1 Kɔrḛt-a 1 - Ɛrgɨ Ɓani

Lapya kar

¹ Yin Pol ne Ndɨla soon ən na ər hul laar ka ən duga Jesu Krist na wo tɨ tomni, na ī ɓun tɨ Sosten la,

² ən kya̰ maktub ne gɨ bi tɨ Krist maan ne do paa sul. A tɨ Ndɨla bi ne wo tɨ Kɔrḛt, gɨ bi gun ne Ndɨla kay a jak tɨ ər maan na a paa hari na Krist. Ya̰ ne Ndɨla soon a ka a ndeeri tɨ ər kwi na bi gun ne yabu Baali Jesu Krist ndil na un gun. Ər tɨ a Baali la yi Baali la.

³ ka ɓari la lapya la, tɨ ī Ba tɨ Ndɨla la ī Baali tɨ Jesu Krist la maan, gə̰y na i.

Ndɨla naa gɨ i mum ndinimani na Jesu

⁴ Ən ka gɨ Ndɨla barka na ɗa̰ysul tɨ i jaa, kəysul ər ka gɨ ī ɓari na ī paa hari na Jesu Krist.

⁵ Kəysul na ī paa hari na ər, ər naa gɨ i mum tina gun tuna jaa sul la, wa̰y tɨ una sul la.

⁶ Krist na jaa lɔ ne a jul tɨ i daan, wur ndeem mag-mag tɨ i ndɔ.

⁷ Kuna ne wa̰y kede tɨ Lal Ɓari ɓudu ne haam yḭ bi ton i wo Baali Jesu Krist na lula sul tɨ ndula ɓla tɨ bayri a̰y in teni.

⁸ Tɨ yḭr mar jo ər ɓə gɨ ī dwari naa marway tɨ mu tɨ tong nɨ ka wo ɓudu in ɓə lɛm jaa kay tɨ ī sul lo gorne i Baali tɨ Jesu Krist ɓə duga hina.

⁹ Ndɨla ne soon i hari i na ər ɓa̰ tɨ Jesu Krist ne tɨ i Baali ər ka wa̰y na ɗa̰ygor.

Bi tɨ Kɔrḛt na peer ɓaan

¹⁰ Ən ɓungɨ, ən wur ɓər tɨ i hul na i Baali tɨ Jesu Krist ndil: Yḭ laa peer mu, ka paa tungni in teni tɨ i daan. I hari paa tɨ mum sul ɓari la, i ilgɨ ti ɓudu na paa la.

¹¹ Ən ɓungɨ, Klohe na bi ja gɨ ən ɓə paa gaglə wo ī daan.

¹² Jaa ne ən taam gɨ ī ja jo le: Ka jakaw tɨ ī daan ka ja ɓə: «Yin tɨ Pol maan, yin tɨ Apolos wo, yin tɨ Piyɛr wo, ɓee yin tɨ Krist maan lo.»

¹³ Krist ɓaan ndula a? Tɨ yin Pol jo a ɗɨb ən tɨ tɨla tɨ tərgɨ sul yḭ jaa a? Ɓee na Pol ndil jo a ka gɨ i batɛm a?

¹⁴ Ən ka gɨ Ndɨla barka kəysul ən ka wo ɓudu tɨ ī daan batɛm lo, lɛ Krispus la Gayus la jo ən ka gɨ a batɛm ngoy.

¹⁵ Kuna ne gɨna wo ɓudu ne ɓə lɛm ja ɓə yḭ ka batɛm na ən ndil in teni.

¹⁶ Ay! Tɨ kuri ən ka Estepanas na nimni batɛm, lɛ ən una gorne ne ən ka gɨ wo jak batɛm lo.

¹⁷ Kəysul Krist, ton ən bi batɛm kar lo, lɛ tɨ Jaa Ndinimani jo beel ɗula bla woɓari na jicina la ər ilgɨ, nɨ Jesu na ulu tɨ tɨla tɨ tərgɨ sul duga ti wa̰y bla ji lo.

Ji cina tɨ Ndɨla maan la tɨ dunya̰ la

¹⁸ Jaa ne a ja tuna Krist na ulu sul tɨ tɨla tɨ tərgɨ sul tɨ jaa siri tɨ bi tɨ haam ji. Lɛ gɨ bi ne wo ul tɨ nina sul gɨna, tɨ Ndɨla na dwari gɨ yi.

¹⁹ Kəysul a kya̰ tɨ Ndɨla Maktub hul ɓə: «Ən ɓə bi jicina na jicina yunga la, ən ɓə bi tɨ mum una na mani tɨ ilgɨ jul teni la.»

²⁰ Wo jicina wo ɓay a? Wo tɨ gṵ hul ɓla wo ɓay a? Bi tɨ peer gaglə tɨ wa̰y una sul na lula sul ne ndogle wo ɓay a? Ndɨla duga jicina tɨ dunya̰ hool lo a?

²¹ Gorne Ndɨla ɓla ər jicina, bi tɨ dunya̰ lɛm ər jicina una na a jicina maan gun lo. Nejo Ndɨla so gṵ tɨ bi nina na beel siri tuna Jesu na ulu tɨ tɨla tɨ tərgɨ sul.

²² Juyb-a ɓiri mum ne ɓɔrji tɨ ləg la bi ton tɨ grek a taam jicina la,

²³ lɛ yini, i ɗo beel tuna Krist wo ne Ndɨla ɛr tɨ tɨla tɨ tərgɨ sul, ne Juyb-a taam ər hul kula lo bad-bad, la bi ne tɨ Juyb lo ləg kuna siri la.

²⁴ Lɛ gɨ bi ton Ndɨla soon a, ton tɨ Juyb ɓee grek, a una ɓə yḭr tɨ Krist wo ne Ndɨla ɛr, yḭr tɨ Ndɨla na dwari la Ndɨla na jicina la.

²⁵ Kəysul wa̰y ne bi ləg kuna wa̰y siri tɨ Ndɨla maan ura bi tɨ dunya̰ na jicina la wa̰y ne dwari teni tɨ Ndɨla maan ura bi tɨ dunya̰ na dwari la.

Ji cina la siri la

²⁶ Ən ɓungɨ, yḭ ɓiri i ndɔ pay yḭ tɨ kəy bi a? Yḭ ne Ndɨla soon i tɨ i daan, bi tɨ dunya̰ ləg bi jicina dɨbla lo la, bi tɨ dwari lo la, bi nga̰ lo la.

²⁷ Lɛ mum ne bi ləg kuna mum siri, Ndɨla so ɗo na kaar tɨ bi jicina sul. La wa̰y ne dwari teni tɨ dunya̰ Ndɨla so ɗo na kaar tɨ wa̰y tɨ dwari ɗəng sul la.

²⁸ Ndɨla ɛr mum ne gaw tɨ bi tɨ dunya̰ ji la, mum ne a ji kud la, mum ne wag wa̰y lo tɨ a ji lo la tɨ mum ne wag wa̰y tɨ a ji yunga.

²⁹ Nejo woɓari ɓudu in ɓə lɛm ndula ɓla ɓə yḭr tɨ wo nga̰ tɨ Ndɨla kwi lo

³⁰ Tɨ Ndɨla jo hari i tɨ paa na Jesu Krist la, Jesu duga jicina ne o̰ tɨ ər ndɔ gɨ yi. Tɨ Krist Jesu jo ka ī bi ndeeri la, bi tugla la, ta bi ne Ndɨla wura la.

³¹ Kuna a kya̰ tɨ Ndɨla na maktub hul ɓə: «Ka wo ne ləg ər ndula ɓə yḭr tɨ wo nga̰, ka ər ləg ər ndula ɓə yḭr tɨ wo nga̰ na Baali.»