2 Kɔrḛt-a 1 - Ɛrgɨ Ɓani

Lapya kar

¹ Yin Pol, Jesu Krist na wo tɨ wa̰y edɨ kuna Ndɨla hul taam la ən ɓun tɨ Timote, jo i kya̰ maktub ne gɨ bi gun ne do sul tɨ paa na Krist ndil tɨ Kɔrḛt la gɨ bi tɨ hul kula gun ne wo tɨ lɔr nəgri sul tɨ Akay la.

² Ka ī Ba tɨ Ndɨla la ī Baali tɨ Jesu Krist la ka gɨ i barka la naa gɨ i lapya la.

Pol ka gɨ Ndɨla barka

³ Ka mu jul ley tɨ Ndɨla ne tɨ Jesu Krist ī Baali sul, yḭr ne ər tɨ wo tɨ bi jindemni ləg la wo tɨ bi gun hul ɗina la.

⁴ Ər ɗina ī niri tɨ pɛw gun ne ī ti tɨ daan la, ər na gɨ ī dwari tɨ ɓər wur tɨ bi gun ne ti tɨ pɛw hul na hul ɗina ne yḭr mar naa gɨ ī.

⁵ Kəysul jo yi ten pɛw dɨbla tuna Krist sul gɨna, na ul mu tɨ Krist may ndɔ ī ɓə hul ɗina ɗəng tina la.

⁶ Jo yini ten pɛw a, ti tɨ gɨ i hul ɗina wur la tɨ i nina la. Jo yini ten hul ɗina gɨna, yḭ kaw i hul ɓə i ɗina la. Nejo yḭ ɓə na pɛw gun ne wag tɨ i sul yəg kuna yini yəg no̰.

⁷ Kuna ne yini hul ne i kay tɨ i sul ti tɨ ər gor, kəysul yini una ɓə yḭ ten pɛw na i. Ndɨla ɓə i hul ɗina kuna ər ɗina yini hul la.

⁸ Ɓungɨ, yini taam ɓə yḭ una pɛw ne yini ten tɨ lɔr taal tɨ Asi. Tɨ pɛw ɗəng ne ura i dwari, ne yini ko hul tɨ tɨm jili cam lo.

⁹ Yini may kaw i kay i hul tɨ ulu sul ara, kuna nejo yini ɓə i ho̰ni kay tɨ i ndula ya̰m kəw sul lo lɛ tɨ Ndɨla ne wag na bi tɨ ulu tɨ galɨm.

¹⁰ Tɨ yḭr jo ər wag na i tɨ ulu ne hul la, ər ɓə na i wag tɨ ulu hul cam la. Kuri, yini kay i hul tɨ ər sul ɓə ər ɓə na i wag yɔd.

¹¹ Na ul mu tɨ i Ndɨla soon, yḭ kaw i yaar i na wag tɨ ulu hul. Nejo ɓari ne Ndɨla ɓə gɨ i kar, barka tɨ bi dɨbla na Ndɨla soon yini jaa. Nejo ɓə gɨ bi dɨbla ul mu naa tɨ gɨ Ndɨla barka kar yini jaa la.

Pol kori na ɗa̰y tɨ saal tɨ Kɔrḛt tɨ kwi

¹² Wa̰y ne naa gɨ i ndula laar ɗəng tɨ i nirimu tɨ ja jaa ɓari tuna i sul. Yḭr ne ɓla ka wa yini ti na bi gun tɨ dunya̰ le dɨbla nari gɨna na yḭ, tɨ kuri hul na ndula ndeeri ne o̰ tɨ Ndɨla ndɔ na wo ɓari na jicina lo lɛ na Ndɨla na ɓari.

¹³ Yini kya̰ gɨ i wa̰y jak lo le, tɨ wa̰y ne yḭ edɨ la i una ɓari la jo le ngoy. Jo kuna yḭ una jaa ne ji gun lo kaw, ən ko hul ɓə i ɓə una ɓari na ɗa̰y ne ī Baali Jesu ɓə hina.

¹⁴ Tɨ ɗa̰y ne jo yini ɓə tɨm wa̰y tɨ ndula laar tɨ yḭ maan la, yḭ ɓə tɨm yini na i wa̰y tɨ ndula laar la.

¹⁵ Na hul ɓudu jo ən taam na hina tɨ i maan toni nɨ ka i ten barka lahul tɨ ndidi mani.

¹⁶ Ən ɓə o̰ tɨ i maan, ən ɓə saal tɨ Masedwan, la ən ɓə duga wag tɨ Masedwan hina tɨ i ndɔ, nɨ i ɓə ən yar na mum ne ən taam tɨ saal tɨ ɓoy tɨ lɔr nəgri sul tɨ Jude.

¹⁷ Gorne ən so ən gṵ kuna ne pay ən ka na jaa tɨ buni a? ɓee wa̰y ne ən taam kar tɨ ilgɨ ne o̰ tɨ biɓari ndɔ nɨ ən ɓə ən mu kula m le gaana ən ɓə ən gṵ yiga m-m a?

¹⁸ Ndɨla may kaw una ɓari ɓə, jaa ne yini jaa gɨ i tɨ mu kula «m» la, «m-m» la tɨ paa mu lo.

¹⁹ Kəysul Jesu Krist, Ndɨla na ɓa̰ ne Silas la Timote la yin man la, yini ɗo gɨ i ər beel yḭr tɨ «m» la, «m-m» la tɨ paa mu lo. Wa̰y ne əm ɓə tina tɨ ər ndɔ tɨ «m» yɔd!

²⁰ Kəysul na ul mu tɨ Jesu Krist ndɔ jo Ndɨla ko mu m tɨ mum gun ne ər ha̰w gṵ tɨ kar tɨ sul. La na ul mu tɨ yḭr maan jo yḭ ko i mu «Amin» tɨ Ndɨla teen la.

²¹ Wo ne naa gɨ yḭ la, yini la dwari tɨ tɨm ɓudu na Krist la kay i jak la tɨ Ndɨla may,

²² yḭr jo ər kya̰ ər daa tɨ i sul la, ər naa gɨ i Lal ɓari kuna mum tɨ tina ne toni maani ne ər par sul tɨ gɨ i naa.

²³ Ndɨla ɓə ən mu lura, ka ər tung jaa tɨ ən sul jo ən ka ɓura. Ən ɓini duga saal tɨ Korḛt ja tɨ i hul yunga jaa.

²⁴ Yini ka dwari tɨ i hul kula sul lo lɛ yini taam i ndɔ kay na i tɨ i ndula laar hul, kəysul yḭ par i hul kula sɨgra.