Bɔ Efɛsɔs 6 - Aŋwɛʼrɛ Ebuumu Fe Nè Ngwe

Paalo tɛ̂ʼ Bwɔ mane Èngwa

¹ Bwɔ, e we koʼro endɔn na bwɔ Kristo nɔ kpe mbɔn zo ega èngwa mbɔn na bɔ kristo ene ekumu Masakɛ.

² E be ŋwɛʼrɛ efwɔ aŋwɛʼrɛ Ngwe kpe, “Ghɔ àtɛ mane áʼɔ̧̀ ngwɛ,” ezɔnɔ ne etɛʼɛ mbèmbè yɛ e me tɛʼ etɔ̧ɔrɔ achim ngɛ.

³ Etɔ̧ɔrɔ me ga kpe, “Abwa njɛ zhiri anchwɔnchwɔ ngwo gɛrɛ tsɔmɔ efwɔ ese efwɔ endzobo dɔɔdɔɔ.”

⁴ Ètɛ, mbɔn ke le shi bwɔ mbɔn sa bɔɔ etaa bo, bɛʼngɛ mbɔn kpee gɛrɛ tɛ̀ʼ angɔ ene ebum Masakɛ.

Paalo tɛ̂ʼ Àdzob mane masa

⁵ Àdzob, mbɔn zo ega èmasa mbɔn ene eghɔ mane ebum, gɛ̀rɛ̀ ma fwɛʼ ebe angɔ ene etaa ŋwaʼ, nkirinkin na aŋu mbɔn gɛrɛ ma zo ega Kristo ngɛ.

⁶ Mbɔn ke sa fwɛʼ me èndzobo chɛ angɔ me tɛʼ aghɔɔ ene mbɔn, gɛ̀rɛ̀ ma ke kpe angɔ bɛnnɛ angɔn bo, bɛʼngɛ mbɔn fwɛʼ na àdzob Kristo byɛ e ma fwɛʼ afwɛʼ Ngwe ene ńtara àmɔ̀ nɔ.

⁷ Mbɔn fwɛʼ ene ńtara ntsɔn na mbɔn ma fwɛʼ ebe Masakɛ ne mwɔ ebe bɔ bo nɔ.

⁸ Mbɔn nɛɛ kpe Masakɛ wa ngo nɛ̀rɛ̀ gho ŋwàʼaŋwàʼ ene afwɛʼ ǹchwɔ̀ yɛ engɔ ma fwɛʼ ngɛ, ka mwɔ èdzob ka ne me èdzob bo.

⁹ Ene aghɛʼ ŋwaʼ yɛ, mbɔn èmasa klini àdzob mbɔn anchwɔnchwɔ. Mbɔn ke sa fàa àdzob mbɔn bo mbɔʼnga mbɔn bɔ gimkpaʼ ne le ma masa ŋwaʼ, engɔ wɛ è mwɔ ezob ngɛ, engɔ gɛrɛ ne ma toʼo awɛɛ bo.

Aŋu bɔ kristo me né ngwè asatan ngɛ

¹⁰ É ngùdù mbɔn fɔɔ embè é tsɔmɔ ekama ene Masakɛ mbɔʼtye ekama kɛ ngɔ le mbɔn le ekama.

¹¹ Mbɔn ge ela ebiri Ngwe gimkpaʼ mbɔʼtye asatan ne fɔɔ angɔn bo.

¹² Ebiri bɔ ke mwɔ nè gho bo, bɛʼngɛ ntsɔ na ngwè ma akama mane eto amɔ efwɔ ese zɔnɔ mane akama ezhwɛɛrɛ bɔɔbɔɔ yɛ a mwɔ ekere ngɛ.

¹³ Éngɛ mbɔn ge ela ebiri Ngwe gimkpaʼ akwa ndzɔn enjitsɔ, mbɔʼtye anji abwa bɔɔbɔɔ yɛ zeʼ mbɔn me le ekama é ngwe gho m̀pɛ̀ʼ bwɛrɛ èndzobo chɛ e ma ngùdù ngɛ.

¹⁴ Mbɔn ndeere angɔn gɛrɛ ga éŋwaʼa agha gimkpaʼ, na gho ma shwɔrɔ ekwo etiri mɔ agha gimkpaʼ nɔ é ndèerè amɔ é le ka de mwɔ ebwa we. Mbɔn gɛrɛ le abwa yɛ a me koʼro efàarà Ngwe akyɛ gimkpaʼ ngɛ na gho ma ge àmpɛʼ ebiri akyɛ gimkpaʼ endzobo ebiri nɔ.

¹⁵ Mbɔn fɔɔ embè sa zhìn à sɛ̀ɛrɛ̀ ega Ngwe ma zeʼ nè m̀bwarambwad na gho shi ge ebla me tama ene ekama shi ndeere amɔ é zhiri nɔ.

¹⁶ É zhiiri ene abwa zɔnɔ gimkpaʼ, mbɔn fɔɔ embè é le ebɛrɛ ene Kristo, yɛ e ma ngo mwɔ endɔn na m̀foʼro wɛ gho me bere ma kɔ̀ʼ aŋwɔ̀ yɛ asatan ma ndwa ekwa ngɔ ngɛ nɔ.

¹⁷ Le epweere yɛ mbɔn shi le ngɛ mwɔ na àkɔŋɔ nɔ, ega Ngwe mwɔ endɔn na eŋwɔ wɛ azhwɛɛrɛ ma ndɛʼ ngɛ nɔ.

¹⁸ Mbɔn sa tsàʼrà Ngwe akyɛ gimkpaʼ mane ene abwa gimkpaʼ kpe Ngwe ndɛʼ azhwɛɛrɛ mɔ shi a gbee abɔ é tsàʼrà Ngwe. Éngɛ nɔ mbɔn ndeere angɔn é ma tsàʼrà Ngwe akyɛ gimkpaʼ ato bɔ kristo gimkpaʼ.

¹⁹ Mbɔn gɛrɛ tsàʼrà Ngwe ene mmɛ kpe endzobo mmɛ fuʼu eklo ngu sa ga ngɛ, Ngwe ndɛʼ abwa ena é ga mbɔʼtye ngɛ mmɛ sa sɛ̀ɛrɛ̀ abwa nɛŋɛ efwɔ ekɔn ǹchwɔ̀ ne ma le ebum bo.

²⁰ Ka mmɛ de mwɔ a ndɔdzɔm mmɛ na ghontɔm ene ekɔn ǹchwɔ̀ wunɔ. Mbɔn tsaʼra Ngwe shi etaa mfu me kama mbɔʼtye mmɛ sa sɛ̀ɛrɛ̀ ekɔn ǹchwɔ̀ wunɔ ene ndzɛ̀rɛ̀ nè ebum le.

Ngudu atsaʼra

²¹ Taykikɔs na ghongwaanɔm bɔ achim Kristo, wɛ ntsɔ me doʼ gɛrɛ mwɔ gho afwɛʼ éŋwaʼa ebe Masakɛ bo. Engɔ wa ngo tòʼrò abwa gimkpaʼ endɔn mbɔʼ mmɛ mbɔʼtye mbɔn gɛrɛ nɛɛ aŋu mmɛ mwɔ mane abwa yɛ mmɛ ma fwɛʼ ngɛ.

²² Ato ebwa yɛ mmɛ mà sàa engɔ endɔn ngɛ ne é le mbɔn nɛɛ na aŋu mbyɛɛ mwɔ ngɛ é gɛrɛ twàʼrà angɔn.

²³ M̀bwarambwad mwɔ nè mbɔn bɔ Ngwe gimkpaʼ. Ngwe àtɛ mane Masakɛ bɔ Yeso Kristo mwɔ nè bɔ kristo gimkpaʼ. Mbɔn fɔɔ embè é sa doʼo angɔn mbɔrɔmbɔn. Ngwe àtɛ mane Masakɛ bɔ Yeso Kristo le mbɔn doʼo angɔn mbɔrɔmbɔn gɛrɛ fɔɔ embè é bɛrɛ ene Kristo.

²⁴ Ngwe tee enarataa mɔ ebe bɔ gimkpaʼ byɛ e me doʼo Masakɛ Yeso Kristo ngɛ. Mbɔn fɔɔ embè é doʼo engɔ anchwɔnchwɔ.