Isaiya 1 - Ngudradreadrekadhane Ka Sisiu 魯凱語聖經

¹ Saka talialalai ki swa Yuda ku Uzia, Yuthame, Ahaze, si Hezekia, ku Twaumase papia ki lalake ki Amuse ka Isaiya pelaela ku patharukai ki swa Yuda si swa Yerusalrime. Ku tapacasane kikai hungu yai amani ku tatarumarane ku vaga ki Twaumase ki Isaiya.

Ku Twaumase maelaela ki kawkawluini

² Ku Tamatama amia kai, “Subelebelenge si kadaengane, bwala kilalra! Kwaku ka Tamatama numi amiaku kai pelaela: Kudra lapuli twadrau ka lalake ani lreeme baebalre nakwane.

³ Kai lwange wathingale ki tawkini; kai ruba wathingale ki lrutungu ka tapakapakanane ki tawki lini. Kai kawkawluli ka swa Iseraylri la kai thingale nakwane, kai kawkawluli kadrwa ku thingale lini ku manemane.”

⁴ Kikai manganga pasalrisalriu ka kuni, kikai ngialisiane kanganga ka laumawmase, lri matikuru numi! Wacilri numi ki Tamatama, si tudrekase ki saniange ka Twaumase ki swa Iseraylri, la lreme numi baebalre si cilri iniane.

⁵ Anu kai telrai baebalre? Kaiyana makakelrete ku takipathavungane numi? Swa Iseraylri, twaeraeraerai kwi awlru numi, kwi kidremedreme numi, kwi awlru numi yakai kwi caemane.

⁶ Twalai ki awlru pakela ki drapale, kadrwa ku takitulrepengane, mwabalrake kabare palraelre kwi kinawmasane, twadula palraelre kwi kinawmasane, kadrwa kulri paralubu pabanau si cabu ki dula numi, lai lri kakadrwa ku umawmase kulri sulrau numiane.

⁷ Ku kadaengane numi lri aubulane; ku cekele numi lri kawtu aabu. Lri dredredrele numi ki maelane ka zuku kikaruburu mucekele numiane, si kabebetethe ki tacekecekelane numi.

⁸ Kathane Yerusalrime ku lri asuru, lai lri kilringulu, lri mia ki daane ka talaubu ka taikaikaiyane ki tarakawaungu ki babudwane, lri mia ki dadaane ki mau taliliwru, ka kai matiadralru.

⁹ Alaiyasi ku Tamatama ka abebeelengenga ki sanaka kwapingi lu kai pasuru ku laniake ki tapiya ki laumawmase, nai miata ki swa Sudume si swa Gumura kamudunga.

¹⁰ Swa Yerusalrime, kwini tarasangililuku numiane si laumawmase numi mararamau saka taicengecengane ki swa Sudume si swa Gumura. Kilalra ku tapapiane kawriva ki Tamatama numiane, la kirarakete ku bulru numiane ki Twaumase.

¹¹ Amia kai, “Madalame amia numi nakwane kudra makalra ku patarumara numi ku lasapatarumarane? Kainaku twamanemane ku patarumara numi ku Lama ka lrisi ka kiu si sima ki nilapulapwane; mavalracevacaku kwi patarumara numi kwi lwange, kiu, si erai ki kiu.

¹² Lu sukubu numi nakwane, aneane ku iluka amia numiane kilakikai nilapulapwane? Aneane ku alra bilibili liniane iluku si kabebetethe ki daaneli?

¹³ Inaku kwini kadrwa ku paluludane ka lasapatarumarane; kai nau lri sabalringa kwini lama numi kwi sangwalreme; kainaku wabesere kwi patarumara numi lu pathagili ki dramare si Taisadrasadrane ka vai numi, si tayelrelrelreane numi ka kiasusu; kwini la drihai numi ngwalai ki pasalrivane numi si kakadrwa ku paluludane.

¹⁴ Mavalracevacaku turamuru kwi sapatarumarane numi lu pathagili ki dramare si lamakaelaela ka lrisi ki takisuswane, ki lakikwini amecengali ka matelrege, kainaku lri ubangalre peelanga siamece.

¹⁵ “Lu cidingi numi kwi alrima inulri, kainaku lri kilalra; adravane ka thaininu ku inulri numi, kainaku lri kilalra patuelre; asi lwiyane kwi alrima numi swaete kwi kiame ka erai.

¹⁶ Kunumi mubanava ngibabula, madha padrelenga nakwane lu pasalriu numi, makakaiya isadra ku apasalrivane patuelre!

¹⁷ Si kicawcakwane ku aparamaramavane, twadrau ku dringelresane, paralubu ku kiadredredrepete, palribulu ki pakulrulrulu, si pasikai kawriva ki lawalibakane.”

¹⁸ Ku Tamatama amia kai, “Bwala, tamadrikidrikisi ku vaga! Adravane kadulinga kwi pasalrivane numi, lri tara pakabulaku numiane mia ki pasabu. Adravane kaicelrenge ku duliane ku pasalrivane numi, lri pakalrapungaku numiane mia ki ubale ki kiu.

¹⁹ Alaiyasi pasalaladha numi nakwane, lri dulru numi kane ku mathariri ku nikaungane.

²⁰ Alaiyasi pasiwlri numi nakwane, baebalre nakwane, lri kiaralrabu pacai. Tamatamaku, ka amia kai pelaela.”

Pasalrivane ka cekele

²¹ Kikai cekele nasavaeva kai apapiyaiya, kikainga laka mararamau ki tiatiame ka ababai! Ku siaswalane ku laumawmase aparamaramau si kapapedrenge, kikainga kathanenga kudra papacai ki umawmase.

²² Yerusalrime, nakingi valengasu ka mia ki kagingiane, ai kaiasasane kadruanga ku paluludane; ku siaswalane miasu ki sangwaesai ka bava, kikainga la akabalrithi ka kadrwa ku tasangumanemanane ka acilai.

²³ Kwi tabebelenge numi ki kunkwane yai wabaebaebalre, maredededele ki sadre, marau makanaelre ki kaika madringelrese ka akaesadhane, si malra ku pavangalre; kai palribulribulu ki pakulrulrulu, la kai pusakaikai ki lawalibakane.

²⁴ Kikai, naika kialalra numi ku taiyane ku vaga ki abebeelengenga ka Tamatama ka abebeelengenga ki sanaka kwapingi, ka madradraunga ku puku ka Twaumase ki swa Iseraylri. Amia kai, “Ukalavalava, badhali! Lri bilriaku pakanaelre ku lisianeli;

²⁵ Lri kiecebenga naku numiane. Lri derenavaku numiane, mia ki apwi ka wathalethale ki kingi, lri mwalra patuelre kwi kudrulru numi.

²⁶ Lri pelaku patarumara kai puku si baai ki tabebelenge numi ki kunkwane si latakivagane. Lukamiyaiya kai, kai Yerusalrime lri kipasudalepe ka madringelrese ka cekele, ka pangiamia ka asudralrwalrwane ka cekele.”

²⁷ Asi lwiyane ku Tamatama madringelrese, lri tara palribulu Yerusalrime si yakai ki cekele sanaka ngiatatupeela ka umawmase.

²⁸ Ai lri baburau ki pasalriu si wabaebalre ka umawmase; lri amudu ki wacilri iniane ku umawmase.

²⁹ Kunumi ka latwababengelradhane, la alra ku angatu tutwaumase si sukusukubu ka laumawmase lri tara kiarubuane si kitusinalreme.

³⁰ Lri kalraici numi, mia ki wapacai ka angatu, mia ki kaika nipwacilaciladhane ka mawivaivai.

³¹ Ku rudame ka angatu sana kimwa ki apwi kwadalai, ikai numiane kudra sapukwane ku umawmase lri ka miyaiya kai; kwi lalasu lri ngwalai ki ngangane ku kakwakudhane lini si kamudu, kadrwa ku umawmase ku lri dulru palribulu liniane.