Aanlyn Bybel

1 Bɔ Tɛsalonika 1 - Aŋwɛʼrɛ Ebuumu Fe Nè Ngwe

Atsaʼra

¹ Aŋwɛʼrɛ zɔnɔ ne zeʼe ebe Paalo, Saylas mane Timatyɛ. Angɔ ne tɔmɔ aŋwɛʼrɛ zɔnɔ ebe bɔ ndɔngwe abɛ Tesalonika byɛ mwɔ bɔ Ngwe mane Masakɛ Yeso Kristo ngɛ. Ngwe ndɛʼ enarataa mane m̀bwarambwad endɔn.

Eleabwa mane ebɛrɛtaa bɔ Tesalonika

² Mbyɛɛ ba bɛ̀rɛ Ngwe mbɔʼ mbɔn bɔ gimkpaʼ akyɛ gimkpaʼ gɛrɛ ma tsàʼrà Ngwe ato ndzɔn akyɛ gimkpaʼ.

³ Éngɛ efàarà Ngwe àtɛ bɔ, mbyɛɛ ma zhuŋu aŋu mbɔn ma fwɛʼ ene ebɛrɛtaa ndzɔn mane aŋu edoʼ ndzɔn à le mbɔn fwɛʼ ene ekama ngɛ. Mbyɛɛ gɛrɛ zhuŋu aŋu ezhuŋu kɔʼɔ ndzɔn ene Masakɛ bɔ Yeso Kristo shi le mbɔn kam ngɛ.

⁴ Bwɔngwa mbyɛɛ, anɔm mane aye, mbyɛɛ be nɛɛ kpe Ngwe ye doʼo angɔn, gɛrɛ shi chi angɔn ene amɔ bɔ.

⁵ Éngɛ ngɛ mbyɛɛ à zeʼe nè ǹtɔm ǹchwɔ̀ yɛ endɔn, à ke mwɔ ene eklo chwɛ̀ʼ bo, bɛʼngɛ à ne ene ekama mane azhwɛɛrɛ Ngwe, gɛrɛ me bɛrɛ efwɔ ńtara nchɛɛ kpe ebwa wɛ mbyɛɛ ma sɛ̀ɛrɛ̀ ngɛ ne éŋwaʼa. Mbɔn be nɛɛ aŋu mbyɛɛ à mwɔ èndzobo chɛ mbyɛɛ à mwɔ nè mbɔn ngɛ. À ne ene ǹchwɔ̀ ndzɔn.

⁶ Mbɔn à kiri alozhin njɛɛ mane Masakɛ. Ka mbɔn à dye zɔ ǹgoʼ ghɛʼ ngɛ, mbɔn à nu ekɔn wɛ ene egɛnɛ yɛ e me zeʼe ebe azhwɛɛrɛ Ngwe ngɛ.

⁷ Éngɛ nɔ eleabwa ndzɔn a ne mwɔ na anɛ̂ abwaʼ bɔ Ngwe byɛ e mwɔ efwɔ ebɛɛ abɛ Masedonya mane Akaya ngɛ.

⁸ À ke tyetye kpe ekɔn mbɔʼ Masakɛ à sɛ̂ʼ efwɔ abɛ Masedonya mane Akaya bo, bɛʼngɛ ebɛrɛtaa ndzɔn ene Ngwe â kɛɛrɛ abɛ sɔ̀. Mbyɛɛ shi wu ga kpe ayɛ tsɛrɛ?

⁹ Bɔ gimkpaʼ na ga ma aŋu mbɔn à chɛdɛ angbɛɛ èndzobo chɛ mbyɛɛ à zeʼe angɛ ngɛ, gɛrɛ na aŋu mbɔn à kɔmɔ akuchim ndzɔn ndɛ̀ʼ ebe ngwere bli è kìrì Ngwe yɛ mwɔ Ngwe éŋwaʼa gɛrɛ mwɔ Ngwe kɔʼɔ ngɛ.

¹⁰ Â gɛrɛ ga mbɔʼ aŋu mbɔn ma kɔʼ ŋwɔ mɔ, Yeso Kristo wɛ à kla zeʼe ezob, engɔ wɛ Ngwe à zhwɛɛmɛ ene ewu gɛrɛ mwɔ engɔ wɛ e ma chi abɔ ene eboo Ngwe fyɛ e ma ngo zeʼe ngɛ.

« Vorige

Volg ons:

Geborgde skakels

Advertensies