Aanlyn Bybel

Bɔ Kolose 1 - Aŋwɛʼrɛ Ebuumu Fe Nè Ngwe

¹ Aŋwɛʼrɛ zɔnɔ ne zeʼe ebe Paalo wɛ mwɔ m̀pwɔnɔntɔm Yeso Kristo ene eshi Ngwe ngɛ. Mmɛ na ŋwɛ̀ʼrɛ̀ nè ghongwaanɔm bɔ Timatyɛ.

² E ne saa ebe bɔ Ngwe anɔm mane aye byɛ e me le ebɛrɛ ene Ngwe ene ebuumu nè Kristo abɛ Kolosae ngɛ. Ngwe àtɛ bɔ ndɛʼ enarataa mane m̀bwarambwad endɔn.

Paalo bɛ̀rɛ Ngwe mbɔʼ bɔ Kolosae

³ Mbyɛɛ ba ndɛ̀ʼ ebɛrɛ ebe Ngwe àtɛ Masakɛ bɔ Yeso Kristo akyɛ gimkpaʼ yɛ mbyɛɛ ma tsàʼrà Ngwe ato ndzɔn ngɛ.

⁴ Mbyɛɛ na ndɛ̀ʼ ebɛrɛ mbɔʼnga mbyɛɛ shi zo mbɔʼ ebɛrɛtaa yɛ mbɔn me le ene Yeso Kristo, mane edoʼ yɛ mbɔn me le ene bɔ Ngwe gimkpaʼ awaʼa ngɛ.

⁵ Èndzobo chɛ Ǹtɔm éŋwaʼa, mmɛ two ekɔn ǹchwɔ̀ wɛ à dye zeʼe endɔn ngɛ, mbɔn à zo ala yɛ â ga kpe mbɔn sa zhùŋù à kɔ̀ʼ ngɛ. Éngɛ ebɛrɛtaa mane edoʼ ndzɔn ne tyɛ amɔ ene ezhuŋu kɔʼɔ zɔnɔ yɛ e me kamma shi endɔn ezob ngɛ.

⁶ Ǹtɔm ǹchwɔ̀ zɔnɔ à ya zeʼe zeʼe nè m̀bɔ̀nɔ, à ma sɛ̀ʼ à ngɔɔ ngɔɔ efwɔ ese na aŋu à ma sɛ̀ʼ abwaʼ ndzɔn èjɛ̂ mbɔn à dye zo mbɔʼ enarataa Ngwe è nɛɛ aŋu e mwɔ éŋwaʼa ngɛ.

⁷ Mbɔn à bɛɛrɛ mbɔʼ enarataa Ngwe ebe Epafras wɛ è mwɔ ghongwa ǹchwɔ̀ ngbɛɛ achim Yeso Kristo, e gɛrɛ mwɔ gho nè ebɛrɛtaa éŋwaʼa Kristo ene egha njɛɛ ngɛ.

⁸ Engɔ shi sɛɛrɛ endyɛɛ mbɔʼ edoʼ yɛ azhwɛɛrɛ me ndɛʼ endɔn ngɛ.

⁹ Ne ǹji yɛ mbyɛɛ ma tsàʼrà Ngwe akyɛ gimkpaʼ mbɔʼ mbɔn, nyɛrɛ edzoro chɛ mbyɛɛ à zo mbɔʼ mbɔn ngɛ. Mbyɛɛ na bii Ngwe kpe engɔ le mbɔn nɛɛ ebwa we engɔ me shi endɔn ngɛ anchwɔnchwɔ. Gɛrɛ ga kpe è ndɛ̀ʼ azɔm kɛ endɔn é nɛɛ abwa ye a me zeʼ achim azhwɛɛrɛ ngɛ.

¹⁰ Éngɛ nɔ mbɔn ba ngo nɛɛ sa tsɔmɔ aŋu Masakɛ ma ke ngɛ, gɛ̀rɛ̀ sa le ebwa wɛ engɔ ma gɛnɛ amɔ anyi ngɛ. Etsɔmɔ ndzɔn ya sa tee m̀pèrè abwa ǹchwɔ̀ gimkpaʼ mbɔn sa tɛ̀bɛ me nɛɛ Ngwe.

¹¹ Ekama kɛ́ yɛ e ma zeʼe ebe Ngwe ngɛ kaama angɔn. Mbɔn ndeere angɔn ene gɛnɛ é kii abwa gimkpaʼ ene eklinitaa.

¹² Mbɔn ndɛʼ ebɛrɛ ebe àtɛ ene ela gimkpaʼ. Engɔ à shi ndeere angɔn mbɔn koʼro é le engɔn eklo ene ala yɛ è me kamma shi ebe bɔ mɔ byɛ e mwɔ efwɔ ekɛʼ ngɛ.

¹³ Engɔ shi chi abɔ efwɔ ekama akwâ di, e nyɛɛmɛ nu abɔ zeʼe efwɔ ebwa m̀fɔ̀ ŋwɔ etaa mɔ.

¹⁴ Engɔ shi lɔɔ abɔ nyɛ̀rɛ̀ zèʼe achim engɔ, é le e dzɛrɛ abwa bɔɔbɔɔ bɔ.

M̀pè gho yɛ ma Kristo ngɛ mane afwɛʼ mɔ

¹⁵ Gho deʼ ke shi zɔ Ngwe bo, bɛʼngɛ bɔ be nɛɛ aŋu Ngwe mwɔ ngɛ, aŋu e ma zɔ Kristo me nu ezɔɔrɔ Ngwe ngɛ.

¹⁶ Ngwe à ndeere ela gimkpaʼ byɛ e mwɔ ezob mane angɔ a chwâ ngɛ, angɔ e ma zɔ mane angɔ e ne ma zɔ bo, ezhwɛɛrɛ kamakam, èmasakɛ, eto mane akama gimkpaʼ achim Kristo. Ngwe à ndeere ese gimkpaʼ achim engɔ mane ebe engɔ.

¹⁷ Kristo à shi dye mwɔ tye ela bɔnɔ ègimkpaʼ sa mwɔ. E ne ebuumu nè Ngwe, Kristo we ndɛʼ afwɔ yɛ a me koʼro ebe ala ŋwaʼaŋwaʼ ngɛ.

¹⁸ Engɔ na ato ebe abɔ byɛ e me le ebɛrɛ ene engɔ ngɛ. Abɔ byɛ e gɛrɛ mwɔ ne ekwa ngɔ nɔ. Engɔ na ŋwɔ kɛ́ wɛ Ngwe à zhwɛɛmɛ ene ewu mbɔʼtye engɔ zhiʼ nu ato ene ela gimkpaʼ ngɛ.

¹⁹ À na Ngwe à tsɛrɛ egha mɔ kpe ŋwɔ nu ezɔɔrɔ ndze mbè Ngwe.

²⁰ Ngwe à tsɛrɛ e wu nu ese zɔnɔ egha mɔ achim ŋwɔ mɔ. Engɔ à le m̀bwarambwad nè bɔ efwɔ ese ene anɔm ŋwɔ mɔ azɔd baʼra. Éngɛ nɔ engɔ wu bwɛ ela gimkpaʼ a chwâ mane ezob egha mɔ.

²¹ À ne endzobo deʼ, ezhin me dɔɔ aghɛɛghɛɛ ndzɔn nè Ngwe. Mbɔn mwɔ bɔ m̀pɛ̀ʼ ngɔ mbɔʼ abwa bɔɔbɔɔ yɛ mbɔn à ma le gɛrɛ ma zhùŋù ngɛ.

²² Bɛʼngɛ, ànchwɔ̀ wunɔ, achim ewu ŋwɔ mɔ edɔm azɔd baʼra na gho nɔ, Ngwe shi wu bara angɔn ene asɔrɔ mɔ mbɔʼtye è nu angɔn zeʼe efàarà mɔ mbɔn me pɛ ne me nyimi abwa deʼ bo, gɛ̀rɛ̀ ne me go ebwa deʼ bo.

²³ Enjitsɔ nɔ, mbɔn klini ebɛrɛtaa ndzɔn ene ekama. Mbɔn ke bɛrɛ ala deʼ njiʼri angɔn ene ezhuŋu kɔʼɔ yɛ ekɔn ǹchwɔ̀ wunɔ à nu zeʼe endzobo chɛ mbɔn a zo ega Ngwe ngɛ bo. Ne ekɔn ǹchwɔ̀ wɛ mbɔn à zo e gɛrɛ shi sɛɛrɛ ebe bɔ gimkpaʼ efwɔ ese gɛrɛ mwɔ engɔ wɛ mmɛ mwɔ gho afwɛʼ anyi ngɛ.

Afwɛʼ Paalo na gho afwɛʼ kristo nɔ

²⁴ Éngɛ mmɛ we gɛnɛ angu ene ǹgoʼ yɛ mmɛ ma zɔ ene egha ndzɔn ngɛ. Aŋu mmɛ ma zɔ ǹgoʼ ene nyɛm ekwa ndza ngɛ, mmɛ na kpèdè é mɛ̀ɛrɛ̀ ǹgoʼ Kristo yɛ e mwɔ ene ǹchwɔ̀ ebe abɔ byɛ e ma bɔ Kristo byɛ e mwɔ na eklo ekwa ngɔ bi nɔ.

²⁵ Ngwe shi le angu mmɛ mwɔ gho afwɛʼ ebe abɔ byɛ e me le ebɛrɛ ene kristo ngɛ. Engɔ me ndɛʼ afwɔ zɔnɔ é fwɛʼ ene ǹchwɔ̀ ndzɔn. Afwɔ zɔnɔ né sɛ̀ɛrɛ̀ ekɔn wunɔ pɛ̀dɛ̀ ebe bɔ gimkpaʼ.

²⁶ Ekɔn wunɔ wɛ â me nɛŋɛ ebe bɔ nyɛrɛ èjɛ̂ sam, ewu engɔ shi tòʼro ebe bɔ mɔ enjitsɔ.

²⁷ Eshi Ngwe efwɔ etaa mɔ né le bɔ mɔ nɛɛ enɛŋɛ zɔnɔ yɛ e me fɔ̧rɔ nara da dɛʼɛ ngɛ. Enɛŋɛ mɔmbwo ne ga kpe, Yeso we mwɔ efwɔ ńtara ntsɔn mbɔn ebɛbɔ, é tee kpe mbɔn ba ngo nu eklo ene enɛŋɛrɛkɛ Ngwe.

²⁸ Éngɛ mbyɛɛ na sɛ̀ɛrɛ̀ Kristo ebe gho ŋwàʼaŋwàʼ! Mbyɛɛ na tee gɛrɛ gbeʼre ato gho ŋwàʼaŋwàʼ ene azɔm Masakɛ, mbɔʼtye mbyɛɛ nu gho ŋwàʼaŋwàʼ na gho shi tɛbɛ efwɔ kristo ngɛ zeʼe efàarà Ngwe ene ebuumu nè Kristo.

²⁹ É fwɛʼ afwɛʼ zɔnɔ, mmɛ fwɛʼ ene ekama, kɔnɔshin ene engwa ekama Kristo yɛ e ma fwɛʼ ekwa ngu ngɛ.

« Vorige

Volg ons:

Geborgde skakels

Advertensies