Jaa Ndinimani ne Luk kya̰ 1 - Ɛrgɨ Ɓani

Jaa ne wo tɨ Jaa Ndinimani ne hul jo le

¹ Teopil, kuna toni bi kya̰ maktub tuna mum ne ka paa tɨ ī daan.

² A kya̰ kuna bi ton lor tɨ jaa ji tɨ mum lɔ ɗula la a duga bi tɨ Ndɨla jaa beel ɗula la.

³ Nejo yin kaw, gorne ən jira mum ne lɔ ɓari gɨna, ən taam kya̰ na ul, ul, gɨ yim Tehopil ne əm ndil cḛy nari.

⁴ Ən ka kuna ne ka əm una ɓə mum tɨ ɓla ne əm ten toni tɨ jaa kuri.

Malayka paa ja jaa tuna Ja̰ Batis na twila sul

⁵ An ne Erod tɨ wa̰ay tɨ Jude, wo tɨ hima ɓina paa ndil ɓə Jakariya. Yḭr tɨ Abiya na kakur. A tɨ bi tɨ hima ɓina. Ər ii tɨ Aro̰ na nimni. Ər ndil ɓə Elijabet.

⁶ A ji tɨ ndidi gun a tɨ bi tugla tɨ Ndɨla kwi. A oy Baali na gṵ hul na ɓari la a ka mum ne ər hul taam la.

⁷ Lɛ a na ɓa̰ lo, kəysul Elijabet tɨ ii sawru la a tɨ hiini teni la.

⁸ Ɗa̰y paa, Jakariya si tɨ Ndɨla kwi tɨ ər cida tɨ hima ɓina kar, kəysul ɗa̰y ne tɨ ər kakur na ɗa̰y tɨ cida kar.

⁹ Tuna bi tɨ hima ɓina na ul tɨ cida, marɨm tɨba tɨ ər sul tɨ wur tɨ Baali na li hul tɨ gɨ ər dukan tuglu.

¹⁰ Na lula sul ne a wo dukan tuglu gɨna, bi dɨbla lor tɨ bayri, a wo Ndɨla soon.

¹¹ Gɨna Baali na malayka paa wag tɨ Jakariya sul. Ər ti tɨ un ne a tugu na dukan tɨ lɨma sul.

¹² Gorne Jakariya ləg ər gɨna, ər sul tɨ tugla lo, kəysul ayri ɗəng kar ər.

¹³ Lɛ malayka ja gɨ ər: «Jakariya, ka ayri kar lo, kəysul Ndɨla laa əm gṵ tɨ ər soon: Əm ii tɨ Elijabet ɓə gɨ əm ɓa̰ ɓər twila la əm ɓə ər ndil kay ɓə Ja̰.

¹⁴ Ər ɓə tɨm əm wa̰y tɨ ndula laar ɗəng kar la, bi dɨbla ɓə ndula laar kar tɨ ər twila jaa la.

¹⁵ Kəysul ər ɓə tɨm wo ɗəng tɨ Baali Ndɨla kwi. Ər ɓə ham yiḭ lo la ndu na ham ho̰ni yiḭ lo la. Lal ɓari ɓə lɔ ɗula tɨ na ər tɨm tɨ ər twila hul.

¹⁶ Ər ɓə na bi tɨ Israhel dɨbla duga tɨ a Baali tɨ Ndɨla ndɔ.

¹⁷ Ər ɓə cida kar tɨ Ndɨla kwi na nebi Eli na ilgɨ la ər dwari la. Ər ɓə ɓimi-a na bəgɨ kay tɨ paa la ər ɓə bi ton oy gɨ Ndɨla lo nirimu yɛr, ka a ilgɨ kuna bi tugla no̰ la. Nejo, ər ɓə bi nirimu yɛr ɓari gɨ Baali.»

¹⁸ Lɛ Jakariya ja gɨ malayka ɓə: «Kəy wa̰y jo ɓə gɨ ən ɓla ɓə əm jaa tɨ kuri a? Kəysul yin tɨ wo hiini teni la ən ii kaw an tɨ dɨbla teni la.»

¹⁹ La malayka duga gɨ ər: «Yin tɨ Gabriyel, ən lor tɨ Ndɨla kwi tɨ ər gṵ hul kar, ər toon ən tɨ gɨ əm ja jaa la, tɨ gɨ əm Beel Ndinimani ɗula la.»

²⁰ Əm laa ɓari, əm mu ɓə ɓogɨ, la əm ɓə jaa ja lo marway ɗa̰y ne mum ne ɓə paa kar, kəysul əm ko jaa ne ən ja gɨ əm hul lo. Kuri mum ne ən ja gɨ əm ɓə an gorne a lula sul ɓə lɛm.

²¹ Lula sul ɗay, bi a̰y Jakariya la ɓɔr a ji la, kəysul ər mu tḭ nari tɨ Ndɨla li hul.

²² Lɛ gorne ər wag, ər lɛm gɨ a ja jaa lo, la bi una ɓə ər ləg wa̰y paa tɨ Ndɨla li hul. Lɛ yḭr gɨna, ər ja gɨ a jaa na ər daa kəysul ər mu ɓogɨ.

²³ Gorne Jakariya tong ər ɗa̰y tɨ cida kar gɨna, ər duga tɨ gə̰y.

²⁴ Lɔ tɨ plaa, ər ii tɨ Elijabet yen ɓa̰, ər wal ər ndɔ pya̰ tɨ luni, la ər ja ɓə:

²⁵ «Nejo tɨ wa̰y ne Baali ka gɨ ən: Ər so ər hul na ɗa̰y ne tɨ kaar jul tɨ ən sul tɨ bi kwi.»

Malayka ja jaa tuna Jesu na twila sul

²⁶ Na pya̰ tɨ taar hul tɨ Elijabet na ɓa̰ yina bəgri, Ndɨla toon ər malayka ne ndil ɓə Gabriyel tɨ nəgri sul tɨ Galile, tɨ lɔr ɗəng ne ndil ɓə Najarɛt,

²⁷ tɨ ɓa̰ ii ne ɓər paa ndil ɓə Josep caw ər ndɔ. Yḭr tɨ Dabid na kalɔ, ɓa̰ ii ne Ndil ɓə Mari.

²⁸ Baali Ndɨla na malayka wur tɨ ər maan la ər jaa gɨ ər: «Ka əm ndula laar əm! Ndɨla ka gɨ əm ɓari, ər ti na əm.»

²⁹ Jaa ne ɓɔr Mari ji nari la ər ɓiri ər ndɔ tuna lapya ne ər ka gɨ ər le sul.

³⁰ Ndɨla na malayka ja gɨ ər: «Mari, ka ayri kar lo, kəysul Ndɨla ka gɨ əm ɓari nari.

³¹ Ndogle, əm ɓə ɓa̰ yina la əm ɓə ɓa̰ ɓər twila la. Əm ɓə ər ndil kay ɓə Jesu.

³² Ər ɓə tɨm wo ɗəng la a ɓə ər soon Ndɨla baw ɗəng na ɓa̰ la. Baali tɨ Ndɨla ɓə gɨ ər ka tɨ Dabid na waan naa.

³³ Ər ɓə waan lɨma tɨ bi tɨ Israhel sul la, ər waan mu ɓə tong lo.»

³⁴ Mari ja gɨ Ndɨla na malayka ɓə: «Wa̰y ne ɓə an waa waa a, kəysul ən una ɓər lo ɗang.»

³⁵ Ndɨla na malayka ja gɨ ər: «Ndɨla na Lal wo jir tɨ əm sul la Ndɨla baw na dwari ɓə əm kubgɨ kuna lal la. Nejo a ɓə ɓa̰ ne əm ɓə twila soon wo ndeeri tɨ Ndɨla maan la Ndɨla na ɓa̰ la.

³⁶ Əm paa nimni tɨ Elijabet ne tɨ wo hiini, wo ər ɗa̰y tɨ ɓa̰ twila a̰y la. Yḭr ne a soon ər ii sawru, ər yen ɓa̰ ka pya̰ tɨ taar teni.

³⁷ Kəysul wa̰y ne ɓə Ndɨla dwari ura teni.»

³⁸ Gɨna Mari ja: «Yin tɨ Baali na wo tɨ cida kar, ka wa̰y ne əm ja kum an tɨ ən sul.» La Ndɨla na malayka nɨm ər la.

Mari si tɨ Elijabet maan

³⁹ Na ɗa̰y tɨ pla, Mari so ul, ər si sandaw tɨ lorgɨ ton ti tɨ lɔr nəgri sul tɨ Jude.

⁴⁰ Gorne ər an gɨna, ər wur tɨ Jakariya na jal hul la ər ka gɨ Elijabet lapya.

⁴¹ Gorne Elijabet laa Mari na lapya tɨ kar gɨna, ɓa̰ ne wo tɨ ər hul dig ndɔ. Ndɨla na lal sir ər hul

⁴² ər ka ngɔr tɨ ndal ɓə: «Ka Ndɨla jul mu tɨ əm sul ura aa gun la, ər mu jul ley tɨ ɓa̰ ne wo əm hul sul la!

⁴³ Yin wag ən maan kəy ta ən Baali na na̰ hina tɨ ən maan a?

⁴⁴ Kəysul, əm ləg, gorne ən laa əm lapya tɨ kar gɨna, ɓa̰ ne wo tɨ ən hul dig na ndula laar la.

⁴⁵ Ndula laar ɗəng gɨ əm kəysul əm ko hul ɓə wa̰y ne Baali ja gɨ əm ɓə an!»

Mari na kwan

⁴⁶ Gɨna Mari ja ɓə: «Ən wur taan na ən ndula ya̰m gun tɨ Ndɨla sul,

⁴⁷ La ndula laar sir ən ilgɨ ən Baali wo tɨ ən nin jaa

⁴⁸ kəysul ər ɗo ər ji tɨ yin, ər wo tɨ cida kar na hormo̰ sul. M, ndogle marway tɨ kwi, bi gun ɓə gɨ ən ja ɓə, ndula laar tɨ ən maan,

⁴⁹ Kəysul Ndɨla wo tɨ dwari ɗəng ka gɨ ən mum ne ɓɔrji dɨbla. Yḭr tɨ Ndɨla ne ər ndeeri gun,

⁵⁰ ər ka ɓari na lula sul gɨ bi ne oy gɨ ər.

⁵¹ Ər ɓla ər dwari na mum gun ne ər ka. Ər bra bi ton ilgɨ ɓə ya̰ tɨ bi nga̰.

⁵² Ər jir woom tɨ a goblɨ tɨ waan sul lɛ ər uma bi tɨ hormo̰ kar tɨ ndal.

⁵³ Ər naa gɨ bi tɨ ndula mum tɨ tina dɨbla lɛ, bi tɨ wani gɨna, ər kun a daa bla. la ər huma bi tɨ hormo̰ tɨ ndal la,

⁵⁴ Ər hina, ər yaar bi tɨ Israhel, ər bi tɨ cida kar. Ər tori ər ɓari tɨ kar

⁵⁵ na Abraham-a na ər kalɔ lo yɔd kuna ər so ər gṵ gɨ ī kəgɨ.»

⁵⁶ Kwan ne bəgri a, Mari ti na Elijabet na pya̰ tɨ teri hul, la ər duga ər si tɨ ər gə̰y la.

Ja̰ Batis na twila

⁵⁷ Lula sul an ne Elijabet ɓə ɓa̰ twila la ər toy ɓa̰ ɓər.

⁵⁸ Ər peer tɨ ləgɨ taal la ər peer nimni la, una ɓə Baali ka gɨ ər wa̰y ndinimani la a ka ndɔ laar na ər la.

⁵⁹ Na ɗa̰y maarta, a hina tɨ ɓa̰ cina ɓina. A taam gɨ ər ba na ndil tɨ Jakariya wur.

⁶⁰ Lɛ ər na̰ ja: «M-m a ɓə ər soon Ja̰.»

⁶¹ A ja gɨ ər: «Wo in tɨ əm nimni hul na ndil ne lo!»

⁶² Gɨna a ka a daa gɨ ər ba tɨ ɓiri pay kəy ndil jo ər taam gɨ ər ɓa̰ naa a?

⁶³ Jakariya ɓiri-a ka a naa gɨ ər baar. Gɨna, ər kya̰ wa̰y tɨ nin ɓə: «Kuri, Ja̰ tɨ ər ndil.» Ɓɔr a ji gun.

⁶⁴ Tɨ daamu, Jakariya na mu təng la ər teen Ndɨla la.

⁶⁵ Gɨna ayri ka ər peer tɨ ləgɨ taal gun, la bi ja jaa tuna wa̰y ne ka paa tɨ lwərgɨ nəgri tɨ Jude ne ti tɨ nan sul.

⁶⁶ Bi gun ton laa jaa ne ɗolɔ tɨ ilgɨ tɨ jaa ne sul. A ɓiri a ndɔ ɓə: «Ɓa̰ ne ɓə kəyjo wag a?» Kəysul Baali na dwari ti na ər.

Jakariya na kwan

⁶⁷ Ndɨla na Lal ti na Jakariya, ɓa̰ ba. Ər ɗolɔ tɨ ja jaa kuna Nebi. Ər ja ɓə:

⁶⁸ «Ka yi teen Baali, Ndɨla tɨ Israhel maan, kəysul ər hina ər bi yaar la a nɨm tɨ ndal la.

⁶⁹ Ər naa gɨ ī wo tɨ ī nina ne na dwari ɗəng tɨ wa̰ay Dabid, ər wo tɨ cida kar nimni hul.

⁷⁰ Nejo tɨ jaa ne ər ja toni ɓagcagri na ər nebi ndeeri mu.

⁷¹ Ər ha̰w ər gṵ tɨ ī jul tɨ ī peer tɨ pɛni daa la tɨ bi gun ne koor ī daa la.

⁷² Ər ka gɨ i kəgɨ ɓari la ər tori ər ɛrgɨ ndeeri ne ər ka na i kəgɨ lo.

⁷³ Kəysul Ndɨla so gṵ naa gɨ ī kaa tɨ Abraham

⁷⁴ tɨ ī kula tɨ ī peer tɨ pɛni daa la tɨ ī ul mu naa tɨ gɨ ər cida kar bla ayri la,

⁷⁵ ka yi ndeeri la i ti tugla la tɨ ər kwi na ɗa̰y sul ne ɗang i ti jili.

⁷⁶ Lɛ yim, ən ɓa̰, a ɓə əm soon Ndɨla baw na nebi, kəysul əm ɓə saal tɨ Baali kwi tɨ ər ul kaaw,

⁷⁷ la ər bi una ɓə ər hina tɨ a nina. Nejo ər hul ɓə ɗina tɨ a ɓijim sul la.

⁷⁸ Tɨ Barka tɨ i Ndɨla na hul bor jo, lula wag tɨ ndɨlasul ndeeri un tɨ i sul.»

⁷⁹ Ər ɓla ər ndɔ gɨ bi ton ti tɨ un ɗoyri la bi ton ti tɨ ɓejere la. Tɨ i kwi jul tɨ ul sul tɨ lapya la

⁸⁰ Tuna ɓa̰ sul gɨna, ər toni la, ər ti ɗəng na Ndɨla na Lal dwari. Ər ti tɨ tap hul marway barita ər ɓla ər ndɔ tɨ bayri gɨ bi tɨ Israhel-a.