Aanlyn Bybel

Bɔ Efɛsɔs 1 - Aŋwɛʼrɛ Ebuumu Fe Nè Ngwe

Paalo sàa atsaʼra

¹ Na mmɛ Paalo, m̀pwɔnɔntɔm Yeso Kristo, wɛ Ngwe à shi kpe mmɛ wa ngo mwɔ̀ ngɛ. Mmɛ na ŋwɛ̀ʼrɛ̀ aŋwɛʼrɛ zɔnɔ é ndɛʼ ebe bɔ Ngwe efwɔ abɛ Efɛsɔs, byɛ e mwɔ ene ebuumu nè Yeso Kristo, gɛ̀rɛ̀ ma kìrì engɔ ene etaa éŋwaʼa ngɛ.

² Ngwe Àtɛ bɔ mane Masakɛ Yeso Kristo ndɛʼɛ enarataa mane m̀bwarambwad endɔn.

M̀bɔ̀nɔ ye ebe abɔ byɛ e mwɔ ene ebwa ŋwaʼ nè Kristo ngɛ

³ Mbɔn le ntsɔ ndɛʼ ebɛrɛ ebe Ngwe yɛ ma Àtɛ ebe Masakɛ bɔ Yeso Kristo ngɛ. Enga ene ebuumu bɔ nè Kristo, Ngwe shi ndɛʼ m̀bɔ̀nɔ ebe bɔ efwɔ ese yɛ e mwɔ ekere ngɛ.

⁴ Ngwe à sa ye ndèerè ese nɔ, shi dye chi abɔ é mwɔ bɔ mɔ nyɛ̀rɛ̀ zèʼe ene ebuumu bɔ nè Kristo, mbɔʼtye ntsɔ me pɛ gɛrɛ ne nyim ebwa efàarà ngɔ bo. Ngwe à le énde mbɔʼnga engɔ a me doʼo abɔ

⁵ Ngwe à shi dye nu etsɛrɛ mɔ nyɛ̀rɛ̀ zèʼe ene ebwa wɛ Yeso Kristo à fwɛʼ ngɛ kpe, engɔ wa le abɔ ntsɔ shi bwɔanɔm mane bwɔaye ngɔ. Ngwe à le énde mbɔʼnga engɔ à shi kɛʼɛ é le engɛ̂, e gɛrɛ me nara ebe engɔ.

⁶ Ngwe à le énde mbɔʼtye ntsɔ sa ghɔ engɔ ene enarataa kɛ yɛ engɔ shi tee ebe bɔ ngɛ, ka de mwɔ aŋu ntsɔ ne me koʼro é le bo ngɛ. Bɛʼngɛ engɔ à le éngɛ mbɔʼ ebuumu bɔ nè ŋwɔ mɔ wɛ à me doʼo ghɛʼ ngɛ.

⁷ E shi lɔɔ abɔ achim anɔm Kristo, éngɛ me ga kpe a shi dzɛrɛ abwa bɔɔbɔɔ bɔ. Ewunɔ na tee kpe enarataa Ngwe ye klɔ ngwo nɛɛ!

⁸ Na aŋu engɔ à ndɛʼ ebe bɔ da dɛʼɛ nyɛrɛ zeʼ anyi ngɛ, a shi le ntsɔ le azɔm gimkpaʼ gɛrɛ nɛ̀ɛ ǹji ene abwa akɛkɛ.

⁹ Ngwe à le ebwa wɛ engɔ à shi kɛʼɛ ngɛ, gɛ̀rɛ̀ le ntsɔ nɛ̀ɛ etɔ̧ɔrɔ nɛŋɛ yɛ engɔ à shi kɛʼɛ nyɛ̀rɛ̀ zèʼe achim Kristo ngɛ.

¹⁰ Èkɛʼɛ zɔnɔ yɛ Ngwe ma ngo mɛ̀ɛrɛ̀ efwɔ èndzobo chɛ e me koʼo ngɛ né buumu ela gimkpaʼ byɛ engɔ à ndèerè ekere mane a chwâ ngɛ afwɔbi. Ela bɔnɔ gimkpaʼ ba ngo mwɔ enji Kristo wɛ mwɔ na ato ene ela gimkpaʼ ngɛ.

¹¹ Ngwe à ndèerè ela gimkpaʼ ene ekɛʼ mane etsɛrɛ mɔ, engɔ gɛrɛ chi abɔ na bɔ mɔ nɔ ene ebuumu nè Yeso Kristo, aŋu engɔ à shi kɛʼɛ egha tsɛrɛ é fwɛʼ ngɛ.

¹² Éngɛ ntsɔ byɛ, ntsɔ à mwɔ bɔ mbèmbè â ma zhùŋù à kɔ̀ʼ Kristo ngɛ, sa ghɔ Ngwe ene enɛŋɛrɛkɛ ngɔ.

¹³ Éngɛ mbɔn à gɛrɛ kìrì bɔ Ngwe èndzobo chɛ mbɔn à zo ekɔn éŋwaʼa ngɛ. Ekɔn ǹchwɔ̀ wɛ â nu etyê zeʼe endɔn ngɛ. Mbɔn à bɛrɛ ene Kristo, Ngwe gɛrɛ gè anɛ̂ mɔ ene mbɔn. Anɛ̂ zɔnɔ à na azhwɛɛrɛ pɛ yɛ engɔ à shi tɔ̧ɔrɔ ngɛ.

¹⁴ Azhwɛɛrɛ na anɛ̂ yɛ à ma tee kpe, ntsɔ ba ngo nu ala yɛ Ngwe à shi tɔ̧ɔrɔ ebe bɔ mɔ ngɛ. Ntsɔ ba ngo le ela bɔnɔ èndzobo chɛ Ngwe ma ngo ndɛʼ ela gimkpaʼ byɛ Kristo à lɔɔ chi abɔ mbɔʼtye ntsɔ le ngɛ. Mbɔn le ntsɔ sa ghɔ Ngwe ene angwanìm ekama ngɔ.

Atsaʼra Ngwe Paalo

¹⁵ Mmɛ à shi zo mbɔʼ ebɛrɛtaa yɛ mbɔn me le ene Masakɛ Yeso Kristo, mane edoʼ yɛ mbɔn me le nè bɔ Ngwe gimkpaʼ ngɛ. Ene ǹji zɔnɔ,

¹⁶ mmɛ wa ndɛʼ ebɛrɛ ebe Ngwe mbɔʼ mbɔn, gɛ̀rɛ̀ ma zhuŋu angɔn akyɛ gimkpaʼ yɛ mmɛ ma tsàʼrà Ngwe ngɛ.

¹⁷ Mmɛ na tsàʼrà Ngwe kpe, Ngwe yɛ mwɔ àtɛ Masakɛ bɔ Yeso kristo, wɛ eghɔ gimkpaʼ mane ekama gimkpaʼ mwɔ êngɔ ngɛ, è ndɛʼ azhwɛɛrɛ yɛ à ma le mbɔn le azɔm ngɛ endɔn, gɛ̀rɛ̀ le mbɔn nɛ̀ɛ Ngwe anchwɔnchwɔ.

¹⁸ Mmɛ gɛrɛ wa tsàʼrà Ngwe kpe è fuʼu ńtara ntsɔn, mbɔn me nɛɛ ma zhùŋù à kɔ̀ʼ aŋu engɔ a shi zɔʼ angɔn ngɛ, mmɛ gɛrɛ wu tsàʼrà Ngwe kpe mbɔn nɛɛ na aŋu etɔ̧ɔrɔ yɛ Ngwe me le ebe bɔ mɔ e me ghɛʼɛ ngɛ.

¹⁹ Mmɛ gɛrɛ tsàʼrà Ngwe kpe, mbɔn nɛɛ ekama kɛ Ngwe yɛ e ma afwɛʼ abwaʼ bɔ, ntsɔ byɛ ntsɔ me bɛrɛ gɛrɛ ma fɔɔ embè é bɛrɛ ngɛ. Ngwe ya fwɛʼ ene ekama ebe bɔ nkirinkin na à fwɛʼ è

²⁰ zhwɛɛmɛ Kristo ene ewu gɛrɛ le engɔ tsɔmɔ ene afwɔ ghɔ abɛɛ abwo anɔm Ngwe ekere ngɛ.

²¹ Éngɛ Kristo shi ato ebe eto gimkpaʼ, gɛ̀rɛ̀ mwɔ ato ene akama gimkpaʼ, ekumu ngɔ gɛrɛ shi fɔɔ akumu gimkpaʼ, angɔ yɛ mwɔ enjitsɔ mane angɔ yɛ a ma bli é zeʼe ngɛ.

²² Éngɛ Ngwe a shi ge ela gimkpaʼ enji elo Kristo gɛrɛ shi le engɔ mwɔ ato edɔm ela gimkpaʼ efwɔ ndɔngwe.

²³ Ndɔngwe ne na ekwa Kristo nɔ, e ma le engɔ shwe mɛ̀ɛrɛ̀, engɔ wɛ è ma mɛ̀ɛrɛ̀ abwa gimkpaʼ, akwâ gimkpaʼ mane agha gimkpaʼ ngɛ.

« Vorige

Volg ons:

Geborgde skakels

Advertensies