhan kareh manyarah ikau akan musoh je handak mampakalah lewum. Kare pamimpin oloh Israel je marentah kareh manyahokan arepe intu kare guha hong Adulam.

¹⁶ O oloh Yuda, keleh manggundul takolokm kilau tanda kapehen atei akan kare anakm je inyintam. Keleh manggundul takolokm sampai halongah sama kilau burong panguman hantu, awi kare anakm kareh iunda akan eka tawanan.