Jobe 1 - Bhaibheri Rakachena muChindau

Sathani Unoedza Jobe

¹ Kwaiya nomunhu munyika yeUzi, zina rake ndiJobe. Nouwo munhu waiya akaperera nokururama, naye waimutya Mwari, echitenderuka kubva kunezvakashata.

² Kwakaberekwa kwaari vakororo vanomwe nevanasikana vatatu.

³ Waiya nemakwai makumi emazana manomwe (7,000), makamera makumi emazana matatu (3,000), kabi dzemajoka mazana mashanu (500), zvimbongoro zvehadzi mazana mashanu (500), nevaranda vakawanda kakurutu; ndizvo uyu munhu waiya munhu mukuru kupinda veshe vanhu vokumabvazuva.

⁴ Vakororo vake vaigara vechiita madhiri kumhatso youmwe ngaumwe wavo ngokuteererana kwezuva rake; vaizotuma nokukoka hanzvadzi dzavo nhatu kuti vadye nokumwa nadzo pamwepo.

⁵ Naapo mazuva edhiri apera, Jobe waizotuma kuti avachenese, naye waizomiruka mangwanani maishi nokupira midiro yokupisha kudai ngouwandu hwavo veshe; ngokuti Jobe wakati, “Pamweni vakororo vangu vangadai vakashaisha nokutuka Mwari mumwoyo mwavo.” Jobe waiita izvi nguva dzeshe.

⁶ Zuva rimwe ngirosi dzaMwari dzakauya koodzionisa pamberi paMambo Mwari, naSathani wakauyawo pakati padzo.

⁷ Mambo Mwari wakati kunaSathani, “Wabva kuri?” Naapo Sathani wakapingura Mambo Mwari, akati, “Kubva kuenda mberi nesure panyika, nokubva mukukwira nokudzaka padera payo.”

⁸ Mambo Mwari wakati kunaSathani, “Wakambokarakadza here ngomuranda wangu Jobe, kuti akuna naumwe wakadai ndiye panyika, munhu wakaperera nokururama, unotya Mwari, nokufuratira kubva kunezvakashata?”

⁹ Zvino Sathani wakapingura Mambo Mwari, akati, “Jobe ungatya Mwari pasina chiro here?

¹⁰ Auzi kumuitira rushosha kumutendenedza nemhatso yake, nazvo zveshe zvaanazvo, kumarutii eshe here? Iwewe wakafumisa mishando yenyara dzake, nepfuma yake yakawanzwa munyika.

¹¹ Asi zvino tambanudza nyara yako, ugwame izvo zveshe zvaanazvo, naye unozokutuka pamberi pehope yako.”

¹² Mambo Mwari wakati kunaSathani, “Zvakanaka, zveshe zvaanazvo zviri pashi pesimba rako; kwega usaisa nyara yako padera pake.” Ndizvo Sathani wakabuda kubva pamberi paMambo Mwari.

Vana vaJobe noUpfumi Zvinoparadzwa

¹³ Rimwe zuva apo vakororo vake nevanasikana vechidya nokumwa vhini mumhatso yomukoma wavo mukuru,

¹⁴ yakauya nhumwa kunaJobe, yakati, “Kabi dzairima, nezvimbongoro zvechifura ngepasinde padzo,

¹⁵ nevaSabheani vakaguma kwedziri, vakadzibvuka; vakauraya varanda ngokupinza kweshoti; inini ndega ndapokonyoka kuuya kookuronzera.”

¹⁶ Naapo achaereketa kudaro, kwakaguma umweni, akati, “Muriro waMambo Mwari wakadzaka kubva mudenga, wapisha makwai nevaranda, ukazvipedza; inini ndega ndapokonyoka kuuya kookuronzera.”

¹⁷ Naapo achaereketa kudaro, kwakagumazve umweni echiti, “VaKharadhea vakaita zvikwata zvitatu, vakauya vakabvuka makamera, vakaenda nawo, vauraya varanda ngokupinza kweshoti; inini ndega ndapokonyoka kuuya kookuronzera.”

¹⁸ Naapo achaereketa kudaro, kwakaguma umweni echiti, “Vakororo vako nevanasikana vaiya vechidya nokumwa vhini mumhatso yomukoma wavo mukuru,

¹⁹ paripo pakavhuvhuta dutu guru rechibva mushango, naro rakasukumidza makhona marongomuna emhatso, yakawa padera pevana vatsva, navo vafa; inini ndega ndapokonyoka kuuya kookuronzera.”

²⁰ Zvino Jobe wakamiruka, akabaura zvokufuka zvake, akapara soro rake, akati dhuma pashi, akadira.

²¹ Akati, “Ndakabuda kubva mundani yamai angu ndiri mutitinini, neni ndinozohwirira ndiri mutitinini; Mambo Mwari wakapa, naMambo Mwari watora; ngarikudzwe zina raMambo Mwari.”

²² Muneizvi zveshe Jobe aazi kushaisha, nokuti kuitira Mwari ndaa dzokushaisha.