Aanlyn Bybel

2 Timoti 1 - Aŋwɛʼrɛ Ebuumu Fe Nè Ngwe

Paalo sàa atsaʼra ebe Timatyɛ

¹ Aŋwɛʼrɛ zɔnɔ ne zeʼ ena Paalo m̀pwɔnɔntɔm Yeso Kristo, wɛ mwɔ ene eshi Ngwe ngɛ kpe mmɛ sɛɛrɛ mbɔʼ etyê wɛ Ngwe à ga kpe ntsɔ ba ngo le ene ebuumu bɔ nè Yeso Kristo ngɛ.

² Mmɛ na ŋwɛ̀ʼrɛ̀ engɛ̂ Timatyɛ ŋwɔ etaa ngu, kpe Ngwe àtɛ mane Yeso Kristo wɛ mwɔ Masakɛ bɔ ngɛ, ndɛʼ enarataa, eklasɔn mane m̀bwarambwad engɛ̂.

³ Mmɛ ndɛʼ ebɛrɛ ebe Ngwe yɛ mmɛ ma fwɛʼ ebe engɔ ene etaasɔn fyɛ e me pɛ, aŋu ètɛ sam bɔ à me fwɛʼ ngɛ. Mmɛ ma bɛ̀rɛ engɔ enji gimkpaʼ aŋu mmɛ ma zhuŋu awɛ efwɔ atsaʼra Ngwe ndza ngɛ.

⁴ Mmɛ wa zhuŋu awɛ aŋu ngwo ma chwɛɛrɛ endɛrɛ ngɛ, mmɛ gɛrɛ ma ke é zɔ awɛ, e le kpe egɛnɛ me shwe efwɔ ekwa ngu.

⁵ Mmɛ wa zhuŋu mbɔʼ ebɛrɛtaa éŋwaʼa fyɛ ngwo me le ngɛ, é pèe ebɛrɛtaa yɛ áʼɔ̧̀ tɛ̀bɛ ngwɛ Loyis mane áʼɔ̧̀ ngwɛ Yunis â me le ngɛ. Mmɛ gɛrɛ we nɛɛ kpe, ngwo we le ebɛrɛtaa yɛngɛ.

⁶ Ene aghɛʼnji zɔnɔ, mmɛ wa ke kpe ngwo shi etɔ̧ɔrɔ yɛ Ngwe à ndɛʼ engɛ̂ ngɛ shi mwɔ ekɔʼɔ nyɛrɛ zeʼ aŋu mmɛ à tɛʼ ebwo mbu ato njɛ ngɛ.

⁷ Azhwɛɛrɛ yɛ Ngwe ma ndɛʼ ebe bɔ ngɛ ke ma le abɔ ntsɔ ma biri akwa bo, bɛʼngɛ azhwɛɛrɛ ngɔ na ndɛʼ ebe bɔ me ekama, edoʼ mane eklini ekwa.

⁸ Ngwo ke sa jù é sɛ̀ɛrɛ̀ mbɔʼ Masakɛ bɔ kà mbɔʼ mmɛ wɛ è mwɔ ghodzɔm mbɔʼ Kristo ngɛ bo. Ankɔmɔ éngɛ bɛrɛ é zɔ ǹgoʼ nè mmɛ mbɔʼ ekɔn ǹchwɔ̀ nyɛrɛ zeʼ ene ekama Ngwe ma ndɛʼ engɛ̂ é fwɛʼ ngɛ.

⁹ Engɔ à pwèere abɔ gɛrɛ zɔʼ abɔ kpe ntsɔ mwɔ bɔ mbe, ke mwɔ ene abwa yɛ ntsɔ à shi fwɛʼɛ ngɛ bo, bɛʼngɛ ne me ezhuŋu mane enarataa ngɔ. Engɔ à tee enarataa zɔnɔ ebe bɔ nyɛrɛ zeʼ achim Yeso Kristo tye à sa ngo zɛʼ ese.

¹⁰ Bɛʼngɛ enjitsɔ, Ngwe shi tee enarataa mɔ ebe bɔ aŋu Yeso Kristo Àsaase shi zeʼe ngɛ. Engɔ a shi tsɔŋɔ ekama ewu gɛrɛ shi tee etyê kengudu ebe bɔ nyɛ̀rɛ̀ zèʼe ene ekɔn ǹchwɔ̀.

¹¹ Ngwe a shi chi angu na m̀pwɔnɔntɔm mane àtee abwa é sɛ̀ɛrɛ̀ ekɔn ǹchwɔ̀ ngɔ,

¹² ne ǹji yɛ mmɛ ma zɔ ǹgoʼ zɔnɔ ngɛ. Bɛʼngɛ mmɛ ke ma jù ka mpiʼ bo, mbɔʼnga mmɛ we nɛɛ egho wɛ mmɛ ma shi etaa mfu ene engɔ ngɛ, mmɛ gɛrɛ me nɛɛ anchwɔnchwɔ kpe engɔ wa ngo kɔʼ abwa yɛ engɔ me ge abwo ndza ngɛ bwɛn anji tsɛrɛ esɛʼ.

¹³ Ngwo klini ega éŋwaʼa wɛ mmɛ à tee engɛ̂ ngɛ ekamakama shi e mwɔ na aghɛʼnji engɛ̂ é kiri nɔ, ngwo gɛrɛ shi ebɛrɛtaa mane edoʼ yɛ e mwɔ ebɔ ene ebuumu nè Yeso Kristo ngɛ.

¹⁴ Enyɛrɛ zeʼ ene ekama azhwɛɛrɛ pɛpɛ, yɛ à me efwɔ akwa bɔ ngɛ, a shi le ntsɔ klini ekɔn ǹchwɔ̀ wɛ Ngwe me ndɛʼ ebe bɔ ngɛ ene ǹchwɔ̀.

¹⁵ Ngwo we nɛɛ kpe bɔ kristo gimkpaʼ efwɔ abɛɛ abɛ Esya â shi bɛʼrɛ angu. Fygelus mane Hermogenes à shi buumu angɔ gɛrɛ.

¹⁶ Ngwe tee eklasɔn mɔ ebe ekla Onesiforus, mbɔʼnga engɔ à twaʼra angu akyɛ akɛkɛ. Engɔ à ke ma jù kpe mmɛ wa a dzɔm bo,

¹⁷ Aŋu engɔ à bwɛn a Rom ngɛ, engɔ à klada sa zɛʼ angu bwɛn èndzobo chɛ engɔ à zɔ angu ngɛ.

¹⁸ Mmɛ tsaʼra Ngwe kpe Masakɛ yaa tee eklasɔn mɔ ebe engɔ anji tsɛrɛ esɛʼ! Ngwo we nɛɛ anchwɔnchwɔ ekpede yɛ engɔ à ndɛʼ ena abɛ Efɛsɔs ngɛ.

« Vorige

Volg ons:

Geborgde skakels

Advertensies