Ekɔn nchwɔ̀ aŋu Mak à sɛɛrɛ ngɛ 1 - Aŋwɛʼrɛ Ebuumu Fe Nè Ngwe

Eyɔɔ Andɛʼndim Ngwe, ndèerè aghɛʼ ebe Yeso Kristo

¹ Ewunɔ ne eklada ene ekɔn ǹchwɔ̀ Yeso kristo ŋwɔ Ngwe.

² Na aŋu e me ŋwɛʼrɛ efwɔ aŋwɛʼrɛ Azaya Àmɛnɛkɔn Ngwe ngɛ kpe “Ngwe à ga kpe mmɛ wa ngo sàa ghontɔm ngu wɛ è ma ngo tse embè ndzɔn é ndèerè aghɛʼ endɔn ngɛ.

³ Gho deʼ wa flaba gà edɔm eguńked kpe ndèerè aghɛʼ ebe Masakɛ, nɔɔrɔ aghɛʼnji ebe engɔ.”

⁴ Eyɔɔ à ngɔɔ eguńked, e sa zɔzɔ engɔ sa ndɛ̀ʼ ndim gɛ̀rɛ̀ sa sɛ̀ɛrɛ̀ ebe bɔ kpe, “Mbɔn kobo ńtara ntsɔn, nu ndim gɛ̀rɛ̀ sàarà abwa bɔɔbɔɔ mbɔʼtye Ngwe dzɛd abwa bɔɔbɔɔ ndzɔn.”

⁵ Bɔ akɛkɛ abɛɛ abɛ Judeya mane antiri abɛ Jerusalɛm â zeʼ é zo ebwa wɛ engɔ à ma sɛ̀ɛrɛ̀ ngɛ. Angɔ à bɛrɛ abwa bɔɔbɔɔ àmɔ̀, Eyɔɔ ndɛʼ ndim ebe angɔ eji Joodan.

⁶ Â ne ndèerè ǹdiri Eyɔɔ ene nyɔrɔ m̀pwɔ̀ eguńked yɛ a ma zɔʼrɔ kpe kamɛl ngɛ. Engɔ à ne koro ekwo gôb nyɛm etiri mɔ, ende ngɔ me ǹglibi mane abliʼi.

⁷ Ekɔn wɛ engɔ à ma sɛ̀ɛrɛ̀ ngɛ à ne ga kpe, “Gho deʼ wa zeʼe achim ndza wɛ è me kama fɔɔ angu ngɛ. Mmɛ de ke koʼro é gunu angu é zɛ̀ɛrɛ̀ anduʼbla ngɔ bo.

⁸ Mmɛ na ndɛʼ endɔn me ndim kɛɛ, bɛʼngɛ engɔ wa ngo ndɛʼ mɔ̀ me ndim Azhwɛɛrɛ pɛ.”

Yeso nu ndim, Asatan kwa̧ʼra engɔ

⁹ Èndzobo chɛ Yeso à nyɛrɛ efwɔ antiri abɛ Nazarɛd efwɔ abɛɛ abɛ Galilii ngɛ, engɔ ngɔɔ ebe Eyɔɔ, è ndɛʼ ndim ebe engɔ eji Joodan.

¹⁰ Aŋu Yeso à sa gli efwɔ ndim ngɛ, engɔ zɔ ezob fuʼ, Azhwɛɛrɛ pɛ kla zeʼe ne ḿblɔ̂m nɔ ekwa engɔ.

¹¹ Etsoʼ deʼ ga nyɛ̀rɛ̀ à zeʼe ezob kpe, “Ngwo na ŋwɔanɔm etaa ngu, etaa mfu me gɛnɛ amɔ ene ngwo ghɛʼ.”

¹² Ekyɛ ŋwaʼ, Azhwɛɛrɛ pɛ nu engɔ sàa eguńked.

¹³ Engɔ tsɔmɔ eguńked efwɔ enji èsama fyee, asatan ma kwà̧ʼrà engɔ. Nyɛmɛrɛ ǹgɛ̀ twatwa à gɛrɛ na aŋu, bɛʼngɛ engere Ngwe ma kpèdè Yeso ma kɔ̀ʼ engɔ.

Yeso zɔ̀ʼ bɔ bɛɛrɛ abwa mbèmbè mɔ

¹⁴ Â bere Eyɔɔ gè efwɔ ndɔdzɔm efwɔ antiri endzobo yɛ Yeso à ngɔɔ efwɔ abɛ Galilii sa sɛ̀ɛrɛ̀ ekɔn ǹchwɔ̀ mbɔʼ ebwa m̀fɔ̀ Ngwe ngɛ.

¹⁵ Yeso ma sɛ̀ɛrɛ̀ kpe, “Endzobo yɛ Ngwe à me tɔ̧ɔrɔ ngɛ shi koʼo, ebwa m̀fɔ̀ Ngwe shi mbin. Mbɔn kobo ńtara ntsɔn gɛ̀rɛ̀ bɛ̀rɛ ene ekɔn ǹchwɔ̀ mbɔʼ ebwa m̀fɔ̀ Ngwe!”

¹⁶ Aŋu Yeso à ma zhìrì eba angli Galilii ngɛ, è zɔ Shimun mane ghongwaanɔm mɔ Andere e ma ndwa jɛ̂ efwɔ angli mɔmbwo ma sòʼ shuuru.

¹⁷ Yeso gâ ebe angɔ kpe, “Mbɔn zeʼ kìrì angu, mmɛ wa ngo tee angɔn é sa sòʼ ma bɔ.”

¹⁸ Angɔ saara jɛ̂rɛ àmɔ̀ gɛ̀rɛ̀ kìrì engɔ ekyɛ ŋwaʼ.

¹⁹ Aŋu Yeso à zhiri ngɔ̀ɔ embè mpiʼ ngɛ, è zɔ Jems mane ghongwaanɔm mɔ Eyɔɔ bwɔ Zɛbɛdii, e mwɔ efwɔ ekpe ma ndèerè jɛ̂rɛ àmɔ̀.

²⁰ Yeso zɔʼ angɔ ekyɛ ŋwaʼ, angɔ saara àtɛ àmɔ̀ Zɛbɛdii efwɔ ekpe mane bɔ afwɛʼ gɛ̀rɛ̀ kìrì Yeso.

Yeso chi azhwɛɛrɛ bɔɔbɔɔ ekwa gho deʼ

²¹ Yeso mane bɔ bɛɛrɛ abwa mɔ kwɛ̀ â ngɔɔ a Kapɛnaum. À shi anji ku̧ru bɔ Juu, Yeso ngɔɔ efwɔ ndɔ bɛ̀ɛrɛ atsɛrɛ klada sa tee abwa.

²² Abɔ byɛ kɔ̂n ene aghɛʼ yɛ engɔ à ma tee abwa ngɛ mbɔʼnga engɔ à na tee nè ekama. Engɔ à ke ma tee na bàtee atsɛrɛ à ma lè ngɛ bo.

²³ Aŋu engɔ à ma bli àtee abwa ngɛ, gho deʼ efwɔ ndɔ bɛ̀ɛrɛ atsɛrɛ bɔ Juu wɛ à me le azhwɛɛrɛ bɔɔbɔɔ ngɛ gɛ̀rɛ̀ tsɛɛ kpe,

²⁴ “Yeso gho Nazarɛd, Ngwo ne le ebwa yɛ nè mbyɛɛ? Ngwo ne zeʼe anɔ é nyiimi angbɛɛ? Mmɛ we nɛɛ awɛ, na ngwo wɛ ngwo me pɛ me zeʼe ebe Ngwe ngɛ.”

²⁵ Yeso bwe ebe engɔ kpe, “Ba! Gli efwɔ ekwa gho wɛngɛ.”

²⁶ Azhwɛɛrɛ bɔɔbɔɔ yɛ njiʼi egho wɛ ene ekama, tsɛɛ, è glì efwɔ ekwa ngɔ.

²⁷ Abɔ byɛ kɔ̂n, sa biiri àmɔ̀ àmɔ̀ kpe, “Ewunɔ ne ewe? Abwa fe tsɛrɛ? Engɔ na tee abwa nè ekama! Engɔ ga, ká de mwɔ ezhwɛɛrɛ bɔɔbɔɔ, e ba zhuru gɛ̀rɛ̀ fwɛ̀ʼ.”

²⁸ Éngɛ ekɔn mbɔʼ Yeso zamma sɛ̀ʼ efwɔ abɛɛ abɛ Galilii gimkpaʼ.

Yeso glì bɔ akɛkɛ

²⁹ Aŋu angɔ à nyɛrɛ efwɔ ndɔ bɛ̀ɛrɛ atsɛrɛ bɔ Juu ngɛ, Yeso mane bɔ bɛɛrɛ abwa mɔ Jems mane Eyɔɔ ngɔɔ a ndɔ Shimun mane Andere.

³⁰ Aghoo Shimun à ne bwɛrɛ edɔ̀m etan mà gwɔ̀rɔ̀ efɔɔ. Aŋu Yeso à bwɛrɛ ngɛ, è toʼro ebe engɔ kpe aye wɛ wa gwɔ̀rɔ̀.

³¹ Éngɛ Yeso ngɔɔ ebe engɔ, klini abwo ngɔ, taama engɔ ekere, ekwa ngɔ bwada, engɔ tam ekere sa fwɛʼ ebe angɔ.

³² À shi etiʼdi, aŋu etaranchwe à sa turu ngɛ, bɔ zeʼ ebe Yeso nè bɔ aŋwan akɛkɛ mane bɔ ezhwɛɛrɛ bɔɔbɔɔ.

³³ Bɔ à ne ba akwâ enduʼndɔ.

³⁴ Yeso à gli bɔ akɛkɛ ene m̀pèrè eŋwan gimkpaʼ. À gɛrɛ chì ezhwɛɛrɛ bɔɔbɔɔ ne bɛrɛ kpe ezhwɛɛrɛ bɔɔbɔɔ byɛ gɛʼɛ eklo àmɔ̀ bo, mbɔʼnga â me nɛɛ engɔ.

Yeso sɛɛrɛ ekɔn ǹchwɔ̀ a Galilii

³⁵ Aŋu ese à sa tòʼrò ngɛ, Yeso tam glì a ndɔ ngɔ̀ɔ afwɔ deʼ zhiʼ é tsàʼrà Ngwe.

³⁶ Shimun mane asɔrɔ mɔ ngɔɔ é zɛ̀ʼ Yeso.

³⁷ Aŋu â zɔ́ engɔ ngɛ, angɔ ga ebe engɔ kpe, “Bɔ gimkpaʼ ba kɔ̀ʼrɔ̀ awɛ.”

³⁸ Yeso gíì kpe, “Ntsɔ ngɔɔ efwɔ ashimabɛ tsɛrɛ ebara anɔ mbɔʼtye mmɛ gɛrɛ sɛ̀ɛrɛ̀ ega Ngwe aŋu mbɔʼnga ne ǹji yɛ mmɛ à zeʼ ngɛ.”

³⁹ Éngɛ angɔ zhiri kɛɛrɛ abɛ Galilii sɔ̀, mà sɛ̀ɛrɛ̀ ega Ngwe efwɔ ndɔrɔ bɛɛrɛ atsɛrɛ bɔ Juu gɛ̀rɛ̀ mà chì ezhwɛɛrɛ bɔɔbɔɔ akwa bɔ.

Yeso gli gho akɔ̂m

⁴⁰ Gho akɔ̂m deʼ à ngɔɔ kla Yeso gunu etongu mɔ a chwâ sa bii gà kpe, “Ma ngwo me bɛrɛ ngwo we né le mmɛ pɛ.”

⁴¹ Yeso klasɔn, ndɛ̀rɛ̀ abwo mɔ mɔ̀mɔ̀ engɔ gà kpe, “Mmɛ we bɛrɛ éngɛ, pɛ!”

⁴² Akɔ̂m myɛ ekwa ngɔ ekyɛ ŋwaʼ ekwa ngɔ pɛ.

⁴³ Yeso gâ ebe engɔ, gbeʼre ato ngɔ kpe,

⁴⁴ “Ke kpe ngwo sɛɛrɛ ebwa wunɔ ebe gho deʼ bo, ngɔ̀ɔ tee awɛ ebe àtɛ zhiri shi è kede awɛ, ngwo gɛrɛ ndɛ̀ʼ etɔ̧ɔrɔ yɛ Mose à tsɛrɛ kpe e ndɛʼɛ na ala zhid é sò awɛ nɔ. Ewùnɔ wa ngo mwɔ na antsɛ ebe angɔ é tee kpe ngwo a shi pɛ.” Aŋu Yeso à mɛɛrɛ ngɛ, è sàa engɔ ngɔɔ.

⁴⁵ Bɛʼngɛ egho wɛ ghɛɛbɛ sa zhiri à sɛ̀ɛrɛ̀, è sɛ̀ʼ ebwa mɔmbwo akwâ gimkpaʼ. Éngɛ Yeso nè we nɛɛ tyè è zhiri efwɔ afwɔ deʼ apɛpɛ bo. Yeso à na tsɔmɔ ese efwɔ akwâ zhiʼ, bɔ à dama zeʼe ebe engɔ akwâ gimkpaʼ.