Aanlyn Bybel

1 Timoti 1 - Aŋwɛʼrɛ Ebuumu Fe Nè Ngwe

Paalo sàa atsaʼra ebe Timatyɛ

¹ Aŋwɛʼrɛ zɔnɔ ne zeʼe ebe Paalo, m̀pwɔnɔntɔm Yeso Kristo nyɛ̀rɛ̀ zeʼe ene etsɛrɛ Ngwe Àsaase bɔ mane Yeso Kristo wɛ ezhuŋu kɔʼɔ bɔ mwɔ nè engɔ ngɛ.

² Éngɛ Timatyɛ ŋwɔanɔm éŋwaʼa ngu ene ebɛrɛtaa ngɛ, Ngwe àtɛ mane Masakɛ Yeso Kristo bɔ ndɛʼ enarataa, eklasɔn mane m̀bwarambwad engɛ̂.

Paalo gbeʼre ato Timatyɛ mbɔʼ àtee abwa andɔɔ

³ Mmɛ we ke kpe ngwo tsɔmɔ efwɔ abɛ Efɛsɔs aŋu mmɛ à shi dye twàʼrà awɛ èndzobo chɛ mmɛ à me mwɔ anji ma ngɔ̀ɔ a Masedonya ngɛ. Bɔ deʼ ba angɛ ma tee abwa andɔɔ. Ngwo gɛrɛ ndɛʼ etsɛrɛ ebe angɔ shi e ne wu sɛ̀ɛrɛ̀ bo.

⁴ Ga ebe angɔ kpe angɔ waʼ nklamara andɔɔ mane èngwa dɔɔ alɔ ene akumu ètɛ sam yɛ à ma zeʼ tye nè efɛɛrɛ ngɛ. Angɔ de ke ma fwɛʼ afwɛʼ Ngwe ene aghɛʼ yɛ a me koʼro nyɛrɛ zeʼ ene ebɛrɛtaa ngɛ bo.

⁵ Enji yɛ mmɛ ma ga kpe ngwo fɔɔ embè é tee abwa yɛ a me koʼro ngɛ ebe bɔ ngɛ ne é le angɔ le edoʼ ene abɔ abê. Ngà tee edoʼ yɛ e me zeʼ efwɔ etaa fyɛ e me pɛ ngɛ ebe angɔ, etaa fyɛ e me nɛɛ ekobo ene abwa bɔɔbɔɔ mane abwa nchwɔnchwɔ ngɛ, mane etaa fyɛ e me nɛɛ ala yɛ ebɛrɛtaa éŋwaʼa mwɔ ngɛ.

⁶ Abɔ deʼ shi waʼa abwa zɔnɔ, éngɛ angɔ shi nyimi aghɛʼnji sa ga ma abwa atii.

⁷ Angɔ ba ke é mwɔ̀ bàtee atsɛrɛ Ngwe, bɛʼngɛ e de ke nɛɛ ǹji ene âmɔ̀ aga ngɛ bo, kà de nɛɛ ebwa deʼ ene abwa yɛ angɔ ma ga kpe mbɔɔ be le ebɛrɛ anyi anchwɔnchwɔ ngɛ bo.

⁸ Ntsɔ be nɛɛ kpe etsɛrɛ ye nara mala e me gli ene aghɛʼnji yɛ a me koʼro ngɛ.

⁹ Ntsɔ be nɛɛ kpe â ke me ndeere etsɛrɛ ebe abɔ byɛ e ma le abwa yɛ a me koʼro ngɛ bo, bɛʼngɛ â ne ndèerè ebe bàtsɔŋɔ atsɛrɛ mane àjii, ebe bɔ kenɛɛ Ngwe mane bɔ abwa bɔɔbɔɔ, ebe abɔ byɛ e ne me nɛɛ ebwa Ngwe bo kà angɔ byɛ e ne me le azhwɛɛrɛ Ngwe bo ngɛ, ebe angɔ byɛ e ma zhudu ètɛ mane éʼɔ̧̀ amɔ ngɛ, ebe àzhudu bɔ.

¹⁰ E ne ndeere etsɛrɛ ebe bɔ mfiri, ebe anɔm byɛ e ma bwɛnɛ nè anɔm tsɛrɛ kà aye byɛ e ma bwɛnɛ nè aye tsɛrɛ ngɛ, ebe angɔ byɛ e ma bèddè bɔ ene egeʼ ngɔ̀ɔ fɛ̀nnɛ na àdzob ngɛ, ebe angɔ byɛ e ma gà andɔɔ ma kanna abwa a ndɔ m̀pàrà ene andɔɔ ngɛ, mane angɔ byɛ e ma le abwa tsɛrɛ yɛ a ne me koʼro bo ngɛ.

¹¹ Etee abwa yɛngɛ ne koʼokoʼo nè ekɔn ǹchwɔ̀ wɛ â ndɛʼ ena é sɛ̀ɛrɛ̀ ngɛ. Ekɔn ǹchwɔ̀ zodo zodo wɛ e me zeʼe ebe Ngwe yɛ e ma ghɔ engɔ ngɛ.

Paalo ndɛ̀ʼ ebɛrɛ ebe Ngwe ene enarataa ngɔ

¹² Mmɛ ndɛʼ ebɛrɛ ebe Masakɛ bɔ Yeso Kristo, wɛ à shi ndɛʼ ekama ena ene afwɛʼ ndza ngɛ. Mmɛ è bɛ̀rɛ engɔ wɛ à kede angu kpe mmɛ we koʼro gɛrɛ chi angu é mwɔ gho afwɛʼ ngɔ ngɛ.

¹³ Ka mmɛ à de ma gà abwa bɔɔbɔɔ mbɔʼ ngɔ, ma nyii engɔ gɛrɛ ma ndwàʼ engɔ atorombèmbè. Bɛʼngɛ Ngwe à klasɔn ene mmɛ mbɔʼnga mmɛ à de ke shi le ebɛrɛtaa gɛrɛ ne nɛɛ ebwa wɛ mmɛ à ma le ngɛ bo.

¹⁴ Éngɛ Masakɛ bɔ à tee enarataa mɔ ekwa ngu ghɛʼ gɛrɛ ndɛʼ ebɛrɛtaa mane edoʼ ena wɛ e shi le mbyɛɛ mwɔ ene ebuumu nè Yeso Kristo ngɛ.

¹⁵ Ewunɔ ne ega éŋwaʼa wɛ ntsɔ me koʼro bɛrɛ anchwɔnchwɔ ngɛ kpe, Yeso Kristo à zeʼ efwɔ ese é pwèerè bɔ abwa bɔɔbɔɔ. Mmɛ shi me ǹgoʼ mmɛ fɔɔ angɔ bɔ gimkpaʼ.

¹⁶ Bɛʼngɛ Ngwe à klasɔn ene mmɛ le kpe eklinitaa Yeso Kristo ene mmɛ ke le ngudu bo, gho wɛ me ǹgoʼ fɔɔ bɔ abwa bɔɔbɔɔ gimkpaʼ ngɛ. Ewunɔ ne mwɔ anɛ̂ ebe bɔ gimkpaʼ byɛ e ma wu bɛrɛ ene engɔ gɛrɛ nde etyê kengudu ngɛ.

¹⁷ Eghɔ mane enɛŋɛrɛ kɛ mwɔ ebe engɔ yɛ mwɔ Ngwe chwɛ̀ʼ ngɛ. Engɔ na m̀fɔ̀ yɛ me tye ekyɛ ŋwaʼ ngɛ, wɛ è ne ma ku bo e gɛrɛ ne ma zɔ ngɔ bo ngɛ, efwɔ akyɛ kengudu, ekoʼro.

¹⁸ Timatyɛ ŋwɔ ngu, mmɛ ga engɛ̂ kpe, fwɛʼ abwa zɔnɔ yɛ a me koʼkoʼ nè aga yɛ bàmɛnɛkɔn Ngwe â ma ga atorombèmbè ngɛ. Ngà nu aga zɔnɔ shi a mwɔ me eku ebiri engɛ̂ é ngwè anchwɔnchwɔ.

¹⁹ Le ebɛrɛtaa njɛ ene Kristo me kama, ebwa deʼ wɛ ngwo ma fwɛʼ ngɛ, fwɛʼ ene etaasɔn fyɛ e me pɛ ngɛ. Abɔ deʼ â ke zo ebwa wɛ etaasɔn angɔ à ma gà kpe é fwɛʼ ngɛ bo, angɔ shi tsɔŋɔ ebɛrɛtaa amɔ.

²⁰ Hymeniyus mane Alɛkzanda â na abwaʼ abɔ byɛ mmɛ shi ge enyii ekwa angɔ nyɛrɛ zeʼ aŋu mmɛ à ge angɔ eblabwo asatan ngɛ. Ewunɔ wa ngo tee ebe angɔ kpe e ke wu sa gà ega Ngwe andɔɔ bo.

« Vorige

Volg ons:

Geborgde skakels

Advertensies