Aanlyn Bybel

Bɔ Rom 1 - Aŋwɛʼrɛ Ebuumu Fe Nè Ngwe

¹ Mmɛ Paalo, gho afwɛʼ Yeso Kristo, wɛ Ngwe à chi shi kpe è mwɔ m̀pwɔnɔntɔm gɛrɛ sa yɛrɛ sɛ̀ɛrɛ̀ ega Ngwe ngɛ, na mmɛ à me ŋwɛʼrɛ aŋwɛʼrɛ zɔnɔ.

² Ngwe à tɔ̧ɔrɔ Ekɔn ǹchwɔ̀ wɛ bli egha tsɛrɛ efwɔ aŋwɛʼrɛ pɛ nyɛ̀rɛ̀ zèʼe achim bàmɛnɛkɔn mɔ.

³ Ekɔn ǹchwɔ̀ wunɔ na ga mbɔʼ ŋwɔ mɔ, Yeso Kristo Masakɛ bɔ, wɛ â be engɔ nyɛ̀rɛ̀ zèʼe efwɔ ekla Devid ngɛ.

⁴ Ngwe à tee engɔ ene ekama mɔ, é mwɔ ŋwɔ mɔ nyɛ̀rɛ̀ zèʼe ene azhwɛɛrɛ pɛ, aŋu engɔ à zhwɛm ene ewu, wɛ mwɔ Yeso Kristo Masakɛ bɔ ngɛ.

⁵ Éngɛ enyɛrɛ zeʼe achim Yeso Kristo, Ngwe a ndɛʼ enarataa endyɛɛ é mwɔ m̀pwɔnɔntɔm Ngwe, é le kpe ebɛ gimkpaʼ sa le ebɛrɛtaa ene ekumu ngɔ, gɛ̀rɛ̀ sa zo abwa ene egha Yeso Kristo.

⁶ Ngwe à gɛrɛ shi zɔʼɔ angɔn mbɔn bɔ abɛ Rom é zeʼe mwɔ bɔ Yeso Kristo.

⁷ Enyɛrɛ éngɛ, mmɛ na ŋwɛ̀ʼrɛ̀ aŋwɛʼrɛ endɔn, mbɔn bɔ gimkpaʼ efwɔ abɛ Rom byɛ Ngwe me doʼo gɛrɛ shi zɔʼɔ é mwɔ bɔ ngɔ ngɛ. Enarataa mane m̀bwarambwad mwɔ nè mbɔn nyɛ̀rɛ̀ zèʼe ebe Ngwe àtɛ bɔ gɛrɛ zeʼe ebe Masakɛ Yeso Kristo.

Paalo ndɛʼ ebɛrɛ ebe Ngwe mbɔʼ bɔ abɛ Rom

⁸ Mmɛ wa dye ndɛʼ ebɛrɛ ebe Ngwe ndza mbɔʼ mbɔn bɔ gimkpaʼ, nyɛ̀rɛ̀ zèʼe achim Yeso Kristo, mbɔʼnga bɔ ba ga mbɔʼ ebɛrɛtaa ndzɔn efwɔ ese gimkpaʼ.

⁹ Mmɛ wa tsàʼrà Ngwe ato ndzɔn akyɛ gimkpaʼ, Ngwe yɛ mmɛ ma fwɛʼ ebe engɔ ene etaa mfu gimkpaʼ é ma sɛ̀ɛrɛ̀ ekɔn ǹchwɔ̀ mbɔʼ ŋwɔ ngɔ ngɛ, we nɛɛ kpe mmɛ ga éŋwaʼa.

¹⁰ Akyɛ gimkpaʼ yɛ mmɛ ma tsàʼrà Ngwe ngɛ, mmɛ na tsàʼrà Ngwe kpe mala engɔ me doʼo, endzobo shi koʼo è le mmɛ shi zeʼe gamma endɔn enjitsɔ.

¹¹ Mmɛ wa ke zeʼ zɔ angɔn, mbɔʼtye mmɛ le mbɔn le m̀bɔ̀nɔ ene atɔ̧ɔrɔ yɛ Ngwe ma ndɛ̀ʼ ebe bɔ nyɛ̀rɛ̀ zèʼe ene azhwɛɛrɛ mɔ ngɛ, ewunɔ wa ngo kaama azhwɛɛrɛ ndzɔn.

¹² Éngɛ me gâ kpe, enyɛrɛ zeʼe ene ebɛrɛtaa ndza, mmɛ wa twàʼrà angɔn mbɔn gɛrɛ twàʼrà angu nyɛ̀rɛ̀ zèʼe ene endzɔn ebɛrɛtaa.

¹³ Bwɔngwa mbu achim Yeso Kristo, mbɔn nɛ̀ɛ kpe mmɛ à shi tsoro tɔ̧ɔrɔ akyɛ akɛkɛ é zeʼ abwaʼ ndzɔn, bɛʼngɛ, abwa tsɛrɛ ma kɔrɔ angu é zeʼ, bwɛn enjitsɔ. Mmɛ wa ké le bɔ abwaʼ ndzɔn bɛrɛ ene Ngwe na aŋu mmɛ à shi le abwaʼ ebɛbɔ abê ngɛ.

¹⁴ Mmɛ ne na gho enjwè ebe bɔ gimkpaʼ nɔ, ebe bɔ Grik mane ebɛbɔ Grik, ebe angɔ byɛ e me le azɔm mane angɔ byɛ e me ntwɔɔ ngɛ.

¹⁵ Ne ǹji yɛ mmɛ a dama ke é sɛ̀ɛrɛ̀ ekɔn ǹchwɔ̀ endɔn gɛrɛ ngɛ, mbɔn byɛ mbɔn ma tsɔmɔ abɛ Rom ngɛ.

Ekama yɛ e mwɔ efwɔ ekɔn ǹchwɔ̀ ngɛ

¹⁶ Mmɛ ke ma jù é sɛ̀ɛrɛ̀ ekɔn ǹchwɔ̀ mbɔʼ Kristo bo, mbɔʼnga ekɔn ǹchwɔ̀ ne ekama Ngwe yɛ ma pwèerè bɔ gimkpaʼ byɛ e me le ebɛrɛ ngɛ, e klada ene bɔ Juu gɛrɛ tɛ̀ʼrɛ ebɛbɔ.

¹⁷ Ekɔn ǹchwɔ̀ wunɔ wa tee apɛpɛ aŋu Ngwe ma le bɔ me koʼro efàarà engɔ ngɛ, ewunɔ ne klada ene ebɛrɛtaa ngɔ̀ɔ ngùdù ene ebɛrɛtaa, aŋu e me ŋwɛʼrɛ kpe, “Abɔ byɛ e ma le abwa yɛ a me koʼro efàarà Ngwe ngɛ ba ngo tyè àkɔʼɔ nyɛ̀rɛ̀ zèʼe ene ebɛrɛtaa àmɔ̀.”

Eboo Ngwe ene abwa bɔɔbɔɔ yɛ bɔ ma le ngɛ

¹⁸ Eboo Ngwe shi tee amɔ zeʼe ezob mbɔʼ abwa bɔɔbɔɔ mane ǹchù yɛ bɔ ma le ngɛ. Bɔ byɛ eleabwa angɔ ma kɔrɔ bɔ é nɛ̀ɛ éŋwaʼa mbɔʼ Ngwe ngɛ.

¹⁹ Abwa gimkpaʼ yɛ e me né nɛ̀ɛ mbɔʼ Ngwe ngɛ, ye tee amɔ apɛpɛ ebe angɔ, Ngwe mɔmbwo a shi tee ebe angɔ.

²⁰ Enyɛrɛ èndzobo chɛ Ngwe a ndèerè ese ngɛ, ekama kemyɛ ngɔ, ezɔɔrɔ ngɔ na Ngwe nɔ, mane ezɔɔrɔ ngɔ yɛ e ne ma zɔ bo ngɛ ye tee amɔ apɛpɛ, enyɛrɛ zeʼe ene ela byɛ engɔ me ndeere ngɛ, mbɔʼtye gho deʼ ne ga kpe mbè à ke me nɛ̀ɛ ebwa deʼ mbɔʼ engɔ bo bo.

²¹ Angɔ à ne nɛɛ mbɔʼ Ngwe, shi ne ghɔ engɔ na Ngwe nɔ bo, kà gɛrɛ shi ndɛ̀ʼ ebɛrɛ ebe engɔ ene abwa yɛ engɔ shi le ngɛ bo. Bɛʼngɛ, angɔ à klada sa zhuŋu ma abwa atii, azhuŋu angɔ gimkpaʼ le ńtara kɛ́ɛ angɔ di.

²² Aŋu angɔ à ma tee kpe mbɔɔ be le azɔm ngɛ, angɔ firi bɔ atii.

²³ Angɔ nu enɛŋɛrɛkɛ Ngwe yɛ ne ma ku bo ngɛ, gɛ̀rɛ̀ sa ndɛ̀ʼ ebe ngwere bli chɛ e me ndeere ene ebwo ngɛ. Ngwere bli chɛ mwɔ na bɔ byɛ e ma ku ngɛ. E me nu ezɔɔrɔ ènɔ̀n, nyɛmɛrɛ mane engamala byɛ e ma kwo abum àmɔ̀ a chwâ ngɛ.

²⁴ Éngɛ, Ngwe à chi abwo mɔ ene abɔ byɛ. Engɔ gɛrɛ shi sàara angɔ é sa le abwa mfiri yɛ ńtara angɔ ma ke ngɛ. Angɔ ba fwɛʼ abwa yɛ à ma ndɛʼ eju ngɛ àmɔ̀ àmɔ̀.

²⁵ Angɔ shi tɔrɔ é bɛrɛ éŋwaʼa mbɔʼ Ngwe, sa bɛ̀rɛ ma andɔɔ. Angɔ na ghɔ ma zhuru me ebe ela byɛ Ngwe me ndeere ngɛ, wɛ aye ghɔ ma Ngwe yɛ me ndeere ela byɛ ngɛ. Ne engɔ wɛ e me koʼro é ghɔ akyɛ gimkpaʼ ngɛ! Ekoʼro.

²⁶ Enyɛrɛ zeʼe ene ebwa wunɔ, Ngwe shi chi abwo mɔ ene angɔ, e sa fwɛʼ abwa ju yɛ angɔ ma doʼo é fwɛʼ ngɛ, ndanda ene ebwa aye mane anɔm. Ebe aye angɔ é le andɔŋɔ ene anɔm, e sa le me ene aye abê.

²⁷ Nkirinkin ebe anɔm, angɔ a ye ma afwɔ nè aye nɔ, e sa le andɔŋɔ me ene anɔm abê. Enyɛrɛ zeʼe ene abwa ju yɛ angɔ ma fwɛʼ nè anɔm abê ngɛ, Ngwe ge enyii yɛ e me koʼro ekwa angɔ ngɛ na enɛrɛ nɔ.

²⁸ Na aŋu abɔ bɔnɔ â tɔn é shi éŋwaʼa wɛ angɔ me nɛɛ mbɔʼ Ngwe efwɔ ńtara àmɔ̀ ngɛ, Ngwe saara ńtara angɔ e sa fwɛʼ abwa ju yɛ â ne me koʼro kpe angɔ fwɛʼ bo ngɛ.

²⁹ Ńtara angɔ à ne shwe ene m̀pèrè abwa ǹchù gimkpaʼ, ma tsɔmɔ efwɔ abwa bɔɔbɔɔ, àngwa, mane é le ńtara bɔɔbɔɔ ekwa abɔ tsɛrɛ. Ńtara angɔ gɛrɛ tse shwe ene aghɔʼ, é zhudu bɔ, é ngwe m̀bùʼ, é bidi bɔ, emɔ ala mane é le ezhuŋu bɔɔbɔɔ mbɔʼ abɔ tsɛrɛ. Angɔ ba nde ewɔ̧ɔ gɛ̀rɛ̀ shwèdè abwa.

³⁰ Angɔ a na ga abwa bɔɔbɔɔ mbɔʼ àmɔ̀ àmɔ̀. Angɔ ba gwè Ngwe ma nyɛ̀ bɔ, wu̧ru ndzɛ̀rɛ̀ ma ngbèdè abɔ abê ma bèʼrè ekwa gɛrɛ ma bùʼru enɔm. Angɔ ba zhuŋu tye eghɛʼnji tsɛrɛ akɛkɛ é le abwa bɔɔbɔɔ. Angɔ ba le kèzobwa ebe èngwa àmɔ̀.

³¹ Angɔ ke le etaasɔn bo. Angɔ ke ma shi atɔ̧ɔrɔ àmɔ̀ bo, e ke ma fwɛʼ ebwa ǹchwɔ̀ ka tee eklasɔn ebe abɔ be bo.

³² Angɔ be nɛɛ kpe etsɛrɛ Ngwe ye ga kpe abɔ byɛ e ma fwɛʼ m̀pèrè abwa tsɔnɔ ngɛ ba kudu bɛʼngɛ, ke tye kpe angɔ ba le abwa ŋwàʼ zɔnɔ bo, e gɛrɛ ba twàʼrà abɔ tsɛrɛ byɛ e ma fwɛʼ abwa zɔnɔ ngɛ.

« Vorige

Volg ons:

Geborgde skakels

Advertensies