Maktub ne Pol kya̰ gɨ Tit 1 - Ɛrgɨ Ɓani

Lapya

¹ Yin Pol, Ndɨla na wo tɨ cida la Jesu Krist na wo tɨ tomni la jo ən kya̰ maktub ne gɨ yim Tit. Ndɨla toon ən ka ən hina na bi ne ər ɛr a tɨ hul kula. La ka a una mum tɨ ɓla ne kuri ne ɓla gɨ ī ul mu tɨ tɨm tugla na Ndɨla,

² nɨ ka a kay a ho̰ni tɨ Ndɨla na gṵ ne ər ha̰w toni tɨ mum lɔ ɗula tuna tɨm jili na kwi sul. Yḭr tɨ wo ne ər ka ɓura lo,

³ Ər ɓla ər jaa tɨ bayri na ər lula sul na beel tɨ Jaa Ndinimani ne ər ɗol gɨ ən, na Ndɨla may wo tɨ ī nina hul laar.

⁴ Ən kya̰ maktub ne gɨ yim Tit, ən ɓa̰ ne kuri na ul mu tɨ hul kula ne hari i tɨ paa. Ka ī Ba tɨ Ndɨla la Jesu Krist wo tɨ ī nina la, ka gɨ əm barka la naa gɨ əm lapya la.

Tit na cida tɨ Krɛt

⁵ Ən nɨm əm tɨ kɔli sul tɨ Krɛt nɨ ka əm hun cida mu ne gə̰y. Əm kay bi nii tɨ bi tɨ hul kula ne wo tɨ lwərgɨ nii hul gun sul, kuna jaa ne ən jaa gɨ əm.

⁶ Wo tɨ bi sul sula ɓə tɨm wo ne a ɓə jaa ɗula tɨ ər sul lo, ər ɓə tɨm wo tɨ ii ɓudu la, ər ɓimi ɓə tɨm ɓimi tɨ hul kula, ne wo ɓə jaa tɨ mum kar kir-kir ɗula tɨ a sul lo la, tuna a hormo̰ tɨ kar sul lo la.

⁷ Wo tɨ bi tɨ hul kula sul sula ɓə tɨm wo ne wo ɓə jaa ɓa̰ in ɗula tɨ ər sul lo, kəysul ər tɨ wo tɨ ji kay tɨ Ndɨla na bi lɔ, ər ɓə tɨm wo tɨ ndula ɓla lo la, wo tɨ hul laa lo la, ər ɓə tɨm ha̰r tɨ haam maan lo la, wo tɨ sal bur lo la, ər ka tɨm wo tɨ gursu taam na ji bwi ne wur kaar tɨ ər sul lo la.

⁸ Lɛ ər ɓə tɨm wo tɨ bi ɓoy par ndinimani la, ər ɓə mum ndinimani kum kar la, ər ɓə tɨm wo ne na ilgɨ ɓari la, ər ɓə tɨm wo tugla la, ər ɓə tɨm wo ndeeri tɨ Ndɨla kwi la, ər ɓə tɨm wo tɨ hul par tɨ ndɔ sul la,

⁹ ər ɓə tɨm wo ne ɓə Jaa kuri par ɓari tɨ ər hul kuna a edɨ gɨ ər la, ər ɓə lɛm ɓər wur tɨ ər peer hul na wa̰y tɨ ɓla ndinimani la, ər ɓə lɛm bi ne ɗo gɨ ər tɨla tɨ ər ul sul dwari ha̰w la.

Bi tɨ mum ɓijim edɨ

¹⁰ Bi dɨbla tɨ Juyb ton ko hul daan tɨ bi ton a hormo̰ ɓa̰ ndḛni in tɨ jaa kuri hul in lo. A tan bi na jaa dɨbla bla ji ne wag tɨ a mu.

¹¹ Ka a hoon a mu tɨ jaa ton sul, kəysul a yunga nimni lɔ gun na mum tɨ ɓla ne hiina a ɓə ɓla lo, tɨ na gursu ne wur kaar tɨ a sul tina.

¹² Wo ɓudu paa tɨ a daan, ne a ləg ər kuna nebi ja ɓə: «Bi tɨ Krɛt tɨ bi ɓori yɔd, a tɨ yəm kalɔ ɓijim la, bi tɨ ndoor la, gurmaan la.»

¹³ Jaa ne ər ja tɨ kuri, nejo əm meer-a na gṵ sɨgra nɨ ka a ko hul ne kuri.

¹⁴ La a ka a tulɔ kay tɨ Juyb-a na maani ɓori lɔ lo la, a ka gṵ tɨ biɓari maan ne jang ɓag na kuri lɔ sul lo la.

¹⁵ Mum gun ndeeri gɨ bi ne ndeeri la. Lɛ wa̰y ne ndeeri gɨ bi ton wur ndɔ tɨ loni hul la a hul sɨgra in teni la, A wa̰y tɨ una la, a ilgɨ la gun tɨ loni.

¹⁶ A ɓla a ndɔ ɓə ya̰ tɨ bi tɨ Ndɨla una, lɛ a sula ər sul na a mum tɨ kar. A mum tɨ kar laar ndɔ lo la, a yiga a ɓəgri a naa gɨ Ndɨla. A lɛm wa̰y ndinimani ɓudu in kar lo.