Yúɖà 1 - Ifè: Ìwé-Ɔ̀ɖáyé Ìmↄl̀ɛ̀-Ìk̀ã́ã̀nyì

¹ Èmi, Yúɖà ní wà tse ìwé yèé bɛ́ fú ŋɛ́#ɛ́. Àtsìtsɛ́-Yèésù Kírísítò ní ǹ dzɛ́#ɛ́, tsí ǹ dzɛ́ ɔmànà-Yàkúbù gbo. Ǹ wà kí ɛ̀ŋɛ yèé ŋa Ɔ̀ɖáyé Boba-wa kpè ní ɛ̀ŋɛ kó dzɛ́ tòŋu#ɛ́. Ó nɛ́ àmúɖɔ̃̀ fú ŋɛ́, tsí wà tsɛ́wé bò ŋɛ́ gbo gbà ńǹtá-Yèésù† Kírísítò†.

² Ɔ̀ɖáyé kó wà rí ànyínɔ́ fú ŋɛ́ kpíkpɔ̀ máa, tsí kó wà rɔ tútùúrɔ̀‐ɛ̀ gbo ɖà bò ŋɛ́ kpó wàà. Kó wà nya àmúɖɔ̃̀ gbo ɖíre fú ŋɛ́ lárè bɛ́ɛ̀ máa.

Yúɖà wà mɔ́wɔ́ mú etí fú olí-Yèésù ŋa si ti nára-atsɛ̀kɔ́-òɖòbò ŋa

³ Àrínódzú-mi ŋa, ǹ ti wà tsikpá ní n tse ìwé wá fú ŋɛ́ ti nára-ɔlà yèé tɔwɔ́-wa náàdzɔ́#ɛ́. Ó ɖi báàyí#ɛ́, ǹ rí ní ó kpã́dzú ní n tse ìwé yèé bɛ́ fú ŋɛ́, tsí n ń ɖáàmí le ŋɛ́ ti nára-afɔ̀-òmírɛ̃̀. Ǹ wà ɖáàmí le ŋɛ́ ní e ɖìgírí, tsí e ɖù fú ɛ̀kɔ́ yèé àa gbà gbɔ́#ɛ́, tsí kó máa kpàrɔ̀. Ɔ̀ɖáyé mú ɛ̀kɔ́#ɛ́, tsí ń bɔwɔ́-ɛnɛ yèé dzɛ́ tɛ̀ɛ̀ ŋa#á àrìkã̀ntso títí lɔ ni.

⁴ Ǹ wà tse ìwé#ɛ́ fú ŋɛ́, iŋɛ́ yèé tse#ɛ́, ɔ̀nyà kã̀ŋa tsolè wɔ̀ náàŋírĩ-ŋɛ́. Ɛnɛ nyɛ̀ŋɛ̀ ŋa#á, à kà nɛ́ àrísá fú Ɔ̀ɖáyé. À kɛ́ ɛ̀kɔ́-ore-ɔ̀fɛ́-Ɔ̀ɖáyé#ɛ́, tsí nyíi nóòmírɛ̃̀, àtsùgbée ká wà tse wérewère. Tsí Yèésù Kírísítò Ɔlá-wa yèé dzɛ́ Ɔ̀gá ɔ̀kã̀ntso yèé wà#á gbo à kɔ̀ɔ́. Ó ɖi, Ìwé-Ɔ̀ɖáyé† ti fɔ̀ si lɛ́lɛ́ǹlɛ̀lɛ̀ si tsúwádzú ní Ɔ̀ɖáyé nákó ɖáàbi fú ŋa.

⁵ Fee, è ti ma afɔ̀ nyɛ̀ŋɛ̀ ŋa kpó rere. Ó ɖi, ǹ wà wo n tédzú‐ɛ̀ fú ŋɛ́ ní Ɔlɔ́dzɔ́ fú ɔma-Ìsàràyɛ́lì† ŋa nɔ́là gbà ńǹtá-kíbí ó gbɛ̃́ ŋa fùɖá ńlɛ̀-Èdzíkpítì†#ɛ́. Tsí náànyìwà#á, ó wáa tse tsí ɛnɛ yèé ŋa kò mú àkaralé-ŋa, tsí ń si ńǹtá‐ɛ̀#ɛ́, à tsɛ̀rá.

⁶ È gbàgbé afɔ̀-adzítsɛ́-ɔ̀rɔ̃† ŋa#á gbo niì? Ikpá yèé à ń bɔwɔ́-ŋa#á kò dzɔdzú ŋa, tsí à ǹɖe kɔ ìɖìgbé tàŋa ká-ŋa dzɔ̀ɔ́. Tsí Ɔ̀ɖáyé mú ŋa si nɛ́ɛ̀ŋà si títí lɔ. Ó kɛ́ ŋa si nóòkùkù si títí fú ɔdzɔ́ lákṹ yèé dzɛ́ ɔdzɔ́-ɛdzɔ́ kpíkpè#ɛ́.

⁷ È náa tédzú afɔ̀-ɛnɛ-ìlú-Sòɖómì ŋa òŋu ɛnɛ-ìlú-Gòmɔ́rà ŋa má nára-ɛnɛ-ìlú yèé ŋa wà wérí ŋa#á gbo. Àŋa gbo, à tse íbàɖí kíbí adzítsɛ́-ɔ̀rɔ̃ ŋa#á gbo tse#ɛ́. À tse wérewère, tsí sɔ́wɔ́-ayé#ɛ́. Tsí iná dzó ŋa kpa. Nɔ́mbɛ́ báàyí#ɛ́, à ɖi ìsàwé-kã̀ fú ɔ̀nyà kpó ní Ɔ̀ɖáyé náa fɛtí fú ɔ̀nyà-íbàɖí ŋa ńná-àrìtã́.

⁸ Ɔ̀nyà-íbàɖí nyɛ̀ŋɛ̀ ŋa yèé wà náàŋírĩ-ŋɛ́#ɛ́, ìlò-ìrɔ́ nyɛ̀ŋɛ̀ ké ní àŋa gbo, à wà lò#ɛ́. À náa láàlá ŋa, tsí àlá ŋa#á náa sɔ́ ŋa si ńwérewère tsítse. Tsí à kɔ̀ ní àŋa kàkó balɛ éwo fú ikpá-Ɔ̀ɖáyé, tsí à náa wà bú ɛnɛ yèé ŋa wà nɔ́ɔ̀rɔ̃#ɛ́, olí-iyì ŋa.

⁹ Mìkàyɛ́lì dzɛ́ ɔ̀gã́-adzítsɛ́-ɔ̀rɔ̃ ŋa-kã̀. Òŋu gìɖì gbo kò tse bɛ́ɛ̀. Ńǹwèrè yèé ó wà ɖu òkú-Mɔ̀ɔ́sè† bá Ètsù†, tsí ó ɖi àtansɔ fú òŋu-ɛ̀ méèdzí#ɛ́, kò ɖɔ́ɔ̀rɔ̀‐ɛ̀ sɔ ní òŋu kó bú Ètsù. Kà kàa bɛ́ɛ̀, ó fɔ̀ fúu ní: Ɔlɔ́dzɔ́ kó fɛtí fúu.

¹⁰ Ó ɖi, ɛnɛ nyɛ̀ŋɛ̀ ŋa òŋu, iŋɛ́ kpó yèé à kò mà#á, à wà búu. Tsí iŋɛ́ kpó yèé à mà bɛ́ gé náàrì lo ìsérè kíbí ɛrã ŋa gbo ńkóko kò nɛ́ ìsérè bɛ́#ɛ́, iŋɛ́ ŋa#á gìɖì wà mú ŋa tsɛ̀rá.

¹¹ Àŋa òŋu, ɛ̀rá rá ŋa ni. Iŋɛ́ yèé tse#ɛ́, à fa ɛkpa yèé Kàyínì† gbo fà#á. Tsí à lò sé kíbí Bàlámì gbo bɛ́, òkpì‐ɛ̀ ní dzɛ́ ní à wà rú ɔ̀nyà ŋa, tsí wà ń wo owó. Tsí kíbí à kɔ̀ ní àŋa kàkó balɛ éwo fú Ɔ̀ɖáyé kíbí Kòré gbo#ɛ́, à tse ɛ̀rá.

¹² Bí ó dzɛ́ ní ɛ̀ŋɛ olí-Yèésù ŋa, è lɔ káà kpérí si ńǹɖì-kã̀, tsí wà dzɛŋɛ́ má náàdzɔ́#ɛ́, ɛnɛ nyɛ̀ŋɛ̀ ŋa náa wà náàŋírĩ-ŋɛ́ si kíbí òkúta lákṹ lákṹ ŋa ńnɔ́-oɖò bɛ́, tsí è náa wà kó ńnɛ̀. À náa ɖa inɔ́ ɖà ńlɛ̀, tsí dzɛ, tsí mɔ náàrì rí Ɔ̀ɖáyé sá. Àkpòlá-tàŋa ká-ŋa kó kɔ̃́ gé ní à náa mà#á. Tsí à wà kíbí òdzò náa tsú, tsí awu náa kóo lɔ, tsí kɛ́tɛ́ kà ta#á. À wà kíbí egi yèé ŋa náa so#ɛ́ gbo bɛ́. Tsí kíbí àsòkò yèé ká ká èso-egi ŋa#á tó#ɛ́, àŋa òŋu, à kò tì so èso ɔma ɔ̀kã̀ntso bɛ́ gìɖì. À kú gbà méèdzì, tsí à wú ŋa.

¹³ À wà kíbí awu náa wà tse, tsí àhũ náa wà kpa kũkũ#ɛ́ bɛ́. Tsí ńǹrɔ́-kíbí àhũ náa wà kpa, tsí wà wó fùtùfútù gbígbɛ̃ɛ̃́rĩ́ wáa ɖà náàtàkè#ɛ́, bɛ́ɛ̀ ké ní àŋa gbo, à náa wà tse iŋɛ́-anɔ́ ŋa#á. À wà kíbí àrã̀wo yèé ŋa sé ɔ̀nà#á bɛ́. Tsí ìɖì yèé Ɔ̀ɖáyé kpaɖí si fú ŋa títí lɔ#ɛ́ ní dzɛ́ òkùkù lákṹ kpìrìm#ɛ́.

¹⁴ Ènɔ́kì ní dzɛ́ gbágbóǹgbàgbò-wa èkéedze#ɛ́, bí àa kpée kíkã̀ ti ńǹtá-Áɖàmì†. Tsí ó gba afɔ̀-Ɔ̀ɖáyé fɔ̀ gbo ti nára-ɛnɛ nyɛ̀ŋɛ̀ ŋa ní: È rí gé! Ɔlɔ́dzɔ́ bàa, tsí adzítsɛ́-ɔ̀rɔ̃ ŋa tsɛ́ kì, tsí gbɛ̃́ɛ̃ bàa.

¹⁵ Ó bàa, tsí kó wáa kpɛdzɔ́ fú ɔ̀nyà kpó, tsí kó ɖáàbi fú ɔ̀nyà-íbàɖí ŋa gbo kpó ti nára-iŋɛ́-íbàɖí ɔ̀kã̀lɔ́ɔ̀kã̀ kpó yèé à tse náàrì rí Ɔ̀ɖáyé sá#á. Tsí nákó ɖáàbi fú adzàbi ŋa gbo ti nára-èkpè ɔ̀kã̀lɔ́ɔ̀kã̀ kpó yèé à bú Ɔ̀ɖáyé náàrì ríi sá#á.

¹⁶ Ɔ̀nyà nyɛ̀ŋɛ̀ ŋa#á, à náa wà bínɔ́, tsí wà nɔ́ɔ̀kɔ̃̀ɔ̃́rɔ̃̀ kpíkpa si gé ni. Tsí iŋɛ́-íbàɖí yèé à wò ní àŋa kó tse#ɛ́ ní à náa tse#ɛ́. Tsí afɔ̀ lákṹ lákṹ ŋa gbo ní náa wà fùɖá nárũ fú ŋa#á. Tsí à náa wà ɖɔ̃ arũ fú ɔ̀nyà ŋa, àtsùgbée ká rí èrè-kã̀.

Yúɖà wà ɖáàmí le olí-Yèésù ŋa

¹⁷ Ó ɖi ɛ̀ŋɛ òŋu, àrínódzú-mi ŋa, è náa tédzú afɔ̀ yèé ŋa adzítsɛ́-Yèésù† Kírísítò Ɔlá-wa ŋa ti fɔ̀ fú ŋɛ́ wáa lɔ#ɛ́.

¹⁸ À fɔ̀ fú ŋɛ́ ní: Nɔ́dzɔ́-ìtã̀ntã́ ŋa#á, ɔ̀nyà kã̀ŋa wà, tsí dzɛ́ abɛnáranɛ ŋa, tsí à nákó wà lìlò ŋa kíbí ó wù ŋá gbà#á náàrì rí Ɔ̀ɖáyé sá.

¹⁹ Àŋa ní wà bàdzɛ́ àŋírĩ-ŋɛ́#ɛ́. Kíbí à yà gbà#á, ìlò‐ɛ̀ ní à náa wà lò#ɛ́. Mímí-Ɔ̀ɖáyé† kò wà ńǹtá-ŋa.

²⁰ Ó ɖi ɛ̀ŋɛ òŋu, àrínódzú-mi ŋa, è náa wà ɖáàmí le ara-ŋɛ́ ŋa làkóò làkóò gé, tsí ogùgù-ŋɛ́ ŋa kó wɔlɛ̀ rere ńnɔ́-iŋɛ́ yèé ŋa è gbà gbɔ́#ɛ́. Iŋɛ́ ŋa#á ti ńɖi-Ɔ̀ɖáyé ni. È náa wà wúùre gbo ńǹrɔ́-kíbí Mímí-Ɔ̀ɖáyé#ɛ́ wà gbɛ̃́ ŋɛ́ gbà#á.

²¹ È náa gbé ńnɔ́-àmúɖɔ̃̀ yèé Ɔ̀ɖáyé nɛ́ fú ŋɛ́#ɛ́ si gé. È ɖóro si gé títí Yèésù Kírísítò Ɔlá-wa kó tse àtsùgbé-ànyínɔ́ yèé ó wà rí fú ŋɛ́#ɛ́, tsí kó wáa fú ŋɛ́ náàyɛ̀-àrìtã́.

²² È rí ànyínɔ́ fú ɛnɛ yèé ŋa gbo kò gba ɛ̀kɔ́-òtítɔ́#ɛ́ gbɔ́ rere#ɛ́.

²³ È náa kpɔ ɔ̀nyà kã̀ŋa gbo fùɖá ńná-àrìtã́#á, àtsùgbée ká rí ɔlà. Tsí è náa rí ànyínɔ́ fú olòmírɛ̃̀ ŋa gbo. Ó ɖi, è náa wà ɖíìdzáyè nára-ŋa. È máa tì dzɛ́ títí iŋɛ́ yèé à wɔ̀ si ŋa#á kó tì kã ara-ŋɛ́ bɛ́ gìɖì. Kíbí à yà gbà#á, ó gbɛ̃ɛ̃́rĩ́ iŋɛ́ yèé à wɔ̀ si#ɛ́ gìɖì gbo.

Yúɖà wà nyɛ Ɔ̀ɖáyé

^24-25 Kùsɛ̀ɛ̀ fú Ɔ̀ɖáyé ɔ̀kã̀ntso yèé wà#á. Ó gbà ńǹtá-Yèésù Kírísítò Ɔlá-wa, tsí gbà wá là. Ó nɛ́kpá, tsí kó nyáa tse tsí e máa bɔ́ dzì náàbi dzídzɛ. Nákó nyáa tse gbo, tsí nɔ́dzɔ́ yèé è nákó lɔ káà ɖóro ńwádzú-òŋu yèé dzɛ́ olí-iyì#ɛ́, ni e má dzálɛ̀ kpó, tsí ayè gbo nákó tɛ́ ŋɛ́ kadzá. Ti Ɔ̀ɖáyé ní dzɛ́ iyì#ɛ́, tsí ó lákṹ, tsí nɛ́ àmí, tsí nɛ́kpá gbo si títí lɛ́lɛ́ǹlɛ̀lɛ̀, báàyí gbo, títí lɔ náàrìtã́ gbo. Ɛ̀tsɛ.