Aanlyn Bybel

2 Kɔrɛn 1 - Aŋwɛʼrɛ Ebuumu Fe Nè Ngwe

¹ Aŋwɛʼrɛ zɔnɔ ne zeʼe ena Paalo. Ngwe à chi angu é mwɔ m̀pwɔnɔntɔm Yeso Kristo. Mmɛ na ŋwɛ̀ʼrɛ̀ aŋwɛʼrɛ zɔnɔ nè ghongwaanɔm bɔ achim Yeso Kristo, Timatyɛ. Mbyɛɛ na ŋwɛ̀ʼrɛ̀ ebe ashunu bɔ Ngwe efwɔ abɛ Kɔrɛn mane bɔ kristo gimkpaʼ efwɔ abɛɛ abɛ Akaya.

² Enarataa mane m̀bwarambwad nyɛ̀rɛ̀ zèʼe ebe Ngwe Àtɛ mane Masakɛ Yeso Kristo mwɔ nè mbɔn.

Paalo ndɛʼ ebɛrɛ ebe Ngwe

³ Ntsɔ ndɛʼ ebɛrɛ ebe Ngwe. Engɔ na àtɛ Masakɛ bɔ Yeso Kristo. Engɔ na àtɛ klasɔn, mwɔ Engwe yɛ ma bwaara etaa bɔ gimkpaʼ ngɛ.

⁴ Engɔ wa bwaara etaa bɔ ene ǹgoʼro gimkpaʼ, mbɔʼtye ntsɔ gɛrɛ me né bwaara ńtara abɔ tsɛrɛ byɛ e mwɔ efwɔ m̀pèrè ǹgoʼ gimkpaʼ ngɛ. Ntsɔ bwaara ńtara abɔ tsɛrɛ na Ngwe ma bwaara ńtara bɔ ngɛ.

⁵ Aŋu ntsɔ me zɔ ǹgoʼ ghɛʼ achim Yeso Kristo ngɛ, Ngwe gɛrɛ ya ngo bwaara ńtara bɔ ghɛʼ zeʼe achim Kristo.

⁶ Mala mbyɛɛ zɔ ǹgoʼ, mbyɛɛ ne le é bwaara ńtara ntsɔn, é kpèdè angɔn é nde etyê. Mala Ngwe bwaara ńtara nchɛɛ, è na le kpe mbyɛɛ bwaara ntsɔn ńtara. Engɔ gɛrɛ wa ngo ndɛ̀ʼ ekama endɔn é kii gɛrɛ klini etaa ene ǹgoʼ yɛ mbyɛɛ gɛrɛ ma kii ngɛ.

⁷ Mbyɛɛ be shi ńtara nchɛɛ gimkpaʼ ene mbɔn, kpe aŋu mbɔn ma zɔ ǹgoʼ aŋu mbyɛɛ ma zɔ nɔ, Ngwe gɛrɛ ya ngo bwaara ńtara ntsɔn na aŋu è ma bwaara ńtara nchɛɛ ngɛ.

⁸ Mbyɛɛ ba ke é le mbɔn bwɔngwa mbyɛɛ nɛɛ enyii yɛ mbyɛɛ me zɔ abɛɛ abɛ Esya ngɛ. Ǹgoʼ à nyíì angbɛɛ ghɛʼ, ewu kɛrɛ efàarà njɛɛ aŋu mbyɛɛ à mwɔ àkɔʼɔ ngɛ.

⁹ Éŋwaʼaŋwâʼ mbyɛɛ à ne nɛɛ efwɔ ńtara nchɛɛ kpe angɔ à shi tsɛrɛ kpe mbyɛɛ kudu. Bɛʼngɛ â gli énde kpe mbyɛɛ ke kɔʼɔ me egha njɛɛ bo. Ankɔmɔ ngɛ mbyɛɛ kɔʼɔ me egha Ngwe. Engɔ wɛ me le ekama é zhwɛɛmɛ bɔ ene ewu ngɛ.

¹⁰ Engɔ wɛ à pweere angbɛɛ eklo ewu ngɛ, wa fɔɔ embè é chi angbɛɛ. Ntsɔ shi ge ńtara bɔ ene engɔ kpe engɔ wa ngo ma chi abɔ akyɛ gimkpaʼ yɛ ntsɔ mwɔ efwɔ ǹgoʼ ngɛ.

¹¹ Ngwe ya ngo chi angbɛɛ efwɔ ǹgoʼ aŋu mbɔn ma tsàʼrà Ngwe eto mbyɛɛ ngɛ. Ngwe ya ngo ndɛ̀ʼ m̀bɔ̀nɔ ebe bɔ na aŋu bɔ akɛkɛ ma tsàʼrà Ngwe eto mbyɛɛ ngɛ. Ewunɔ wa ngo le bɔ akɛkɛ sa ghɔ engɔ mbɔʼnga engɔ shi pwèere abɔ.

Paalo giiri eghɛb mɔ

¹² Mbyɛɛ be nɛɛ efwɔ ńtara nchɛɛ kpe, ene aghɛʼ yɛ mbyɛɛ shi tsɔmɔ efwɔ ese zɔnɔ, ndanda nè mbɔn ngɛ, mbyɛɛ ne fwɛʼ ene éŋwaʼa mane ńtara pɛpɛ. Aghɛʼnji yɛ mbyɛɛ shi tsɔmɔ nè mbɔn ngɛ ye tee kpe ebwa wɛ mmɛ ma ga ngɛ ne éŋwaʼa. Mbyɛɛ ba fɛfi njɛɛ ene ebwa wunɔ. Ke mwɔ ene azɔm gho bo, bɛʼngɛ na ene enarataa Ngwe.

¹³ Mbyɛɛ ne ŋwɛʼrɛ endɔn me ebwa wɛ mbɔn me né zɔʼrɔ è nɛɛ ǹji ngɛ, mbyɛɛ be zhuŋu kpe mbɔn ba ngo nɛɛ ǹji ngɔɔ bwɛn anji ngùdu.

¹⁴ Aŋu mbɔn shi nɛɛ ǹji ene entirintiri ngɛ, mbɔn ba ngo nɛɛ ǹji ene abwa gimkpaʼ mbɔʼtye à shi anji yɛ Masakɛ bɔ Yeso ma zeʼe ngɛ, mbɔn ba ngo sa fɛfi ene mbyɛɛ nkirinkin aŋu mbyɛɛ gɛrɛ ma sa fɛfi ene mbɔn ngɛ.

¹⁵ Aŋu mmɛ à me nɛɛ éŋwaʼa kpe mbɔn ba nɛɛ ǹji ene abwa ngɛ, mmɛ à na ke aghɛʼ é zeʼe endɔn mbɔʼtye eghɛb ndza mwɔ ekpede endɔn ene eghɛʼ fyee.

¹⁶ Mmɛ à ne shi kpe mmɛ wa da gamma endɔn, fɔɔ ngɔɔ abɛɛ abɛ Masedonya, gɛrɛ ma wu ghɛɛbɛ zeʼe endɔn mbɔʼtye mbɔn kpede é sàa ngu abɛɛ abɛ Judeya.

¹⁷ Mbɔn ba ma di angɔn kpe ka ayɛ a le mmɛ kobo ebwa wɛ mmɛ à shi ngɛ ngà? Kà mbɔn ne zhuŋu kpe mmɛ na gho deʼ wɛ è ma fwɛʼ abwa yɛ è ne me kɛʼ bo ngɛ? Kà mmɛ ne mwɔ na bɔ efwɔ ese byɛ e ma ga Ɔ̧̀ɔɔ mane keʼ ene ebwa ŋwaʼ ngɛ?

¹⁸ Shi mmɛ ga éŋwaʼa endɔn kpe, Ngwe na fwɛʼ ebwa wɛ à shi shi ngɛ. Aŋu Ɔ̧̀ɔɔ Ngwe mwɔ Ɔ̧̀ɔɔ, keʼ Ngwe mwɔ keʼ ngɛ, Ɔ̧̀ɔɔ ngbɛɛ endɔn na Ɔ̧̀ɔɔ keʼ ngbɛɛ endɔn gɛrɛ mwɔ keʼ.

¹⁹ Mmɛ na ga énde mbɔʼnga Yeso Kristo ŋwɔ Ngwe wɛ mmɛ, Saylas mane Timatyɛ mbyɛɛ à ma sɛ̀ɛrɛ̀ ega ngɔ abwaʼ ndzɔn ngɛ, ke ma ga aga fyee, Ɔ̧̀ɔɔ mane keʼ ene ebwa ŋwaʼ bo.

²⁰ Abwa gimkpaʼ yɛ Ngwe shi ga kpe è wa fwɛʼ ebɛ abɔ byɛ e mwɔ nè kristo ngɛ, engɔ wa fwɛʼ ebe angɔ. Ne ǹji yɛ ntsɔ ma ga kpe, “Ekoʼro” nyɛ̀rɛ̀ zèʼe achim Kristo ngɛ. Ntsɔ na ga éngɛ é ndɛʼ eghɔ ebɛ Ngwe.

²¹ Na Ngwe mɔmbwo a me le angbɛɛ mane mbɔn é le ebɛrɛ ene Kristo. Ngwe mɔmbwo à zhwaʼa abɔ é mwɔ nè Kristo.

²² Aŋu engɔ à ge anɛ̂ mɔ ene ntsɔ é tee kpe ntsɔ na bɔ ngɔ ngɛ, è ge azhwɛɛrɛ mɔ efwɔ ńtara bɔ é tee kpe engɔ wa ndɛ̀ʼ ela byɛ engɔ à shi ga ebɛ bɔ ngɛ.

²³ Ngwe yɛ è me nɛɛ etaa mfu ngɛ na antsɛ ngu kpe mmɛ na ga éŋwaʼa kpe mmɛ à ke wu zeʼe a Kɔrɛn bo, mbɔʼnga mmɛ à ne me doʼo é ge enyii akwa ndzɔn bo.

²⁴ Ke me ga kpe mbyɛɛ ba tiri angɔn kpe mbɔn le ebɛrɛtaa bo, bɛʼngɛ mbyɛɛ be nɛɛ kpe mbɔn be twaʼra angɔn ene ebɛrɛtaa ndzɔn. Mbyɛɛ ba na fwɛʼ nè mbɔn ene ǹchwɔ̀ ndzɔn.

« Vorige

Volg ons:

Geborgde skakels

Advertensies