Jɛms 1 - Aŋwɛʼrɛ Ebuumu Fe Nè Ngwe

Atsaʼra

¹ Aŋwɛʼrɛ zɔnɔ ne zeʼe ebe Jems gho afwɛʼ Ngwe mane Masakɛ Yeso Kristo, ma gamma ebe bɔ Ngwe gimkpaʼ byɛ e me sɛ̀ʼɛ efwɔ ese gimkpaʼ ngɛ.

Ebɛrɛtaa mane azɔm

² Bwɔngwa mbu achim kristo, mbɔn nu m̀pèrè èkwà̧ʼrà gimkpaʼ byɛ e ma zeʼe endɔn ngɛ ene egɛnɛ.

³ Mbɔn be nɛɛ kpe èkwà̧ʼrà na de zeʼe endɔn né le ebɛrɛtaa ndzɔn kam.

⁴ Mbɔn le kpe ekama ndzɔn é kii ebwa tɛb ene eghɛʼnji gimkpaʼ shi mbɔn ne gódó bo, mbɔʼtye mbɔn me né pɛ mɛ̀ɛrɛ̀ ne me ebwa bɔɔbɔɔ deʼ bo.

⁵ Mala gho deʼ abwaʼ ndzɔn ne le azɔm bo, engɔ tsaʼra Ngwe yɛ e ma ndɛʼ azɔm ngɛ, mbɔʼnga Ngwe na fuʼu ebwo ma ndɛʼ azɔm ene etaa ǹchwɔ̀ ebe bɔ gimkpaʼ.

⁶ Bɛʼngɛ mbɔn sa tsàʼrà Ngwe mbɔn le ebɛrɛtaa ene engɔ gɛrɛ ne le ampiʼ di deʼ nɔ bo. Egho wɛ e ma di ngɛ ne mwɔ na awawa efwɔ ebɔrɔndim wu efɔɔ ma fùu à sàa ebɛɛ ebɛɛ nɔ.

⁷ Egho wɛ è ma di ngɛ ke zhuŋu kpe Masakɛ wa ndɛ̀ʼ ala deʼ énde bo.

⁸ Eshi etaa ngɔ ene Ngwe ye gɛ̀bbɛ è ne me klidi ene ebwa deʼ wɛ engɔ ma fwɛʼ ngɛ bo.

Ndzaŋa mane àfɔ̀n

⁹ Gho Kristo wɛ mwɔ ene ndzaŋa ngɛ wara gɛnɛ amɔ èndzobo chɛ Ngwe ma bèʼrè engɔ ekere ngɛ.

¹⁰ Gho kristo wɛ me le àfɔ̀n ngɛ gɛrɛ gɛnɛ amɔ èndzobo chɛ Ngwe ma chweere engɔ saa a chwâ ngɛ mbɔʼnga àfɔ̀n wa ngo fɔɔ na sɔʼrɔ egɛ nɔ.

¹¹ Aŋu ńchwe ma gli nè azhuʼ twɔrɔtwɔn gɛrɛ sɔ̀ʼ agɛ zɔnɔ, sɔʼrɔ mɔ kuru tu gɛrɛ tsɔŋɔ enara ngɔ ngɛ, ne éngɛ e ma ngo tsɔŋɔ gho àfɔ̀n aŋu e ma sa zhiri afwɛʼ àfɔ̀n mɔ ngɛ.

Èkwà̧ʼrà ke ma zeʼe ebe Ngwe bo

¹² Ǹchwɔ̀ na abɔ byɛ e ma kìi ekpere ngɛ mbɔʼnga èndzobo chɛ angɔ fɔɔ akwa̧ʼra zɔnɔ ngɛ, Ngwe ya ngo ndɛʼ etyê endɔn ne enɛrɛ nɔ aŋu à shi tɔ̧ɔrɔ ebe abɔ byɛ e me doʼo engɔ ngɛ.

¹³ Mala m̀pèrè èkwà̧ʼrà bɔnɔ kla gho, engɔ ke ga kpe, “Akwa̧ʼra zɔnɔ ne zeʼe ebe Ngwe” bo, mbɔʼnga Ngwe ke me kwa̧ʼra gho deʼ ene abwa bɔɔbɔɔ bo, gho deʼ gɛrɛ ke né kwà̧ʼrà engɔ ene ebwa bɔɔbɔɔ deʼ bo.

¹⁴ Bɛʼngɛ na azhuŋu bɔɔbɔɔ yɛ ntsɔ me doʼo ma le andɔŋɔ anyi ngɛ, a ma tiri abɔ sàa efwɔ akwa̧ʼra.

¹⁵ Éngɛ azhuŋu bɔɔbɔɔ yɛ ma le ntsɔ sa le abwa bɔɔbɔɔ. Èndzobo chɛ ebwa bɔɔbɔɔ gɛrɛ tɛb ngɛ e zeʼe nè ewu.

¹⁶ Bwɔngwa mbu achim kristo, mbɔn ke le tyè e ndooro angɔn mbɔʼ abwa zɔnɔ bo.

¹⁷ Abwa ǹchwɔ̀ mane atɔ̧ɔrɔ gimkpaʼ ne zeʼe ezob ebe Ngwe àtɛ yɛ me ndeere ekɛʼ ngɛ. Engɔ wɛ è ne ma kobo na azhi nɔ bo.

¹⁸ Nyɛrɛ zeʼe ene eshi ngɔ mɔmbwo, engɔ à le ntsɔ mwɔ àkɔʼɔ nyɛ̀rɛ̀ zèʼe ene ega éŋwaʼa mbɔʼtye ntsɔ mwɔ ne ela etɔ̧ɔrɔ mbèmbè abwaʼ ela gimkpaʼ byɛ engɔ à ndèerè ngɛ.

É zo ebwa gɛrɛ le ebwa wɛ

¹⁹ Bwɔngwa mbu achim kristo, mbɔn zhuŋu ebwa wunɔ. Gho ŋwàʼaŋwàʼ zamma é zhuru shi ne zamma é gà gɛrɛ ne zamma é bɔɔ etaa bo.

²⁰ Ebɔɔtaa ya le gho le ebwa wɛ e ne me koʼro efàarà Ngwe ngɛ bo.

²¹ Éngɛ mbɔn gli efwɔ abwa mfiri mane eleabwa ǹchù gimkpaʼ. Mbɔn bwaara akwa ndzɔn ebe Ngwe gɛrɛ bɛ̀rɛ ega wɛ engɔ me ge efwɔ ńtara ntsɔn wɛ e me le ekama é pwèerè angɔn ngɛ.

²² Mbɔn ke ndooro akwa ndzɔn tyetye é zhuru ega ngɔ bo. Ankɔmɔ éngɛ mbɔn sa zhuru gɛrɛ fwɛʼ ebwa wɛ engɔ ma gà ngɛ.

²³ Egho wɛ è ma zo ebwa wunɔ shi ne ma le bo ngɛ, ne mwɔ na bɔ deʼ byɛ e ma kede amɔ efwɔ alakedeshi ma zɔ na aŋu angɔ mɔmbwo mwɔ ngɛ.

²⁴ Angɔ ba kede amɔ anchwɔnchwɔ, e gɛrɛ nyɛrɛ afwɔ yɛ, e dzɛ̀d ezɔɔrɔ yɛ angɔ mwɔ ngɛ.

²⁵ Bɛʼngɛ egho wɛ ma kede etsɛrɛ pɛ yɛ e ma pwèerè bɔ anchwɔnchwɔ gɛrɛ fɔɔ embè é kiri shi ne ma zo à dzɛ̀d bo ngɛ, Ngwe ya ngo ndɛʼ m̀bɔ̀nɔ ebe engɔ nyɛ̀rɛ̀ zèʼe ene abwa yɛ engɔ ma le ngɛ.

²⁶ Gho deʼ wɛ è zhuŋu kpe mbè wa fwɛʼ ebe Ngwe anchwɔnchwɔ, shi ne ma klini enɛmɛ mɔ bo ngɛ na ndooro ekwa mɔ mɔmbwo. Abwa gimkpaʼ yɛ engɔ ma le ngɛ gɛrɛ ne me le ǹji bo.

²⁷ Ebwa wɛ Ngwe àtɛ ma kede kpe ne ebwa Ngwe wɛ e me pɛ gɛrɛ mwɔ éŋwaʼa ngɛ ne ga kpe, é kɔʼɔ bwɔti mane ayeti efwɔ ǹgoʼ angɔ gɛrɛ le kpe ese ke tsɔŋɔ ato gho deʼ bo.