Aanlyn Bybel

Tayitɔs 1 - Aŋwɛʼrɛ Ebuumu Fe Nè Ngwe

Paalo sàa atsaʼra ebe Taytɔs

¹ Aŋwɛʼrɛ zɔnɔ ne zeʼe ebe Paalo wɛ mwɔ gho afwɛʼ Ngwe mane m̀pwɔnɔntɔm Yeso Kristo ngɛ. Â chi angu sàa é kpèdè ebɛrɛtaa bɔ Ngwe byɛ â chi ngɛ gbee angɔ ene éŋwaʼa wɛ ebwa Ngwe bɔ̀ à tee ngɛ.

² Ebɛrɛtaa zɔnɔ ne zeʼe ene ezhuŋu kɔʼɔ ene etyê kengudu. Ngwe yɛ ne ma ga andɔɔ bo ngɛ à tɔ̧ɔrɔ abɔ etyê wunɔ dye ese sa klada.

³ Endzobo à koʼ engɔ tee apɛpɛ efwɔ ekɔn mɔ. E wu mmɛ ma sɛ̀ɛrɛ̀ nyɛ̀rɛ̀ zèʼe ene ekama yɛ Ngwe M̀pwèerèse bɔ̀ à ndɛʼ ena ngɛ.

⁴ Mmɛ na ŋwɛ̀ʼrɛ̀ ebe Taytɔs ŋwɔ éŋwaʼa ngu ene ebɛrɛtaa yɛ mbyɛɛ me ma ngɛ. Ngwe àtɛ bɔ̀ mane Yeso Kristo M̀pwèerè bɔ ndɛʼ enarataa mane m̀bwarambwad endɔn.

Afwɛʼ Taytɔs a Kret

⁵ Mmɛ Paalo, mmɛ à shi awɛ abɛ Kret mbɔʼtye ngwo todo abwa yɛ â ma ke kpe é le ngɛ, è gɛrɛ ge eto ndɔngwe efwɔ ashimabɛ gimkpaʼ. Zhuŋu abwa yɛ mmɛ à peʼre àtimi njɛ anyi ngɛ.

⁶ Ato efwɔ ndɔngwe na gho deʼ wɛ ne me le ḿfiri deʼ ekwa mɔ bo ngɛ, è me le tye aye ŋwaʼ, bwɔ ngɔ me bɛrɛ ebwa Ngwe ne ma byɛdɛ kà ma le kèzobwa bo.

⁷ Enga aŋu ato efwɔ ndɔngwe me klini afwɛʼ Ngwe ngɛ, e we nara kpe engɔ ne me le ḿfiri deʼ bo. Engɔ ke ma bɔɔ ega, kà ma zamma bɔɔ etaa, kà ma ŋwɔ mɔm byɛdɛ, kà àngwè m̀bùʼrù, kà le andɔŋɔ ekɛb bo.

⁸ Engɔ ma bwɛ àgɔn a ndɔ mɔ gɛrɛ me doʼo abwa ǹchwɔ̀. Engɔ ma kɔʼ ekwa mɔ, ma le abwa ene aghɛʼ yɛ a me koʼro ngɛ, me pɛ gɛrɛ me klidi.

⁹ Engɔ klini ekɔn anchwɔnchwɔ, ekɔn wɛ bɔ me né shi ńtara àmɔ̀ anyi ngɛ, tee ebwa wɛ e me koʼro nè echwere ǹchwɔ̀ ngɛ. E ne aghɛʼ zɔnɔ engɔ wa ngo nɛɛ ǹji é twàʼrà abɔ abê ene éŋwaʼa wɛ engɔ ma tee ngɛ gɛrɛ me né tee anyimabwa abɔ byɛ e ma fɛ̀ɛrɛ nè engɔ ngɛ.

¹⁰ Bɔ akɛkɛ ba aŋu, ndanda angɔ e me bɛrɛ ene ebwa Ngwe bɔ Juu ambèmbè ngɛ, e ma le efɛɛrɛ abwa ma ndooro bɔ ene atii àmɔ̀ ngɛ.

¹¹ E we nara é gba angɔ mbɔʼnga e ba buguru ndɔrɔ bɔ ma tee abwa yɛ a ne me koʼro é tee bo ngɛ. Angɔ na le abwa zɔnɔ gimkpaʼ tye ene andɔŋɔ ekɛb. Ne eju!

¹² Na gho Kret mɔmbwo, àmɛnɛkɔn angɔ ebi à ga éŋwaʼa kpe, “Bɔ Kret na andɔɔndɔɔ, nyɛmɛrɛ ǹchù, mwɔ ewerewere shi mwɔ ekuʼ nde.”

¹³ Ebwa wɛ egho wunɔ a ga ngɛ ne éŋwaʼa. Ne ǹji yɛ mbɔn me koʼro é gba angɔ ekamakama ngɛ, mbɔʼtye ebɛrɛtaa bɔ bɔ̀ me kama.

¹⁴ Ewunɔ wa le angɔ ne wu twàʼrà amɔ é zhuru nklamara sam bɔ Juu mane atɛʼɛ yɛ â me zeʼe ebe bɔ byɛ e ma tee abwa yɛ ne mwɔ éŋwaʼa ngɛ bo.

¹⁵ Ela gimkpaʼ be pɛ ebe abɔ byɛ e me pɛ ngɛ, bɛʼngɛ tsɛʼ ala deʼ a me pɛ ebe abɔ byɛ e ne me pɛ ne me le ebɛrɛ ngɛ bo, mbɔʼnga azhuŋu mane etaa angɔ ke pɛ bo.

¹⁶ Bàtee abwa andɔɔ ba ga kpe mbɔɔ be nɛɛ Ngwe, bɛʼngɛ eleabwa angɔ toʼo enji angɔ. Angɔ ba le abwa yɛ bɔ ne me doʼo bo ngɛ. Angɔ ke ma le abwa yɛ Ngwe ma ke ngɛ bo. Angɔ ke ne le ebwa ǹchwɔ̀ deʼ ka mpiʼ nɔ bo.

« Vorige

Volg ons:

Geborgde skakels

Advertensies