2 Bɔ Tɛsalonika 1 - Aŋwɛʼrɛ Ebuumu Fe Nè Ngwe

¹ Aŋwɛʼrɛ zɔnɔ ne zeʼe ebe Paalo, Saylas mane Timatyɛ. Angɔ ne tɔmɔ aŋwɛʼrɛ zɔnɔ ebe bɔ ndɔngwe a Tesalonika, byɛ e mwɔ bɔ Ngwe àtɛ mane Masakɛ bɔ Yeso Kristo ngɛ.

² Ngwe àtɛ bɔ mane Masakɛ bɔ Yeso Kristo ndɛʼ enarataa mane m̀bwarambwad mɔ endɔn.

Ngwe ya ngo sɛʼ bɔ ene aghɛʼ yɛ a me koʼro ngɛ

³ Bwɔngwa mbyɛɛ, e we nara kpe mbyɛɛ sa bɛ̀rɛ Ngwe akyɛ gimkpaʼ mbɔʼ mbɔn, mbɔʼnga ebɛrɛtaa ndzɔn ya tɛ̀bɛ anchwɔnchwɔ. Edoʼ yɛ gho ŋwàʼaŋwàʼ abwaʼ ndzɔn me le nè abɔ abê ngɛ ya tɛ̀bɛ à ngɔɔ embè embè.

⁴ Ne ǹji yɛ mbyɛɛ mbwo ma fɛfi mbɔʼ mbɔn efwɔ ndɔrɔngwe gimkpaʼ ngɛ. Mbyɛɛ na fɛfi njɛɛ mbɔʼ mbɔn ene aghɛʼnji yɛ mbɔn ma ngɔɔ embè ma nɔm akii, gɛ̀rɛ̀ le ebɛrɛtaa nyɛ̀rɛ̀ zèʼe ene enyii mane ǹgoʼ yɛ mbɔn ma zɔ enji gimkpaʼ ngɛ.

⁵ Abwa zɔnɔ ne tee apɛpɛ kpe etsɛrɛ esɛʼ Ngwe ne éŋwaʼa, éngɛ na abwa zɔnɔ a ma le Ngwe bɛrɛ kpe mbɔn be koʼro é le afwɔ efwɔ ebwa m̀fɔ̀ ngɔ. Mbɔn na zɔ ǹgoʼ mbɔʼ ebwa m̀fɔ̀ wunɔ.

⁶ Ngwe na fwɛʼ ebwa wɛ e me koʼro ngɛ. Engɔ wa ngo ndɛ̀ʼ enyii ebe abɔ byɛ e ma nyìi angɔn ngɛ.

⁷ Engɔ wa chi ediri akwa ndzɔn mbɔn abɔ byɛ e ma zɔ ǹgoʼ ngɛ mane akwa njɛɛ. Engɔ wa ngo fwɛʼ abwa zɔnɔ èndzobo chɛ Masakɛ bɔ Yeso Kristo ma nyɛn zeʼe ekere mane engere mɔ ngɛ.

⁸ Engere bɔnɔ ba ngo zeʼ nè angwa ewu wɛ me kɛɛrɛ angɔ ngɛ. Engɔ wa ge enyii ekwa abɔ byɛ e ma bɛ̀ʼrɛ̀ Ngwe, ne ma shi abwa yɛ ekɔn ǹchwɔ̀ ma ga mbɔʼ Masakɛ Yeso bɔ ngɛ bo.

⁹ E ba ngo nyìi angɔ ene enyii kengudu, è sɛ̀ʼrɛ̀ angɔ chi efàarà Masakɛ. Angɔ gɛrɛ yà ne nɛɛ aŋu enɛŋɛrɛkɛ ngɔ mwɔ ngɛ bo.

¹⁰ Èndzobo chɛ engɔ zeʼ efwɔ anji yɛ é nu eghɔ mɔ ebe bɔ mɔ mane abɔ byɛ e me le ebɛrɛ ene ngɔ ngɛ, mbɔn ba ngo mwɔ abwaʼ angɔ mbɔʼnga mbɔn shi le ebɛrɛ ene ekɔn ǹchwɔ̀ wɛ mbyɛɛ à sɛɛrɛ endɔn ngɛ.

¹¹ Ne ǹji yɛ mbyɛɛ ma bwò tsàʼrà Ngwe ato ndzɔn ngɛ. Mbyɛɛ na bii Ngwe njɛɛ kpe è le mbɔn ma tsɔmɔ ene aghɛʼ yɛ engɔ me zɔʼɔ angɔn é tsɔmɔ ngɛ. Enyɛrɛ zeʼe ene ekama ngɔ, è wa ngo le mbɔn le ela byɛ mbɔn ma ke é le é mwɔ bɔ ǹchwɔ̀ ngɛ. Engɔ wa ngo le mbɔn mɛɛrɛ efwɛʼ mbɔn nyɛn zeʼe ene ebɛrɛtaa yɛ mbɔn me le ngɛ.

¹² Ene aghɛʼ zɔnɔ, mbɔn ba ngo le Masakɛ bɔ Yeso le eghɔ, mbɔn gɛrɛ le eghɔ achim ngɔ nyɛ̀rɛ̀ zèʼe achim engɔ. Ngwe mane Masakɛ bɔ Yeso Kristo ya le abwa zɔnɔ gli.