YOEL 1 - Ngochang

¹ Heika Pethuel dah lo Yoel jyank mas jweh los, Yhensain dah loeus nghuot.

Jyo Dyoqbis loh cho Kuk

² Logis jens eh, kamp gyo geh. Yuda mau mas nyeis bang yuk khanghmuh gyo geh. Heiteh zis namoq caiq lyis, nghuot ya namoq phauh thyeih moq caiq lyis bweh ku lhyeh?

³ Hauh cho namoq lo jens lyis taiq kyoh geh. Nyamoq gas nyamoq lo jens lyis taiq kyoh das. Tsai nyamoq gas nyamoq lo jens vcaiq caiq lyis taiq kyoh das.

⁴ Janghgyik dvphung thang lhyi dvphung jyo zains mas nyeis. Dvphung zo nyhet zis gas gohtoeu dvphung nyhau tyamp.

⁵ Yhei pauhzoe jens eh, yhet soh las ngaus geh; zvbiq shuk bang eh, ngaus geh; zvbiq saiq xiklyis dah zvbiq shih gas monh goeus.

⁶ Yah mau mas dius dvnyau dah jesphung los zan goeus. Nyamoq gas yomsoq bos las ma thoq suon lo shoq nyo; nyamoq dah zwis gas khangkhyi dah zwis teh zuk.

⁷ Nyamoq gas yah zvbiq nwis lyis mhont tyamp goeus, yah maiphang zains lyis zo tyamp. Nyamoq gas saiq ko jens thyoeu joq shoq vkuk cwe lha tyamp.

⁸ Dius jens eh, nyang yah phoengh wvng das yukgis shei tyamp las kuk dah lonyi teh, ngaus geh.

⁹ Yhenmuh mas dyei das jyo yahge zvbiq ma joq lo. Phudyei bang gas Yhensain xiklyis jyungshuk dyei das zis ma yoh lo yvmvyah tsain kuk nyeis.

¹⁰ Nyang zungs vkom dvtsain nghuot. Jyo yonh goeus, zvbiq shih kyuk goeus, tsanlun zains nyhauh goeus yvmvyah maunyeis kuk nyeis.

¹¹ Yos zwi bang eh, kuk geh. Zvbiq khyam dyangh bang eh, ngaus geh. Khasoeh ge lyis sunghso yahge yoh, nghuot goeus jyo dvnganh monh goeus.

¹² Zvbiqnwis yahge maiphang zains tsain nyhauh goeus. Shih dvnganh nyhauh shei goeus. Dius dah gauslaus cho dyuk loh.

¹³ Phon mha phuqsoe dah phudyei bang eh, yanghthung dyi wuot las ngaus geh. Yhenmuh mas loh las dvnyens gonh kuk geh. Yah Mangso lhyi dyei das jyo, zvbiq ma joq lo.

¹⁴ Womkyi das xiklyis vmingh dyei geh; moqphung zop huom das zis lui geh! Uhshe bang lyis tsainh las Yuda dius jens dvnganh Yhensain namoq Mangso dah Yhenmuh mas wvng las nyang lyis kaiq sang geh.

¹⁵ Yhensain dah buisnyeis ni goeus. Maukhung Jesphung dyoqbis cho she los buisnyeis nghuot das. Houka khateh gyukphoh buisnyeis nghuot das lah!

¹⁶ Yang yoeuh nyeis lyis yah jyo yonh loh. Yah Mangso dah Yhenmuh mas gauslaus cho ma bos lo.

¹⁷ Jyo nyau gas nyeis kyuk khau mha shei tyamp; toh das jyo ma bos las jyi ka vkom tsain dyoq gyoh joq

¹⁸ Noeu jens gas nyamoq xiklyis katjang ma bos yvmvyah shanghsenh las tsain ma nyeis. Yvng phung jens eq xauh kham zo nyeis.

¹⁹ Yhensain eh, ngos nvng lyis lui; khasoeh ge lyis katjang yahge saiqzains jens gas nyi ngeh teh kyuk tyamp.

²⁰ Yewus jens yangh nvng lyis kaiq lui nyeis. Khasoeh ge lyis jeislo lvng jens kyuk loh goeus.