HEBRE 1 - Ngochang

Mangso Dang gas Lo masyah

¹ Gohlhain caiq lyis Mangso ka yah phauh thyeih moq lyis dang taiq cho nyoshoq lhain, neh vja ja khyvlyis yah lvpe jens dah nhuot yah taiq kyoh lai los goeus.

² Nghuot laus eq hai thang thank dah buisnyeis lyis gas nyah Lo dah nhuot masyah yang lyis nyah dang dyei goeus. Hau Lo yah dwis ya dwis yvlyis gvnkhanh toh goeus zis yahge thang thank lyis mungkvn gonh lyis guon das soeu duot das nyhenshang Nyang lyis khyen toeuq toh goeus.

³ Nyang gas Mangso dah phunk duk bvng yvlyis Chixoeuq las Mangso nyang dah gungs khyank tsungh zis yah mungkvn buislom lhamhmuh joq ya joq zis dvnganh lyis nyah yomsoq bos dah Dang yah gomh toh. Nyang gas cangsoeu dius dah yaunos lyis yobos khyuot cheihshang cho dye kuot thang lhyi maukhung mha zauguon yomsoq bos Mangso dah loqyos shot pheh tsung toh.

Mangso dah Lo Kuhxing

⁴ Mangso nyang lyis dyei dah nyings gas loeuswons bang dah nyings thoq lyis zes kuh las lo lyis loeuswons bang thoq lyis zes phauhdap soeu kuot goeus.

⁵ Khasoeh ge lyis Mangso ka, Nvng ngah Lo nghuot, Khvnyhik ngos nvng lyis ngah gungs masyah yaus kat, ge eq, Ngos gas nyah Uwus duot las, Nyang eq ngah Lo duot das, ge eq khah loeuswons soeu lhyi eq Mangso khanhamp eq ma taiq ku.

⁶ Nghuot laus eq Mangso ka nyah Lo xeih lyis mungkvn mas nhang kat das sont uhlyis, Nyang gas, Mangso dah loeuswons bang dvnganh nyang lyis paiq bas jungh, ge taiq kat.

⁷ Mangso ka loeuswons bang dah cho taiq uhlyis, Mangso ka nyah loeuswons bang lyis lyeis kuot las, Nyah jyeidwis jens lyis nyilhyam kuot, ge.

⁸ Tsai hau Lo dah cho taiq uhlyis, Mangso ka, Mangso eh, nah munghdan vcaiq vto joq das! Nvng gas nah dius nyau jens lyis lyi jus khyvlyis guon.

⁹ Nvng gas dan cho lhyi jyet las shuot cho lhyi hoeng. Housoeh yvmvyah Mangso ge dah nah Mangso ka, nvng lyis khyen yoeus las nah dyenschangh lyis dyei thoq lyis zes kuh dah gausyis nyoqnho ngelang dyei las chunghtoq, ge.

¹⁰ Tsai, nyang gas, Yhensain eh, cangxeih uhlyis nvng nyeisjvng vpom xi toh las, Maukhung lhyi nah loq yah kuot toh.

¹¹ Hauh zis gas tsain dyuk loh das laus eq nvng gas goeng joq das. Hau dvnganh gas dyimis teh tsain tyang tyamp das.

¹² Nvng gas hauh vyhang lhyi thoq dyi lyis teh nap tyamp das las hauh zis gas dyimis teh thaiq tyamp zis tsain xauh das. Nghuot laus eq nvng gas vjangh vgus dvnghuot las, nah kang khanhamp eq ma thank das.

¹³ Mangso ka nvng lyis gomloeus toq bang lyis ngos nah nangte kuot shoq Ngah loqyos shot pheh tsung toh aq, oen khah loeuswons soeu lhyi eq khanhamp ma taiq ku.

¹⁴ Housoeh lyis loeuswons bang gas hank tsain nghuot lah? Nyamoq gas, khyuot yoeus dah vso vlho kham yoeus bang lyis pangh das nyhenshang Mangso yah nhang kat zis xauh bang, Mangso lhyi phuqsoe nyeis dah dyos tsain nghuot.