Ekɔn nchwɔ̀ aŋu Luk à sɛɛrɛ ngɛ 1 - Aŋwɛʼrɛ Ebuumu Fe Nè Ngwe

Atsaʼra

¹ Gho kɛ̀, Tyofilɔs, bɔ akɛkɛ shi kɔnɔshin é ŋwɛ̀ʼrɛ̀ abwa yɛ â shi gli abwaʼ bɔ ngɛ.

² Angɔ à ŋwɛʼrɛ abwa gimkpaʼ yɛ ntsɔ à zo abɔ byɛ à zɔ eghɔɔ ma gà ebe bɔ ngɛ.

³ Éngɛ, gho kɛ̀, Tyofilɔs, mmɛ shi nu endzobo é wèe abwa zɔnɔ nyɛ̀rɛ̀ aŋu â klada ngɛ, mmɛ zhuŋu kpe e wa ngo me nara ena gɛrɛ é ŋwɛ̀ʼrɛ̀, tòʼrò engɛ̂ aŋu â glî ngɛ.

⁴ Mmɛ ne ŋwɛʼrɛ énde mbɔʼtye ngwo nɛɛ éŋwaʼa ene abwa gimkpaʼ yɛ â ga engɛ̂ ngɛ.

E gâ aŋu e ma ngo be Eyɔɔ Andɛʼndim ngɛ

⁵ Èndzobo chɛ Hɛrɔd à mwɔ m̀fɔ̀ abɛ Judeya ngɛ, àtɛ zhiri deʼ à na a ndɔngwe aŋu ekumu ngɔ mwɔ Zakariya. Engɔ à ne egho bi efwɔ ekla Abija, eye mɔ Elizabɛd ma ŋwɔ ekla Arɔn.

⁶ Angɔ bɔ fyee ma fwɛʼ abwa yɛ â me koʼro efàarà Ngwe ngɛ, ma shi atsɛrɛ gɛ̀rɛ̀ zo atɛʼɛ ngɔ gimkpaʼ.

⁷ Angɔ à shi nuru ghɛʼ, ne le bwɔ deʼ bo, mbɔʼnga Elizabɛd à na ǹkɔ̀m.

⁸ Anji deʼ, endzobo koʼ ebe ekla Zakariya é fwɛʼ èmɔ ekyɛ afwɛʼ ebe Ngwe na àtɛ zhiri nɔ, Zakariya ngɔɔ é fwɛ̀ʼ.

⁹ Aŋu à mwɔ etsɛrɛ ebe ètɛ zhiri é ndwa antsántsá ngɛ, â le è chì Zakariya é twɔ̀n adwe edɔm echud. Éngɛ, engɔ nyii efwɔ ndɔngwe kɛ Masakɛ.

¹⁰ Bɔ gimkpaʼ mwɔ ese ma tsàʼrà Ngwe endzobo twɔn adwe.

¹¹ Na aŋu engɔ à ma twɔ̀n adwe ngɛ, sa klikɔ̀ʼ angere Ngwe tam abɛɛ abwo anɔm echud twɔrɔ adwe.

¹² Endzobo Zakariya à zɔ́ angere wɛ ngɛ, ekwa ngɔ fe, èklɔ̀ bere engɔ.

¹³ Bɛʼngɛ Angere wɛ gâ ebe engɔ kpe, “Zakariya, ka bum, Ngwe shi zo atsaʼra njɛ, eye ngwɛ Elizabɛd wa ngo be ŋwɔanɔm, ngwo chimmi ekumu ngɔ kpe Eyɔɔ.

¹⁴ Egɛnɛ yà mwɔ engɛ̂ mane abɔ tsɛrɛ akɛkɛ byɛ e ma zo kpe ê be eŋwɔ wɛ ngɛ.

¹⁵ Mbɔʼnga engɔ yà mwɔ gho kɛ́ efàarà Ngwe Masakɛ, na mɔm kà mɔm kamakam ŋwɔ. E yà sa ngo be engɔ, azhwɛɛrɛ pɛ shi shwe ekwa ngɔ.

¹⁶ Engɔ yà wu gbèe bwɔ bɔ Israel akɛkɛ sàa ebe Ngwe Masakɛ àmɔ̀.

¹⁷ Engɔ yà tse embè Masakɛ ene azhwɛɛrɛ mane ekama Ngwe nkirinkin ne Elayja nɔ, engɔ yà wu buumu ètɛ mane bwɔ, le bɔ kèzobwa sa le abwa yɛ a me koʼro efàarà Ngwe ngɛ, è ndèerè bɔ shi e sa kɔʼ é nu Masakɛ.”

¹⁸ Zakariya shi biiri ebe Angere kpe, “Mmɛ yà shi nɛ̀ɛ kpe ebwa wunɔ ne éŋwaʼa ngɛ ene, wɛ mmɛ mane eye ngu mbyɛɛ shi nuru ghɛʼ ngɛ.”

¹⁹ Angere gíì kpe, “Mmɛ na Gebrel mà tama efàarà Ngwe, Ngwe shi saa angu é mɛ̀nɛ̀ ekɔn ǹchwɔ̀ wunɔ engɛ̂.

²⁰ Enyɛrɛ enjitsɔ, ngwo wa mwɔ eganyì bwɛn èndzobo chɛ ebwa wunɔ ma glì ngɛ, mbɔʼnga ngwo ke bɛrɛ ega ngu wɛ e ma ngo gli éŋwaʼa ene èndzobo chɛ â shi tɔ̧ɔrɔ ngɛ bo.”

²¹ À ne éngɛ nɔ, bɔ me nɔ ese mà kɔ̀ʼ Zakariya, ma di àmɔ̀ kpe ayɛ me ngiiri engɔ efwɔ Etsam Ngwe.

²² Èndzobo chɛ Zakariya à gli ese ngɛ, è sa mò é gà tsɛ̀ʼ, angɔ nɛ̀ɛ kpe engɔ shi zɔ azhi ebwa deʼ efwɔ Etsam Ngwe. Aŋu engɔ à sa mò é ga tsɛʼ ngɛ, è sa ndwa me ebwo.

²³ Endzobo chɛ Zakariya à mɛɛrɛ ekyɛ afwɛʼ mɔ efwɔ Etsam Ngwe ngɛ, è klo ngɔ̀ɔ abɛ.

²⁴ Enyɛrɛ éngɛ, eye ngɔ Elizabɛd chɛ ebûm, engɔ tsɔmɔ a ndɔ efwɔ ata tan.

²⁵ Elizabɛd gâ kpe, “Oh! Chaʼ, na mmɛ wunɔ Masakɛ shi klasɔn ene mmɛ è chì eju ato ndza abwaʼ bɔ.”

E ga aŋu é ma ngo be Yeso ngɛ

²⁶ Èndzobo chɛ Elizabɛd à shi ebûm ata mfo ngɛ, Ngwe tɔm Angere Gebrel afwɔ deʼ â ma zɔʼrɔ kpe Nazarɛd abɛ Galilii.

²⁷ Engɔ à saa Gebrel ebe m̀fòrò aye deʼ ekumu ngɔ mwɔ Meri wɛ â me biiri é ndɛʼ ebe Yɔsɛf gho ekla m̀fɔ̀ Devid ngɛ.

²⁸ Angere Ngwe gâ ebe Meri kpe, “M̀bwarambwad mwɔ nè ngwo, Masakɛ we nè ngwo gɛ̀rɛ̀ shi ndɛʼ m̀bɔ̀nɔ engɛ̂.”

²⁹ Ekɔn Angere à ndɛʼ ǹgoʼ ebe Meri, è di kɔ̀n sa zhuŋu kpe ke ǹji atsaʼra zɔnɔ shi na ayɛ.

³⁰ Éngɛ Angere gâ ebe engɔ kpe, “Meri ka bum, Ngwe ye le enarataa ene ngwo.

³¹ Nɛɛ kpe ngwo wa ngo le ebûm è be ŋwɔanɔm, ngwo yà chim ekumu ngɔ kpe Yeso.

³² E yà mwɔ gho kɛ́, e sa zɔʼrɔ engɔ kpe ŋwɔanɔm Ngwe kɛ. Masakɛ Ngwe yà ndɛʼ atan m̀fɔ̀ àtɛ sam mɔ Devid ebe engɔ.

³³ Ewunɔ ne tee kpe engɔ yà mwɔ m̀fɔ̀ efwɔ ekla Yakɔb kengudu, ebwa m̀fɔ̀ ngɔ yà ne ngudu.”

³⁴ Meri biiri ebe Angere Ngwe kpe, “Mmɛ na m̀fòrò aye, e yà gli ene?”

³⁵ Angere Ngwe wɛ gíì kpe, “Azhwɛɛrɛ ya zeʼe ekwa ngwɛ, ekama Ngwe ya koo awɛ. Enyɛrɛ enjitsɔ, e ba ngo sa zɔʼrɔ eŋwɔ m̀bwarambwad Ngwe wɛ ngwo ma ngo be ngɛ kpe ŋwɔ Ngwe.

³⁶ Kede ghongwaaye ngwɛ Elizabɛd, wɛ â ma gà kpe na ǹkɔ̀m ngɛ, è shi ebûm enjitsɔ ene ata mfo, ke è de shi nuru ghɛʼ.

³⁷ E ne éngɛ mbɔʼnga tsɛʼ ebwa deʼ e ma fɔɔ Ngwe é fwɛʼ bo.”

³⁸ Meri shi gà kpe, “Mmɛ na gho afwɛʼ Ngwe Masakɛ, shi e gli ekwa ngu na aŋu ngwo shi ga ngɛ.” Éngɛ Angere Ngwe saara engɔ è ngɔ̀ɔ amɔ.

Meri ngɔɔ é gamma ebe Elizabɛd

³⁹ Afwɔ à sa ndada Meri ndèerè amɔ, è ki ngɔ̀ɔ efwɔ abɛ deʼ â me edɔm egu efwɔ abɛ Judeya.

⁴⁰ Engɔ ngɔɔ efwɔ ndɔ Zakariya è gamma ebe Elizabɛd.

⁴¹ Èndzobo chɛ Elizabɛd à zo etsoʼ Meri ngɛ, ŋwɔ ghɛ̀ɛbɛ amɔ ebûm ngɔ, Azhwɛɛrɛ pɛ shwe ekwa Elizabɛd.

⁴² Elizabɛd zodo gà kpe, “M̀bɔ̀nɔ Ngwe ye ekwa ngwɛ fɔɔ âye gimkpaʼ, m̀bɔ̀nɔ Ngwe gɛrɛ mwɔ ekwa eŋwɔ wɛ ngwo ma ngo be ngɛ!

⁴³ A da ene, mmɛ na awɛ, engwa ebwa wunɔ e gli ekwa ngu, kpe áʼɔ̧̀ Masakɛ ngu zeʼ é gamma ena?

⁴⁴ Aŋu mmɛ a zo etsoʼ ngwɛ ngɛ, ŋwɔ ghɛɛbɛ amɔ ebûm ndza ene egɛnɛ.

⁴⁵ Ne m̀bɔ̀nɔ Ngwe kɛ́ engɛ̂ é bɛrɛ kpe Masakɛ yà le abwa gimkpaʼ aŋu engɔ à ga ngɛ.”

Meri kwɔn etsa zodo Ngwe

⁴⁶ Meri gâ kpe “Etaa mfu fa ghɔ Masakɛ.

⁴⁷ Azhwɛɛrɛ ndza ya gɛnɛ amɔ nè Ngwe Àsaase ngu,

⁴⁸ mbɔʼnga engɔ shi chi angu, gho afwɛʼ ketsɛʼ epɔb mɔ! Enyɛrɛ enjitsɔ sa ngɔɔ embè, ekyɛ gimkpaʼ yà sa zɔʼrɔ angu kpe egɛnɛ

⁴⁹ mbɔʼ abwa kɛ́ yɛ Angwanìm Ngwe shi fwɛʼɛ ekwa ngu ngɛ. Eghɔ mwɔ ene ekumu ngɔ. Engɔ we pɛ mɛ̀ɛrɛ̀.

⁵⁰ È wa klasɔn ene abɔ byɛ e ma ghɔ engɔ ngɛ ene ekyɛ nè ekyɛ.

⁵¹ È shi fwɛʼɛ abwa kamakam ene abwo mɔ è sàama abɔ byɛ e ma ndòorò àmɔ̀ ngɛ, è tsɔŋɔ abwa gimkpaʼ yɛ angɔ me tɔ̧ɔrɔ ngɛ.

⁵² Engɔ shi chidi m̀fɔ̀rɔ̀ kamakam edɔm etan m̀fɔ̀rɔ̀ àmɔ̀, è bèʼrè abɔ byɛ e me bwaara àmɔ̀ ngɛ ekere.

⁵³ Engɔ shi ndee bɔ chwɔ ene ela ǹchwɔ̀ gɛ̀rɛ̀ chwee bɔ kɛb sàa ebwo kɛɛ.

⁵⁴ Engɔ shi ndɛʼɛ ekpede ebe gho afwɛʼ mɔ Israel na aŋu à tɔ̧ɔrɔ é le eklasɔn ene angɔ ngɛ.

⁵⁵ Engɔ à le etɔ̧ɔrɔ zɔnɔ ebe ètɛ bɔ Abraham mane bwɔ mɔ ene ekyɛ kengudu.”

⁵⁶ Meri tsɔmɔ nè Elizabɛd na ata tɛd nɔ, shi ghɛɛbɛ ngɔɔ abɛ mɔ.

E be Eyɔɔ Andɛʼndim

⁵⁷ Endzobo à koʼ ebe Elizabɛd é be ŋwɔ mɔ. Engɔ à be ŋwɔanɔm.

⁵⁸ Bɔ ebara mane bwɔngwa ngɔ zo eklasɔn yɛ Ngwe à le ebe engɔ ngɛ è gɛnɛ àmɔ̀ nè engɔ.

⁵⁹ Eŋwɔ wɛ sa bwɛn ǹkyɛ̀ bi nɔ, e zeʼ é ndèe engɔ ma ngo chimmi ekumu kpe Zakariya na àtɛ mɔ nɔ,

⁶⁰ bɛʼngɛ abli mɔ kpe, “Keʼ ekumu ngɔ ne Eyɔɔ.”

⁶¹ E gâ ebe engɔ kpe, “Bɛʼngɛ mbɔn ke le gho ekla deʼ ngɔn nè ekumu wɛ ngɛ bo!”

⁶² E biiri ebe àtɛ mɔ ene abwo kpe e chimmi ŋwɔ ene wɛ?

⁶³ Zakariya biiri abɛɛ tafli, è ŋwɛʼrɛ kpe, “Ekumu ngɔ na Eyɔɔ” akwa bɔ gimkpaʼ fe.

⁶⁴ Èndzobo chɛ Zakariya wu klàda sa gà, sa ghɔ Ngwe.

⁶⁵ Èklɔ̀ à bere abɔ byɛ â mwɔ aŋu ngɛ, angɔ kɔ̂n ene abwa zɔnɔ, è sɛ̀ɛrɛ̀ efwɔ abɛ agu gimkpaʼ efwɔ Judeya.

⁶⁶ Gho ŋwàʼaŋwàʼ wɛ à zo ebwa wunɔ ngɛ sa di amɔ ma biiri kpe, “Eŋwɔ wunɔ yà mwɔ ma yɛ ngà?” Mbɔʼnga â ne tee kpe abwo Ngwe ye nè engɔ.

Ebwa kègli wɛ Zakariya à mɛnɛ ngɛ

⁶⁷ Azhwɛɛrɛ Ngwe à ne shwe ekwa Zakariya àtɛ Eyɔɔ, è sɛ̀ɛrɛ̀ ega Ngwe kpe

⁶⁸ “Eghɔ ebe Masakɛ Ngwe bɔ Israel! Mbɔʼnga è shi zeʼe ebe bɔ mɔ é lɔɔ angɔ.

⁶⁹ Engɔ shi ndɛʼɛ Àsaase ebe bɔ efwɔ ekla gho afwɛʼ mɔ Devid é ndɛ̀ʼ etyê Ngwe ebe bɔ.

⁷⁰ Engɔ à tɔ̧ɔrɔ ebe Àmɛnɛkɔn pɛ mɔ è ga egha tsɛrɛ

⁷¹ kpe mbè wa pwèerè abɔ abwo bɔ m̀pɛ̀ʼ bɔ mane angɔ byɛ e ma gwè abɔ ngɛ.

⁷² È gɛrɛ ga kpe mbè wa tee eklasɔn ebe ètɛ sam bɔ gɛ̀rɛ̀ zhuŋu etsɛrɛ pɛ mɔ.

⁷³ À ŋwɔ glô nè àtɛ sam bɔ Abraham,

⁷⁴ è tɔ̧ɔrɔ é chi abɔ abwo bɔ m̀pɛ̀ʼ bɔ, è le ntsɔ sa ghɔ engɔ ne ma bumu bo,

⁷⁵ mbɔʼtye ntsɔ me pɛ gɛ̀rɛ̀ ma le abwa ǹchwɔ̀ efàarà ngɔ efwɔ enji bɔ gimkpaʼ efwɔ ese.

⁷⁶ Ngwo, ŋwɔ ngu, e yà sa zɔʼrɔ awɛ kpe Àmɛnɛkɔn Ngwe kɛ mbɔʼnga ngwo yà tse embè é ndèerè aghɛʼ ebe Masakɛ.

⁷⁷ È ga ebe bɔ ngɔ kpe Ngwe yà dzɛ̀d abwa bɔɔbɔɔ angɔ gɛ̀rɛ̀ pwèerè angɔ

⁷⁸ mbɔʼnga Ngwe bɔ ka bo bwada gɛ̀rɛ̀ ma klasɔn, è wa le etaranchwe pɛ ebe bɔ nyɛ̀rɛ̀ zèʼe ezob,

⁷⁹ é pɛ ebe abɔ byɛ e ma tsɔmɔ efwɔ ǹklì mà bumu ewu nɔ, mbɔʼtye e le bɔ tsɔmɔ ene m̀bwarambwad.”

⁸⁰ Eyɔɔ à tɛb me shwe ene azhwɛɛrɛ Ngwe. À gɛrɛ tsɔmɔ efwɔ akwânked, bwɛn èndzobo chɛ à tee amɔ apɛpɛ ebe bɔ Israel ngɛ.