Aanlyn Bybel

Hibrus 1 - Aŋwɛʼrɛ Ebuumu Fe Nè Ngwe

Ngwe shi ga ebe bɔ achim ŋwɔ mɔ

¹ À na a mbèmbè, Ngwe ga ebe ètɛ sam bɔ nyɛ̀rɛ̀ zèʼ achim bàmɛnɛkɔn mɔ ene m̀pèrè eghɛʼnji akɛkɛ, akyɛ akɛkɛ.

² Bɛʼngɛ efwɔ enji ngudu bɔnɔ byɛ ese ma ye ngudu ngɛ, engɔ shi ga ebe bɔ̀ nyɛ̀rɛ̀ zeʼe achim ŋwɔ mɔ. Engɔ ne egho wɛ è me shi ene ànde etiʼi ene ela gimkpaʼ ngɛ. Éŋwaʼaŋwâʼ Ngwe à ndèerè ela gimkpaʼ edɔ̀m ese nyɛ̀rɛ̀ zèʼe achim engɔ.

³ Engɔ wa tee na aŋu enɛŋɛrɛkɛ Ngwe mwɔ ngɛ, gɛrɛ mwɔ na Ngwe nɔ, me klini ese gimkpaʼ ene ekama ega mɔ. Èndzobo chɛ engɔ à shi mɛ̀ɛrɛ sò abwa bɔɔbɔɔ bɔ ngɛ, è ngɔɔ tsɔmɔ abɛɛ abwo nde Angwanìm Ngwe ekere.

⁴ E me tee kpe ŋwɔ Ngwe we fɔɔ engere, ekumu ghɔ wɛ Ngwe à ndɛ̀ʼ ebe engɔ ngɛ gɛrɛ me fɔɔ akumu engere gimkpaʼ.

Ŋwɔ Ngwe we fɔɔ engere

⁵ Ngwe à shi ga ebe angere mɔ deʼ endzobo tse kpe “Ngwo na ŋwɔ ngu, enyɛrɛ ànchwɔ̀ mmɛ shi àtɛ ngwɛ?” Kà e ga ebe edeʼ kpe “Mmɛ wa ngo mwɔ àtɛ ngwɛ, ngwo gɛrɛ mwɔ ŋwɔ ngu?”

⁶ Bɛʼngɛ èndzobo chɛ Ngwe à nu ŋwɔ chwɛ̀ʼ mɔ zeʼe efwɔ ese ngɛ, à gâ kpe, “Engere Ngwe gimkpaʼ ghɔ engɔ.”

⁷ É gà mbɔʼ engere, Ngwe à gâ kpe, “Ngwe na lè engere mɔ é mwɔ ne efùu nɔ, gɛ̀rɛ̀ le bɔ afwɛʼ mɔ é mwɔ ne enɛmɛrɛwù nɔ.”

⁸ Bɛʼngɛ, Ngwe de na ga mbɔʼ ŋwɔ mɔ kpe: Oh Ngwe, ebwa m̀fɔ̀ ngwɛ yà ne ngudu. Ngwo na klini bɔ mbyɛ ene aghɛʼ yɛ a me koʼro ngɛ.

⁹ Ngwo wa doʼo abwa yɛ a me koʼro ngɛ, gɛ̀rɛ̀ mà gwè angɔ yɛ a ne me koʼro bo ngɛ. Na ǹji yɛ, Ngwe, yɛ ma Ngwe njɛ ngɛ à shi zhwaʼa awɛ ene ngud gɛrɛ le ngwo ma gɛ̀nɛ awɛ fɔɔ azhɛmbyɛ njɛ ngɛ.

¹⁰ Engɔ gɛrɛ wu ga ebe ŋwɔ mɔ kpe, “Enyɛrɛ zeʼe ene eklada Masakɛ, ngwo à ndeere chwâ gɛrɛ ndèerè ezob ene ebwo mbyɛ.

¹¹ Ela bɔnɔ ba bɔɔ, e ba ngo be na ǹdiri sam nɔ, bɛʼngɛ ngwo tye.

¹² Ngwo wa ngo fudu angɔ na ǹdi nɔ, e gɛrɛ ma ngo kobo angɔ ne e ma kobo ǹdiri nɔ, bɛʼngɛ ngwo ne koʼokoʼo akyɛ gimkpaʼ mà ngo tsɔmɔ bwɛrɛ efwɔ endzobo kengudu.”

¹³ Ngwe à de shi ga ebe angere deʼ anji deʼ kpe, “Tsɔmɔ abɛɛ abwo anɔm ndza, bwɛ̀n èndzobo chɛ mmɛ ma ngo le bɔ m̀pɛ̀ʼ mbyɛ mwɔ na ala deʼ zɔ ngwo ma tɛʼ elo mbyɛ edɔm ngɛ?”

¹⁴ Éngɛ, engere ke ma bɔ afwɛʼ, Ngwe me saa kpe e fwɛʼ ebe abɔ byɛ e ma ngo pwèerè angɔ ngɛ bo?

« Vorige

Volg ons:

Geborgde skakels

Advertensies