Pilemo̰ 1 - Ɛrgɨ Ɓani

Lapya

¹ Yin Pol, ne a ɗo ən tɨ dangay Jesu Krist jaa, la Timote ī ɓun, i kya̰ maktub ne gɨ yim Pilemo̰ i paa kɔr la i paa tɨ cida la.

² Gɨ bi tɨ hul kula ne tay peer tɨ əm gə̰y la, gɨ Apya ī ɓun tɨ ii la, Arsip, ī paa tɨ sal muna la.

³ Ka ī Ba tɨ Ndɨla la ī Baali tɨ Jesu Krist la naa gɨ i ɓari la lapya la.

Pilemo̰ na bi kum kar la ər hul kula la

⁴ Ən ka gɨ Ndɨla barka na ɗa̰y sul əm jaa gorne ən wo Ndɨla soon,

⁵ kəysul ən laa ɓə əm ka bi ndeeri ne ko a hul kum la əm ko Baali tɨ Jesu Krist hul la.

⁶ Ən ɓiri Ndɨla, ka əm hul kula ne ɓəw əm na yini toy ji tɨ əm ndɔ, nejo bi gun ɓə ɓari ne yi ten na Jesu Krist una.

⁷ Ən ɓun, əm kum kar naa gɨ ən ndula laar dɨbla la wur gɨ ən ɓər la, kəysul əm naa dwari gɨ bi ndeeri gun ne ko Ndɨla hul.

Pol ɓiri Pilemo̰ Onisim jaa

⁸ Tɨ nejo, na ul mu tɨ Krist maan, yin na dwari tɨ gɨ əm jaa dɨbla ne ɓə əm yaar jaa lɛ,

⁹ ən ɓiri əm na kumkar ndil, kuna yin Pol, wo hiini, ne a par ən tɨ dangay Jesu Krist jaa.

¹⁰ Ən ɓiri əm ka əm hul ɗina əm tɨ Onisim sul. Ər ti kuna ən ɓa̰ ne ən toy ər tɨ dangay na Jesu Krist ndil.

¹¹ Toni, ər wag wa̰y tɨ əm ji lo, lɛ ndogle ər ɓə yim la yin la yaar.

¹² Ən toon ər gɨ əm, yḭr ti kuna ən ndula ya̰m taal ɓudu.

¹³ Ən ɓə lɛm ər par tɨ ən ndɔ gorne ən wo tɨ dangay Jaa Ndinimani jaa, nejo ər ɓə ən yaar tɨ əm mu gor.

¹⁴ Lɛ ən lɛm kar in bla əm gṵ ɓiri lo, tɨ əm ɓari kar yuga lo, lɛ ka ti əm hul laar.

¹⁵ Kəysul ma Onisim nɨm əm na lula sul ɓa̰ ndḛ ngoy, lɛ ndogle ər ɓə na əm tɨm marway.

¹⁶ Kəysul ndogle, ər tɨ ha̰r ngoy lo, ər ura ha̰r: Yir tɨ əm paa tɨ hul kula ne ndinimani. Ən ka ər kum nari, lɛ yim əm ɓə ər kum kar dɨbla na ul mu tɨ nimni la, na Baali ndil la.

¹⁷ Jo əm una ən kuna əm paa kɔr a, par ər tɨ əm ndɔ kuna əm par na yin la.

¹⁸ Jo ər ka gɨ əm ɓijim ɓee ər na hula tɨ gɨ əm səng gɨna, tɨ yin jo ən ɓə gɨ əm səng.

¹⁹ Lɛ tɨ yin Pol, jo ən kya̰ maktub ne na ən daa: Ən ɓə gɨ əm səng. Lɛ ən taam əm ho̰ni jani ɓə yim kaw əm na wa̰y tɨ gɨ ən səng lo.

²⁰ Tɨ ɓari, ən ɓun, ən ka gɨ əm kɔgri, əm ka wa̰y ne ən ɓiri əm kuna ən paa tɨ hul kula. Wur gɨ ən ndula laar na Krist.

²¹ Gorne ən wo maktub ne kya̰ ən una ɓari ɓə əm ɓə wa̰y ne ən ɓiri əm tɨ kar, əm ɓə kar ne ura.

²² Wa̰y jak cam, əm kaaw li paa tɨ ən ɓoy par. Kəysul ən kay ən ho̰ni, na ul mu tɨ i Ndɨla soon, Ndɨla ɓə gɨ ən ul mu təng tɨ duga tɨ i ndɔ.

Lapya

²³ Epapras ne wo tɨ dangay na ən Jesu Krist jaa ka gɨ əm lapya,

²⁴ Mark la, Aristark la, Demas la, Luk la ne tɨ ən peer tɨ cida ka gɨ i lapya la.

²⁵ Ka Baali Jesu Krist na barka gə̰y na i!