Aanlyn Bybel

Filemɔn 1 - Aŋwɛʼrɛ Ebuumu Fe Nè Ngwe

Paalo sàa atsaʼra ebe bɔ kristo

¹ Aŋwɛʼrɛ zɔnɔ ne zeʼe ebe Paalo we mwɔ ghodzɔm mbɔʼ Yeso kristo ngɛ, mane ghongwaanɔm bɔ̀ Timatyɛ. Mbyɛɛ na ŋwɛ̀ʼrɛ̀ engɛ̂ Filemɔn, ngwo wɛ ngwo mwɔ esɔrɔ etaa gɛrɛ mwɔ gho bi wɛ ntsɔ ma fwɛʼ afwɔbi ngɛ,

² Gamma ebe ghongwaaye bɔ̀ achim Kristo: Afya mane Akipus wɛ e ma fwɛʼ ekama é sɛ̀ɛrɛ̀ ega Ngwe na ntsɔ ngɛ, nè bɔ Ngwe byɛ e ma nyii ndɔngwe a ndɔ mbyɛ ngɛ.

³ Enarataa mane m̀bwarambwad Ngwe Àtɛ bɔ̀ mane Masakɛ bɔ̀ Yeso Kristo mwɔ nè mbɔn.

Edoʼo mane ebɛrɛtaa yɛ Filemɔn me le ngɛ

⁴ Filemɔn, akyɛ gimkpaʼ yɛ mmɛ ma tsàʼrà Ngwe ngɛ, mmɛ wa zhuŋu awɛ gɛrɛ ma ndɛʼ ebɛrɛ ebe Ngwe mbɔʼ ngwo.

⁵ Mmɛ na le énde mbɔʼnga mmɛ ma zo edoʼ yɛ ngwo ma tee ebe bɔ kristo mane ebɛrɛtaa njɛ ene Yeso Kristo.

⁶ Mmɛ wa tsàʼrà Ngwe kpe aŋu ngwo mwɔ ene ebwa ŋwaʼ nè mbyɛɛ ene ebɛrɛtaa ngɛ, e le shi ntsɔ nɛɛ abwa ǹchwɔ̀ yɛ à ma zeʼe ebe bɔ̀ achim ebuumu bɔ̀ nè Kristo ngɛ.

⁷ Edoʼo yɛ ngwo ma tee ebe abɔ kristo tsɛrɛ ngɛ shi le mmɛ ma gɛnɛ gɛrɛ ma twàʼrà angu mbɔʼnga ngwo we tɛɛbɛ ebɛrɛtaa abɔ kristo abê.

Paalo buʼ ebwo ebe Filemɔn ene egha Onesimus

⁸ Mmɛ we nɛɛ kpe na afwɔ ndza na ghongwa ngwɛ achim Yeso Kristo nɔ, é ga ebwa wɛ ngwo a ye é fwɛʼ ngɛ.

⁹ Bɛʼngɛ mbɔʼnga mmɛ me doʼo awe, mmɛ Paalo na bii awe bii na gho tɛ̀bɛ gɛrɛ mwɔ ghodzɔm mbɔʼ Yeso Kristo enjitsɔ nɔ.

¹⁰ Mmɛ na bùʼu ebwo engɛ̂ mbɔʼ ŋwɔ ndɔngwe ngu Onesimus. Èndzobo chɛ mmɛ à mwɔ a dzɔm ngɛ, mmɛ à le engɔ ene ŋwɔ ndɔngwe ngu, enyɛrɛ éngɛ mmɛ shi àtɛ ndɔngwe ngɔ.

¹¹ À na a mbèmbè engɔ à ke mwɔ azhuʼ gho deʼ engɛ̂ bo, bɛʼngɛ enjitsɔ engɔ shi azhuʼ gho engɛ̂ mane ena.

¹² Mmɛ na sàa engɔ achim engɛ̂, na gho deʼ wɛ mmɛ me doʼo ghɛʼ ngɛ.

¹³ Mmɛ a ye me doʼo é nɔ nè engɔ anɔ mbɔʼtye engɔ sa kpèdè angu é sɛ̀ɛrɛ̀ ekɔn ǹchwɔ̀ afwɔ njɛ aŋu mmɛ mwɔ a dzɔm mbɔʼ ekɔn ǹchwɔ̀ ngɛ.

¹⁴ Bɛʼngɛ mmɛ à ke me doʼo é le ebwa deʼ tɔrɔ engɛ̂ ke biiri bo, mmɛ kɛ doʼo é tiri awe é kpèdè angu bo mbɔʼtye ngwo ma fwɛʼ ebwa ǹchwɔ̀ deʼ ngwo ma fwɛʼ egha njɛ.

¹⁵ Ngadeʼ Ngwe à le kpe Onesimus nyɛrɛ abwaʼ njɛ ena antiri endzobo deʼ mbɔʼtye è wu zeʼe è sa tsɔmɔ nè ngwo akyɛ gimkpaʼ.

¹⁶ Engɔ ke wu zeʼe enjitsɔ nɔ tyetye ne èdzob nɔ bo, e na zeʼe na ghongwa ngwɛ achim kristo ene afwɛʼ yɛ a me fɔɔ èdzob ngɛ. Engɔ we mwɔ efwɔ etaa mfu shi ma ngo mwɔ efwɔ mfyɛ etaa da dɛʼɛ. Ngwo we koʼro é doʼ engɔ na èdzob ngwɛ nɔ gɛrɛ doʼ engɔ na ghongwaanɔm ngwɛ achim kristo nɔ.

¹⁷ Éngɛ mala ngwo kede kpe ngwo na fwɛʼ nè mmɛ, chɛdɛ Onesimus na aŋu ngwo à ye chɛdɛ angu ngɛ.

¹⁸ Mala engɔ à shi nyimi ke mwɔ m̀pè ebwa ze ekwa ngwɛ, kà me klini ǹjwè njɛ, ga mmɛ wa gii.

¹⁹ Na mmɛ Paalo a me ŋwɛʼrɛ ebwa wunɔ engɛ̂. Mmɛ wa ngo gii. Ngà ke dzɛrɛ kpe e we mwɔ na ngwo mɔ me klini ǹjwè deʼ ena nɔ aŋu mmɛ à kpèdè awɛ ngwo le etyê fe achim kristo ngɛ.

²⁰ Éngɛ ghongwa ngu, le ebwa wunɔ ena ene ekumu Masakɛ. Kpede angu na ghongwa achim Kristo nɔ, le mmɛ sa gɛnɛ angu ene ekumu Kristo.

²¹ Mmɛ we nɛɛ aŋu ngwo ma kli zo ebwa ngɛ, mmɛ na ŋwɛ̀ʼrɛ̀ aŋwɛʼrɛ zɔnɔ me nɛɛ kpe ngwo wa ngo le ba de fɔɔ aŋu mmɛ ga nɔ.

²² Ebwa tsɛrɛ ŋwaʼ ne ga kpe, shi atwɔndɔ àgɔn deʼ ena, mbɔʼnga mmɛ we zhuŋu kpe, Ngwe ya ngo zo atsaʼra ndzɔn e chi angu a ndɔdzɔm wu saa endɔn.

Engudu atsaʼra

²³ Epafras wɛ mwɔ a dzɔm nè mmɛ mbɔʼ ebwa Yeso Kristo ngɛ kpe mmɛ gamma endɔn.

²⁴ Abɔ abê na Mak, Aristakyus, Demas mane Luk byɛ mbyɛɛ ma fwɛʼ nè angɔ ngɛ gɛrɛ kpe mmɛ gamma endɔn.

²⁵ Enarataa Masakɛ Yeso Kristo mwɔ nè mbɔn bɔ gimkpaʼ.

« Vorige

Volg ons:

Geborgde skakels

Advertensies