Filemon 1 - Nlakano Nahihano ni Masalmo 1930

¹ Paulo amukariposo a Kristu Yesu, ni Timoteo munna owo, wa Filemoni ósiveliwa owo ni mulípa‐muteko mukhwihu,

² ni wa Apiya murokora owo, ni Arkipo musurutato mukhwihu, ni wa muloko yowo ori m’pa mwá:

³ Ikharari wa nyuwo ni murechele wa wa Muluku Atithihu ni Apwiya Yesu Kristu.

⁴ Kinnamuthamala Muluku aka mahiku othene, ni owupuwela weyo m’mavekeloni mwaka,

⁵ kiniwaka sa osivela wá ni nroromelo nenlo oriáno nolakelela wa Apwiya Yesu, ni wa awéla murima othene;

⁶ wi eyátáno ya nroromelo ná yahikhale ya ’kuru vosuwela yaphama yeyo eri mwa nyuwo, ya wa Kristu.

⁷ Ntakhara kákhalano otheya otokotoko ni ohakalala ntakhara osivela wá, ntakhara mirima ya awéla murima tihihimuwalaya mwa weyo munna.

Paulo omvekelela wawe Onesimo kapuro ótcharuwa‐m’murima yowo átchaiye.

⁸ Mummo, nari kiriakano onyesererya otokotoko mwa Kristu wolamulela yeyo enaphwanelela,

⁹ nyenya tchiriene, kinnachenya mosivela, kiriaka hiha Paulo mwamuhumu, nave hihano amukariposotho a Kristu Yesu;

¹⁰ kinnochenyerya ntakhara a mwanaka, yowo kimuyanraka mukariposo, Onesimo,

¹¹ yowo khalai ahóphwa‐phwanyenrye etchu, nyenya vano óniphwanyerya etchu morera weyo ni miyo;

¹² ti yowotho kókokihenryaka, ti murimasha wa yomi.

¹³ Yowo nkanakhwela omuwehiha wi akhale ni miyo, wi mu nipuroni mwá akákiruméla miyo m’kariposo sa Mitchaka Yaphama:

¹⁴ nyenya kihisuwenle murimá nkinakhwela wera etchu; wi epewá ehikhale ntoko mwawakeleliha nyenya mwa mahala.

¹⁵ Ntakhara akhweya amwalanyiwe ni weyo va mahiku aya ntakhara a ela, ni wi werekemkhalanoru mahiku othene;

¹⁶ vanotho tahi ntoko kapuro, nyenya ómpwaha kapuro, munna ósiveliwa, tchiriene ti yomi, nyenya mopwahashatho ti yowe, m’mwílini, navetho mwa Apwiya.

¹⁷ Wákéraka nto okhovelelana ni weyo omwakhele yowo ntoko yomi mkhataka.

¹⁸ Nyenya khwino árimotchekela etchu, kahi ápoleya etchu, okalakhanyerye miyo yeyo;

¹⁹ yomi Paulo kinarepa ni ntata naka, kinarwa‐kikokiherya; wi kihiloche ni weyo wi weyo wa mulipa‐okipoleya aka.

²⁰ Ahe, munna, kihakalale ni weyo mwa Apwiya: ohihimule murimáka mwa Kristu.

²¹ Kinaroromelaka wiwelela wá kinnorepela weyo, kinasuwelaka wi onarwa‐weranotho opwahiha momu kinalochelaka ’mu.

²² Nyenya okiryeheryeletho vokona’vo; ntakhara kinnaweheryerya wi mwa mavekelo anyu kinarwa‐kivahiwa wa nyuwo.

²³ Epafra amukariposo mukhwaka mwa Kristu Yesu annolochela weyo;

²⁴ aneranotho hiha, Marko, Aristarko, Dema, Luka alipa‐muteko akhwaka.

²⁵ Ikharari sa Apwiyahu Yesu Kristu sikhale vamoha ni munepanyu. Amen.