Aanlyn Bybel

3 Eyɔɔ 1 - Aŋwɛʼrɛ Ebuumu Fe Nè Ngwe

¹ Aŋwɛʼrɛ zɔnɔ ne zeʼe ena, mmɛ ato efwɔ ndɔngwe, ma ngɔɔ ebe esɔrɔ etaa ngu Geyɔs, wɛ mmɛ me doʼo ghɛʼ ene éŋwaʼa ngɛ.

² Esɔrɔ etaa ngu, mmɛ wa tsàʼrà Ngwe kpe ngwo ma tsɔmɔ ene ekama gɛrɛ kpe abwa njɛ ma zhiri anchwɔnchwɔ, aŋu mmɛ me nɛɛ kpe ngwo wa kama ene azhwɛɛrɛ ngɛ.

³ Mmɛ à gɛnɛ angu èndzobo chɛ bwɔngwa deʼ achim kristo â bwɛn ga ena aŋu ebɛrɛtaa njɛ me kama ene éŋwaʼa, ngwo gɛrɛ ma bwò à tsɔmɔ ene éŋwaʼa ngɛ.

⁴ Ne tsɛʼ ala deʼ a ma le mmɛ ma gɛnɛ angu fɔɔ é zo kpe bwɔ mbu ba tsɔmɔ ene éŋwaʼa bo.

E bɔ̀nɔ Geyɔs

⁵ Esɔrɔ etaa ngu, ngwo wa fwɛʼ abwa yɛ a me koʼro ene afwɛʼ njɛ ebe Ngwe ngɛ ebe bɔ kristo ka angɔ de mwɔ àgɔn.

⁶ Angɔ à shi ga ebe ndɔngwe yɛ mwɔ anɔ ngɛ mbɔʼ edoʼ njɛ. Mmɛ buʼ ebwo kpe ngwo kpede abɔ bɔnɔ aŋu angɔ ma fɔɔ embè ene eghɛb amɔ ngɛ, mbɔʼtye Ngwe ma gɛnɛ amɔ.

⁷ Angɔ à na fwɛʼ afwɛʼ ene ekumu Kristo ne ma ke ekpede deʼ ebe abɔ byɛ e ne me bɛrɛ ene Ngwe ngɛ bo.

⁸ Éngɛ ntsɔ bɔ kristo be koʼro é kpèdè abɔ bɔnɔ, mbɔʼtye afwɔbi nè angɔ ntsɔ be né fɔɔ embè é ma fwɛʼ nè angɔ ene éŋwaʼa.

E kwɔnɔ Diyotrefes gɛrɛ bɔ̀nɔ̀ Demetres

⁹ Mmɛ à shi ŋwɛʼrɛ ebe ndɔrɔngwe chɛ e mwɔ efwɔ antiri abɛ ndzɔn ngɛ, bɛʼngɛ Diyotrefes wɛ me doʼo é mwɔ ato ngɛ, ke doʼo é le ebwa wɛ mmɛ à ga ngɛ bo.

¹⁰ Éngɛ mala mmɛ zeʼe angɛ, mmɛ wa ngo le mbɔn nɛɛ mbɔʼ abwa gimkpaʼ yɛ engɔ shi fwɛʼ ngɛ, m̀pèrè abwa bɔɔbɔɔ mane andɔɔ yɛ engɔ me ga mbɔʼ mbyɛɛ ngɛ. Bɛʼngɛ e ne mwɔ na abwa yɛngɛ a de ne koʼo ebe engɔ bo nɔ. Engɔ à tɔn é ngo nu bɔ kristo èndzobo chɛ angɔ à ma zeʼe ngɛ, engɔ à kɔn abɔ byɛ à ma ke nu bɔ a ndɔngwe ngɛ, è fli angɔ efwɔ ndɔngwe.

¹¹ Esɔrɔ etaa ngu, ke kpe mbè mɛnɛ ebwa wɛ e me bɔɔ ngɛ bo, bɛʼngɛ mɛnɛ me ebwa wɛ e me nara ngɛ. Egho wɛ ma le ma abwa ǹchwɔ̀ ngɛ, na ŋwɔ Ngwe. Egho wɛ ma le ma abwa bɔɔbɔɔ ngɛ, ke shi nɛɛ Ngwe bo.

¹² Bɔ gimkpaʼ ba ga ǹchwɔ̀ mbɔʼ Demetriyɔs, engɔ wa fwɛʼ abwa yɛ a ma tee kpe engɔ na gho ǹchwɔ̀ ngɛ. Mbyɛɛ gɛrɛ zhiiri ga kpe engɔ we nara. Mbɔn be nɛɛ kpe ebwa wɛ mbyɛɛ ma ga ngɛ ne éŋwaʼa.

Atsaʼra Ngudu

¹³ Mmɛ we le abwa akɛkɛ é ga endɔn, bɛʼngɛ mmɛ ke doʼo é ŋwɛ̀ʼrɛ̀ a chwâ bo.

¹⁴ Mmɛ wa zhuŋu é zamma zeʼe é zɔ angɔn afwɔ mpiʼ, gɛ̀rɛ̀ ga endɔn eklo ngu mɔmbwo.

¹⁵ M̀bwarambwad mwɔ nè mbɔn. Asɔrɔ ndzɔn ya gamma endɔn. Gamma ebe asɔrɔ yɛ awaʼa ngɛ eŋwàʼaŋwàʼ ene akumu.

« Vorige

Volg ons:

Geborgde skakels

Advertensies