Wa̰y ne ɓla ndɔ tɨ bayri 1 - Ɛrgɨ Ɓani

Jaa sul

¹ Maktub ne ja jaa tuna mum kuru ne Jesu Krist jul lɔ tɨ bayri. Ndɨla jo ɓla gɨ ər kuri ton lɔ nɨ ka ər ɓla gɨ ər bi tɨ wa̰y edɨ wa̰y ne wo hina ndog. Tɨ nejo Jesu toon ər malayka ka ər jul mum ton lɔ gɨ ər wo tɨ tomni Ja̰.

² Ja̰ tɨ timo̰ tɨ Ndɨla beel ɗula hul la ər tɨ Jesu Krist na timo̰ na mum gun ne ər ləg tɨ kuri.

³ Ndula laar gɨ wo ne edɨ maktub ne tuna mum ne wo hina gaana sul. La bi ne laa jaa ne la a oy la! Kəysul lula sul ne mum ton wo paa kar tɨ ndog.

Jaa tuna bi ne do sul tɨ paa lɔ kili na Krist ndil

⁴ Yin Ja̰, ən kya̰ maktub ne gɨ yḭ Krist na bi lɔ kili ne i do i sul tɨ paa tɨ lwərgɨ tɨ un ɓəgri tɨ nəgri sul tɨ Asi. ka barka tɨ Ndɨla ne ti toni tɨ mum tɨ ɗula kwi la, ne ti kakamle la, ne ti na kwi la, ta Lal kili ton ti tɨ ər goblə tɨ waan kwi la gḛy na i.

⁵ La ka Jesu Krist wo tugla tɨ jaa ji la, wo tɨ toni mani ne wag tɨ bi tɨ ulu daan la, wa̰ay tɨ woom maan tɨ nəgri sul la, naa gɨ i ɓari lapya la. Jesu Krist ne ka ī kum la ər wura i tɨ ɓijim hul na ər hima la.

⁶ Tɨ yḭr jo ər wur i tɨ Ndɨla waan hul. Ər ka yi bi tɨ cida tɨ hima ɓina tɨ ər Ba tɨ Ndɨla maan. Ka taan la dwari la ley tɨ ər sul an na an. Amin!

⁷ Yḭ ləg, ər wo hina tɨ goblə daan la jakaw ɓə ər ləg na ji, ya̰ bi ton a kura ər taal kaw a ɓə ər ləg la. Bi kalɔ gun tɨ lɔr nəgri sul ɓə ngɨnɨm par yḭr jaa. Tɨ kuri! Amin!

⁸ Baali Ndɨla ja ɓə: «Yin tɨ wa̰y sul la, wa̰y lɔ tɨ tong la», wo tɨ toni mani la, wo tɨ pla mani la. Yin tɨ wo ne ti toni tɨ mum tɨ ɗula kwi la, ən ti kakamle la, ən ti na kwi la, ən wo hina la, ən tɨ wo tɨ dwari ɗəng ne ura peer gun la.

Krist ɓla ji gɨ Ja̰

⁹ Yin Ja̰, i ɓun la i paakɔr tɨ pɛw hul tɨ Ndɨla waan hul la, tɨ hul par sɨgra hul na ī paa hari na Krist. Ən wo tɨ kɔli sul tɨ Patmos Ndɨla jaa ne ən ɗo ər beel la jaa kuri ne ən ja tuna Jesu sul la.

¹⁰ Ɗa̰y ne, tɨ ɗa̰y tɨ Baali maan, Lal ɓari jir tɨ ən sul nɨ ən laa wo gṵ na dwari tɨ ən ɓəgri kuna hudong.

¹¹ Gṵ ne ja gɨ ən ɓə: əm kya̰ mum ne əm ləg tɨ maktub hul, la əm toon gɨ bi tɨ hul kula lɔ kili ton le: Epes la, Esmir la, Pergam la, Tyatir la, Sardɛs la, Piladelpi la ta Lawdise la.

¹² Ən yiga ən ndula tɨ ləg pay jajo ja gɨ ən jaa gɨna, ən ləg sɔgɨ kili ne a kaaw na daab,

¹³ la tɨ sɔgɨ ton daan, ən ləg wa̰y paa wag paa na Wo Ɓa̰. Ər wur ngɔmi baw ne jir tɨ ər ɗa̰y tan ɓəgri la ər ɓəw krab ne a ka na daab tɨ ər tən.

¹⁴ Ər sul la ər sul ɓuyn la, buy kar-kar kuna bagta. Ər ji ko laa kuna laa ndila no̰.

¹⁵ Ər ɗəygɨ ti kuna ira ne wo hur tɨ man laa la, ər gṵ cḛy kuna ndu ɗəng na nig.

¹⁶ Ər par meri kili tɨ ər daa tɨ lɨma, kaskar ne mu njolum la ər taal tɨ ndidi li ka lɨma wag tɨ ər mu, ər ji ley kuna lula tɨ tili daan cadada.

¹⁷ Gorne ən ləg ər gɨna, ən tɨba tɨ ər kwi kuna ulu no̰. Ər kay ər daa tɨ lɨma tɨ ən sul la ər ja gɨ ən, ka ayri kar lo kəysul, yin tɨ wo tɨ toni mani la, wo tɨ pla mani la. Ən tɨ wo jili.

¹⁸ Toni, ən tɨ wo tɨ ulu lɛ, ndogle ən ti jili na kwi. Ən na dwari tɨ ulu sul la, tɨ bi tɨ ɓejere sul la.

¹⁹ Əm kya̰ mum gun ne əm ləg, mum ton tɨ daamu le la, ton ne wo paa kar gaana la.

²⁰ Tuna meri kili ne əm ləg tɨ daa tɨ lɨma sul la sɔgɨ kili ne a ka na daab gɨna, jaa ne tuna a sul jo le: Meri kili tɨ malayka ton so bi tɨ hul kula ne do sul tɨ paa lɔ kili sul. La sɔgɨ kili tɨ bi tɨ hul kula ne do sul tɨ paa lɔ kili la.