Lrivi 1 - Ngudradreadrekadhane Ka Sisiu 魯凱語聖經

Lama ka lrisi

¹ Ku Tamatama twalai ki Alrivilrivi ka balrawbauini dawlu ki Musi, cunu iniane

² papia ki mapapangale ki swa Iseraylri pulebe pelaela kikai lakakudhane. Kunumi alaiyasi ikai ku lri patarumara ki Tamatama, lri dulru patarumara kwidra twalai ki lalwange ku lwange ku twalai ki lakiu ku kiu.

³ Lwiyasi patarumara ku lwange tu Lama ka lrisi, lri tara arakaai ku kadrwa ku takatumanane ku sawvalai ka lwange, la iluku mwa ki lrawlrawdru ki Alrivilrivi ka balrawbau ki Tamatama, la lri tarumaraku Tamatama.

⁴ Ku alrima ki lasu lri pubelenge ki awlru ki nipatarumarane; kikai Lama ka lrisi lai lri kitarumara, si lri dulru atalingikaiyane iniane mupasalriu.

⁵ Kwini lasu lri icucubungu ki Tamatama culu kikai sawvalai ka lwange; kwini ngwakai ki Arungu ka barakalai lri malra kwini erai ki sapatarumarane si patarumara, ala lri malra kikai erai si paralikiliki pangithalringulu kwini ki yalrawlrawdru ki Alrivilrivi ka balrawbau ka tapatarumaramarane.

⁶ La pacungulu, kwini lasu lri kulrangici kwini ki sapatarumarane, la teketeke kwini beate;

⁷ ku labarakalai lalri malra ku angatu pubelenge ki tapatarumaramarane, si padalai twapwi,

⁸ la malra kwini beate, paelre ku awlru si lamace pubelenge ki tapatarumaramarane lama.

⁹ Kwini lasu lri tara arakai ku acilai sinau kwini tali adringi si vagisi; ku barakalai lri tara malra patuelre kwini sapatarumarane pubelenge ki tapatarumaramarane si lama patarumara. Kikai sangulremane ki Apwi ka lrisi amani ku kiragai ki Tamatama.

¹⁰ Lwiyasi arakai ku nikiubawbalane ku kakiuane tu Lama ka lrisi patarumara, lri tara pilri ku kadrwa ku takatumanane ka sawvalai ka kiu.

¹¹ Lri ikai ki tali dradha ki tapatarumaramarane, icucubungu ki Tamatama culu kikai sawvalai ka kiu; ku ngwakai ki Arungu ka barakalai lri malra kwini erai ki sapatarumarane paralikiliki thalringulu ki tapatarumaramarane.

¹² Lu maka teketekenga kwini sapatarumarane ka beate, ku barakalai lri malra patuelre kwini sapatarumarane, paelre ku awlru si lamace pubelenge ki tapatarumaramarane si lama.

¹³ Lri tara arakai ku acilai sinau kwini ki sapatarumarane ku tali adringi si vagisi; ku barakalai lri pubelenge ki tapatarumaramarane lama patarumara. Kikai sangulremane ki Apwi ka lrisi amani ku kiragai ki Tamatama.

¹⁴ Lwiyasi kwini lasu la arakai ku laadhadhame tu Lama ka lrisi patarumara ki Tamatama, lri tara pilri ku penai ku tavagu.

¹⁵ Ku barakalai lri malra kwini adhadhame pubelenge ki tapatarumaramarane, la palrici ngetele ku awlru, la malra kwini awlru pubelenge ki tapatarumaramarane lama, ikai thili ki tapatarumaramarane lri pamwaludru ku eraini.

¹⁶ Lri mwalra ku yalreane si yakai adringi ku kaneini cilri si bula, la cilri pwa ki tali talrawane ki tapatarumaramarane ka tagugugwane ki abu.

¹⁷ Lri malra ku drusa ku sapakepake ki adhadhame, si lalita kwini ki adhadhame, ai kai lri lalita kwini ki sapakepake, ala lri malra kwini sapatarumarane pubelenge ki tapatarumaramarane patarumara. Kikai sangulremane ki Apwi ka lrisi amani ku kiragai ki Tamatama.