Titu 1 - Ngudradreadrekadhane Ka Sisiu 魯凱語聖經

¹ Kwaku ka Pawru ka sasiakawlu ki Twaumase si Yesu Kirisitu. Wapilri nakwane si sikawlu nakwane mwa paralubu ku takisuswane ki pilri ki Twaumase ka laumawmase, ililuku liniane pathingale ku sabulrwane ki takisuswaneta ka patengane ka sabulrwane,

² kikai patengane ka sabulrwane yai arakai ku sasiadradrama ki palralrawthu ka niake tutangadrane. Kudra kai madraedrangelre ka Twaumase, sakaiyana ikai sanaka maneemane, palrainginga baai mitane kikai palralrawthu ka niake,

³ sa mutakelanenga ku vai, la pangukai ki hukuingi pelaela putaluvaivai. Kiasudralrwaku, pangukai ku drekase ki Twaumase ka Takipalribulribulaneta siamece si kipuawngane ku adindwane ku hukuingi.

⁴ Titu, kai tigamili baai muswane kaiasane, lalakeli muswane ka patengatengane ikai ki tamararamavaneta ki takisuswane. Ku Tama ka Twaumase si Takipalribulribulaneta ka Yesu Kirisitu ani baai ku migemi, ku sulivatane muswane!

Takaungane ki Titu ikai Kerite

⁵ Ku suruli muswane pikai Kerite, ku pacugane yai ani marasikaiyana ku kaika nitulrepengane kudra laawngane amiaku, si ikai sanaka cekele paacegecege ku ciwru. Napeaelaelangaku:

⁶ Ku ciwru naika kakadrwa ku takitakaiyane kikaelaela. Lri savaeva ku taelrelre, laka sinzia makanaelre ku lalalakeini, si kakadrwa ku ngilralraingane kai kibulrubulru.

⁷ Kudra atamatama ki kiwkai, si siamece ku awngane ki Twaumase, naika kadrwa ku akikaelaelane. Kai lasu lri kai dradrarane, kailri kawpupungu, kai kabusubusuku, kaika tarakiecebe, kai marau ku tacekecekelane

⁸ lri kiragai pasudalru ki umawmase, si kiragai pia ku mathariri ku awngane, kapapedrenge si dradreele, la kadringelrese kabula, si dulru ngiraruthuku.

⁹ Kai lasu lri tara kakecenge matisudralru, si mamamwa kudra ki sabulrwane ki kakudhane. Lukamiyaiya kai, lri dulru arakai ku kiatulrepenge ku sabulrwane pakabalrithi ki palrapalra, si lai tupela ku tapasalrivane ki wabaebalre ka umawmase.

¹⁰ Asi lwiyane takaalra kai laumawmase kai wabaebalre ki kakudhane, arakai ku tavulrucane ka matialraase ka vaga tavuvulrucu ki palrapalra, inilringa kudra la palrailraingi kigelregelre ka lrisi ka swa Yuda ka la Kirisite.

¹¹ Tara paidrengera ku akawrivane kilakikai umawmase, asi lwiyane, kwi lalasu ngwalai ki ravane ki paisu, la arakainga ku kaika apelaelaelane ku lavaga si kabebetethe ki taikaalra ki tacekecekelane.

¹² Kai lalasu ka swa Kerite yakai ku tangea ku yuginsia lini amianga kai kawriva, “Kai swa Kerite tara draedraedrangelre, amani ku malilisi ka waudriwdripi, apiakaekane ka masasalrai.”

¹³ Kikai vagaini kai pasalriu. Lakamani, tara pangicaema kaelaela liniane, lani kitulrepenge ku salrwane lini,

¹⁴ ani kai kilalranga kudra nipacucungulane kadraedrangelrane ka vaga ki swa Yuda, si kudra la makececenge pangimia ki tukakudhane lini ka wacilri ki patengane ka sabulrwane.

¹⁵ Papia ki mabula ka umawmase, sanaka maneemane mabula patuelre, ai papia ki la makudrulru si kai masalru ka umawmase, kadrwa ku navaevanga ku lamanemane ku mabula, asi lwiyane kudra kidremedreme lini si abake lini makudrulru patuelre kaika alremelremeane.

¹⁶ Kai lalasu peaelaela ku tathingalane lini ki Twaumase, ai ikai ki tangivelevelane lini kai wathingale iniane. Kai lalasu matiavalracevace, ka tara baebaebalre, ka kai maka paiya ku mathariri ku awngane!