Bɔ Filipi 1 - Aŋwɛʼrɛ Ebuumu Fe Nè Ngwe

¹ Aŋwɛʼrɛ zɔnɔ ne zeʼe ebe Paalo mane Timatyɛ, bɔ afwɛʼ Yeso Kristo. Angɔ ne ŋwɛʼrɛ sàa ebe bɔ abɛ Filipi byɛ e mwɔ ene ebuumu nè Yeso Kristo ngɛ, mane eto ndɔngwe mane abɔ e ma kpèdè a ndɔngwe ngɛ.

² Ngwe àtɛ bɔ mane Masakɛ Yeso Kristo tee enarataa mane m̀bwarambwad endɔn.

Paalo tsaʼra Ngwe ato bɔ Ngwe a Filipi

³ Mmɛ wa bɛ̀rɛ Ngwe ndza mbɔʼ mbɔn akyɛ gimkpaʼ yɛ mmɛ zhuŋu angɔn ngɛ.

⁴ Akyɛ gimkpaʼ yɛ mmɛ ma tsàʼrà Ngwe mbɔʼ mbɔn ngɛ, mmɛ na tsàʼrà ene egɛnɛ.

⁵ Mmɛ na le énde mbɔʼ aghɛʼnji yɛ mbɔn shi kpede angu ene afwɛʼ ǹtɔm ǹchwɔ̀ enyɛrɛ zeʼe ene eklada bwɛn ànchwɔ̀ ngɛ.

⁶ Éngɛ mmɛ we bɛrɛ kpe Ngwe yɛ à klada afwɛʼ ǹchwɔ̀ zɔnɔ nè mbɔn ngɛ wa ngo fɔɔ embè bwɛn anji yɛ Yeso Kristo ma ngɔ zeʼe ngɛ.

⁷ Mmɛ na zhuŋu angɔn akyɛ gimkpaʼ! Éngɛ ngɛ e me koʼro ena é zhuŋu na aŋu mmɛ ma zhuŋu mbɔʼ mbɔn ngɛ, mbɔʼnga ntsɔ shi buumu ebwa kɛ wɛ Ngwe me ndɛʼ ena mane mbɔn ngɛ egimi, enjitsɔ wɛ mmɛ mwɔ a ndɔdzɔm mane endzobo ngɔ yɛ mmɛ à mwɔ ese ngɛ, é kɔŋɔ ekɔn ǹchwɔ̀ e me kama é fwɛʼ afwɛʼ mɔ.

⁸ Ngwe nɛɛ kpe mmɛ ga éŋwaʼa kpe ezhuŋu kamakam ndza ene mbɔn ne gli à zeʼe efwɔ etaa Yeso mɔmbwo.

⁹ Mmɛ tsaʼra Ngwe kpe edoʼ ndzɔn tɛb ngɔɔ embèembè nè azɔm éŋwaʼa mane etsɛrɛ asɛʼ nchwɔnchwɔ,

¹⁰ mbɔʼtye mbɔn me né chi ebwa wɛ e me nara fɔɔ azê ngɛ. Éngɛ a shi anji Yeso Kristo mbɔn ne me le abwo ene abwa ḿfiri mane ànkwɔ̀nɔ̀ deʼ bo.

¹¹ Éngɛ ewunɔ wa ngo le etsɔmɔ ndzɔn me shwe ene ezɔɔrɔ ǹchwɔ̀ yɛ à tye Yeso ma le ene eghɔ mane ezodo Ngwe ngɛ.

É tsɔmɔ ekɔʼɔ na Kristo

¹² Bwɔngwa mbu, mmɛ wa ke kpe mbɔn nɛɛ kpe abwa yɛ a shi gli ena ngɛ ye kpede é le kpe ekɔn ǹchwɔ̀ tɛb ngɔɔ embèembè.

¹³ Ewu le abɔ byɛ e ma kɔʼɔ ǹtɔʼ ngɛ mane abɔ tsɛrɛ anɔ nɛɛ kpe mmɛ na a ndɔdzɔm mbɔʼnga mmɛ mwɔ gho afwɛʼ Kristo.

¹⁴ E na é mwɔ a ndɔdzɔm shi ndɛʼ ekama ebe bwɔngwaanɔm mane bwɔngwaaye é bɛrɛ ene Masakɛ mbɔʼtye e sa sɛ̀ɛrɛ̀ ega Ngwe ne bum.

¹⁵ Abɔ deʼ na sɛ̀ɛrɛ̀ Kristo mbɔʼnga e ma ku m̀bog, adeʼ na sɛ̀ɛrɛ̀ ene àzhwɔ̀, bɛʼngɛ adeʼ na sɛ̀ɛrɛ̀ ene ezhuŋu ǹchwɔ̀ éŋwaʼa.

¹⁶ Abɔ bɔnɔ na sɛ̀ɛrɛ̀ ene edoʼ mbɔʼnga angɔ me nɛɛ kpe Ngwe shi ndɛʼ afwɔ ena é twàʼrà ekɔn ǹchwɔ̀ wunɔ.

¹⁷ Abɔ deʼ ke ma sɛ̀ɛrɛ̀ Kristo ene ńtara àmɔ̀ bo, bɛʼngɛ e na sɛ̀ɛrɛ̀ ma ke me ebûm àmɔ̀. Angɔ na zhuŋu kpe e na zhiiri ǹgoʼ ndza aŋu mmɛ mwɔ a dzɔm ngɛ.

¹⁸ Ewɛ ngɛ ke zɔ angu bo! Mmɛ we gɛnɛ angu aŋu e ma sɛ̀ɛrɛ̀ Kristo ene eghɛʼ gimkpaʼ ngɛ, ke mwɔ ene ezhuŋu ǹchwɔ̀ kà e bɔɔbɔɔ, mmɛ à da wa gɛnɛ angu.

¹⁹ Enga mmɛ we nɛɛ kpe atsaʼra Ngwe ndzɔn mane ekpede yɛ e ma zeʼe ebe Azhwɛɛrɛ Yeso kristo ngɛ ya ngo le mmɛ gli a ndɔdzɔm.

²⁰ Ebwa mmɛ ma ke efwɔ etaa mfu gɛrɛ ma zhùŋù à kɔ̀ʼ ngɛ ne ga kpe, mmɛ yà na afwɛʼ ndza saara, ke ku tan, ndanda enjitsɔ nɔ mmɛ wa mɛ̀ɛ kɔnɔshin anyi mbɔʼtye mmɛ ndɛʼ eghɔ ebe Kristo, ka mmɛ ku kà tye ekɔʼɔ.

²¹ Enga ena é tsɔmɔ ekɔʼɔ na Kristo, é ku mwɔ ǹtsara.

²² Bɛʼngɛ mala mmɛ fɔɔ embè é mwɔ ekɔʼɔ shi mmɛ wa ngo wu fwɛʼ afwɛʼ ǹchwɔ̀ tsɛrɛ, éngɛ mmɛ ke nɛɛ engɔ wɛ é chi ngɛ bo.

²³ E ba gòo angu ene ebɛɛ gimkpaʼ. Mmɛ we doʼo é sàarà etyê wunɔ é mwɔ nè Kristo wɛ mwɔ engɔ wɛ è me nara ngɛ.

²⁴ Bɛʼngɛ ene egha ndzɔn e we nara kpe mmɛ nɔ ekɔʼɔ.

²⁵ Mmɛ we bɛrɛ engɛ̂, éngɛ mmɛ we nɛɛ kpe mmɛ wa nɔ ekɔʼɔ. Mmɛ wa nɔ nè mbɔn bɔ gimkpaʼ mbɔʼtye mmɛ zhiiri etɛbɛ mane egɛnɛ ndzɔn ene ebɛrɛtaa,

²⁶ mbɔʼtye mala mmɛ wu mwɔ nè mbɔn, mbɔn me le ǹji é fɛfi mbɔʼ mmɛ da dɛʼɛ, ene ebuumu ndzɔn nè Yeso Kristo.

²⁷ Enjitsɔ, ebwa kamakam ne ga kpe, ezɔɔrɔ le abwa ndzɔn mwɔ na aŋu ekɔn ǹchwɔ̀ Kristo ma ke ngɛ, mbɔʼtye ka mmɛ wu zɔ angɔn kà mmɛ ne wu zɔ bo, mmɛ zo ebwa deʼ mbɔʼ mbɔn, mmɛ nɛɛ kpe mbɔn be klini ebwa wɛ mmɛ a ngwè ngɛ na gho ŋwaʼ nɔ, ene ebuumu ene ebɛrɛtaa ene ebwa ŋwaʼ.

²⁸ Mbɔn ka bɔ m̀pɛ̀ʼ mbɔn bum. Mbɔn twaʼra angɔn akyɛ gimkpaʼ, e wa ngo tee ebe angɔ kpe angɔ ba nyimi mbɔn nde ebwa, mbɔʼnga na Ngwe a ma ndɛʼ ende ato endɔn.

²⁹ Enga a shi ndɛʼ afwɔ kɛ́ endɔn é fwɛʼ ebe Yeso, ke tye é bɛrɛ ene engɔ bo, bɛʼngɛ gɛrɛ né zɔ ǹgoʼ egha ngɔ.

³⁰ Enjitsɔ, ntsɔ ngwe ebiri egimi. Ne ebiri ŋwaʼ wɛ mbɔn à zɔ mmɛ ma ngwè ejɛ deʼ ngɛ, mmɛ wa bli à ngwè.