Aanlyn Bybel

1 Kɔrɛn 1 - Aŋwɛʼrɛ Ebuumu Fe Nè Ngwe

Paalo gamma ebe bɔ efwɔ antiri abɛ Kɔrɛn

¹ Aŋwɛʼrɛ zɔnɔ ne zeʼe ena Paalo, wɛ Ngwe à chi angu ene eshi mɔ é mwɔ m̀pwɔnɔntɔm Yeso Kristo ngɛ. Mmɛ na ŋwɛ̀ʼrɛ̀ aŋwɛʼrɛ zɔnɔ nè ghongwaanɔm bɔ achim kristo Sostɛnɛs.

² Mmɛ na ŋwɛ̀ʼrɛ̀ ebe eshunu bɔ Ngwe, efwɔ abɔʼ abɛ Kɔrɛn, mbɔn byɛ Ngwe à shi zɔʼɔ angɔn é mwɔ bɔ ngɔ byɛ e me pɛ ngɛ. Engɔ à zɔʼ angɔn mbɔn shi ene ebuumu nè Yeso Kristo, nkirinkin aŋu engɔ à zɔʼ bɔ gimkpaʼ akwâ gimkpaʼ byɛ e ma ghɔ ekumu Masakɛ bɔ Yeso Kristo kpe na Masakɛ angɔ mane ebɔ ngɛ.

³ Mmɛ tsàʼrà Ngwe kpe, Ngwe Àtɛ bɔ mane Masakɛ Yeso Kristo, tee enarataa mɔ endɔn gɛrɛ ndɛ̀ʼ m̀bwarambwad endɔn.

Paalo ndɛʼ ebɛrɛ ebe Ngwe

⁴ Mmɛ wa ndɛʼ ebɛrɛ ebe Ngwe akyɛ gimkpaʼ mbɔʼ mbɔn, mbɔʼ enarataa yɛ engɔ shi tee endɔn zeʼe achim Yeso Kristo ngɛ.

⁵ Enyɛrɛ zeʼe ene ebuumu nè Kristo, Ngwe shi ndɛ̀ʼɛ ela nchwɔnchwɔ endɔn ene eghɛʼnji gimkpaʼ, é zhiiri, mbɔn me né gà anchwɔnchwɔ gɛ̀rɛ̀ le azɔm ene abwa gimkpaʼ

⁶ Ngwe ne le énde é bɛrɛ antsɛ kpe ebwa wɛ mmɛ à ga endɔn mbɔʼ Kristo ngɛ a shi le egha efwɔ ńtara ntsɔn.

⁷ Éngɛ mbɔn ke ma wu ke etɔ̧ɔrɔ azhwɛɛrɛ deʼ tsɛʼ bo, aŋu mbɔn ma kɔʼ é zɔ Masakɛ bɔ Yeso kristo kpe e wu zeʼe ngɛ.

⁸ Engɔ gɛrɛ wa ngo ndɛʼ ekama endɔn é le ebɛrɛtaa bwɛn anji ngùdu, mbɔʼtye mbɔn ne me le ebwa bɔɔbɔɔ deʼ akwa ndzɔn anji yɛ Masakɛ bo Yeso Kristo ma zeʼe ngɛ bo.

⁹ Ngwe yɛ è ma fwɛʼ ebwa wɛ è shi kɛʼɛ ngɛ, a shi zɔʼɔ angɔn é nu eklo ene ela ŋwɔ mɔ Yeso Kristo Masakɛ bɔ.

Egɛbɛ efwɔ ndɔngwe

¹⁰ Bwɔngwa, mmɛ na bùʼu ebwo endɔn bɔ gimkpaʼ, ene ekumu Masakɛ bɔ Yeso Kristo kpe, mbɔn tsɔmɔ ene ega ŋwaʼ, mbɔʼtye egɛbɛ deʼ me tsɛʼ abwaʼ ndzɔn bo, ankɔmɔ éngɛ mbɔn buumu mɛ̀ɛrɛ̀ tsɔmɔ ene ega ŋwaʼ mane ezhuŋu ŋwaʼ gɛ̀rɛ̀ kìrì ebwa ŋwaʼ.

¹¹ Bwɔngwa mbu, mmɛ na ga énde mbɔʼnga abɔ deʼ efwɔ ndɔ Chloe a shi tòʼro ena kpe àzhwɔ̀ ye abwaʼ ndzɔn.

¹² Ebwa wɛ mmɛ ma gà ngɛ ne ga kpe, abɔ deʼ abwaʼ ndzɔn na gà kpe, “Mmɛ na kìrì me etee abwa Paalo,” adeʼ kpe, “Mmɛ na kìrì me etee abwa Apolos,” adeʼ kpe, “Mmɛ na kìrì me etee abwa Petoro,” atsɛrɛ kpe, “Mmɛ na kìrì me etee abwa Kristo.”

¹³ Kristo we gɛ̀bbɛ ene ǹtìmìri? Â kɔmmɔ ma Paalo ene azɔd baʼra mbɔʼ mbɔn? Kà mbɔn à nu ndim ene ekumu Paalo?

¹⁴ Mmɛ wa bɛ̀rɛ Ngwe kpe mmɛ à ke ndɛʼ ndim ebe gho deʼ abwaʼ ndzɔn bo, à tye ma Krispos mane Geyɔs.

¹⁵ Éngɛ gho deʼ ke ga kpe mbɔn à nu ndim ene ekumu ngu bo.

¹⁶ Oh, mmɛ fwɔ dzɛd, mmɛ à gɛrɛ ndɛʼ ndim ebe Stɛfanas mane bɔ ekla ngɔ, me tsɛʼ éngɛ bo, mmɛ ke ndɛʼ ndim ebe gho tsɛrɛ bo.

¹⁷ Kristo à ke saa angu kpe mmɛ sa ndɛʼ ndim bo, bɛʼngɛ à saa angu é sɛ̀ɛrɛ̀ ekɔn ǹchwɔ̀, ne mwɔ ene aga yɛ a me zeʼe ene azɔm gho ngɛ bo. Mala mmɛ à ma sɛ̀ɛrɛ̀ ene azɔm gho, shi a ke zɔ ekama ene ewu Kristo ene azɔd baʼra bo.

Kristo ne ekama mane azɔm Ngwe

¹⁸ Abɔ byɛ Ngwe ma ngo tsɔŋɔ angɔ ngɛ ne bɛrɛ kpe, ekɔn mbɔʼ ewu Kristo edɔm azɔd baʼra ne ebwa bli. Bɛʼngɛ ntsɔ byɛ Ngwe ma pwèerè abɔ ngɛ be nɛɛ kpe ekɔn wunɔ ne ekama Ngwe.

¹⁹ E be ŋwɛʼrɛ efwɔ aŋwɛʼrɛ Ngwe kpe “Mmɛ wa ngo tsɔŋɔ azɔm bɔ azɔm, è le abɔ byɛ e ma zhuŋu kpe mbɔɔ be nɛɛ aŋwɛʼrɛ ngɛ, nɛɛ kpe mbɔɔ ke nɛɛ ebwa deʼ bo.”

²⁰ Mala e mwɔ engɛ̂, egho è me le azɔm ngɛ na awɛ? Engɔ wɛ ma tee atsɛrɛ Mose ngɛ na awɛ? Angɔ byɛ e ma fɛ̀ɛrɛ abwa azɔmazɔm efwɔ ese ngɛ ne ewɛ? Ngwe shi le ntsɔ nɛɛ kpe azɔm bɔ efwɔ ese zɔnɔ na atii.

²¹ Ngwe, ene azɔm mɔ, à le, e me kɔrɔ ebe bɔ é nɛ̀ɛ engɔ ene âmɔ̀ azɔm. Bɛʼngɛ Ngwe à nu ekɔn wɛ mbyɛɛ à ma sɛ̀ɛrɛ̀, bɔ ma gà kpe na atii ngɛ, è pwèerè abɔ byɛ e me bɛrɛ ene ekɔn wunɔ ngɛ.

²² Éngɛ bɔ Juu na ke zɔ ma abwa zodo zodo de shi bɛrɛ, ebɛbɔ ma ke àmɔ̀ ma azɔm gho.

²³ Bɛʼngɛ mbyɛɛ na sɛ̀ɛrɛ̀ tye mbɔʼ Ǹtɔmzhwaʼa, engɔ wɛ â kɔmmɔ azɔd baʼra, e shi me kɔrɔ ebe bɔ Juu é bɛrɛ, gɛ̀rɛ̀ mwɔ atii ebe ebɛbɔ.

²⁴ Bɛʼngɛ ebe abɔ byɛ Ngwe me zɔʼɔ angɔ ngɛ, bɔ Juu mane ebɛbɔ, Kristo ne ekama mane azɔm Ngwe.

²⁵ Ala yɛ bɔ ma kede kpe na atii Ngwe ngɛ, a ye fɔɔ azɔm bɔ. Ebwa wɛ bɔ ma zɔ e ma ke mwɔ na Ngwe me la nɔ, e we fɔɔ ekama bɔ.

²⁶ Bwɔngwa mbu, enjitsɔ, mbɔn zhuŋu m̀pèrè bɔ chɛ mbɔn à mwɔ èndzobo chɛ Ngwe à zɔʼ angɔn é mwɔ bɔ ngɔ ngɛ. Ene ezhuŋu gho, bɔ akɛkɛ abwaʼ ndzɔn â ke me le azɔm bo, bɔ akɛkɛ abwaʼ ndzɔn à ke me le ekama bo, kà mwɔ bɔ e me gli efwɔ ekla bɔ kɛ́ bo.

²⁷ Ngwe à chi ela byɛ ese à ma kede kpe ne ela atii ngɛ, é ndɛʼ eju ebe bɔ azɔm, gɛ̀rɛ̀ chi ela byɛ ese à ma kede kpe e be la ngɛ, é ndɛʼ eju ebe bɔ kamakam ngɛ.

²⁸ Ngwe à chi ela byɛ ese à ma tii, ma sèrè kpe ne elamfɔnyɛ ngɛ. Engɔ à le énde, é tsɔŋɔ abwa yɛ bɔ efwɔ ese ma bwaʼ kpe na abwa yɛ a me nara da dɛʼɛ ngɛ.

²⁹ Ngwe à le énde, é tee kpe gho deʼ ke né fɛfi mɔ efàarà ngɔ bo.

³⁰ Ngwe mɔmbwo shi le mbɔn buumu angɔn afwɔbi nè Kristo Yeso. Engɔ gɛrɛ shi le Kristo shi fuʼu eto bɔ. Ene ebuumu nè engɔ, ntsɔ shi tsɔmɔ ene aghɛʼ yɛ a me koʼro ngɛ nè Ngwe. Engɔ gɛrɛ shi le ntsɔ shi pɛ gɛrɛ mwɔ bɔ byɛ Ngwe me lɔɔ ato angɔ chi efwɔ abwa bɔɔbɔɔ ngɛ.

³¹ Éngɛ e be ŋwɛʼrɛ efwɔ aŋwɛʼrɛ Ngwe kpe, “Egho wɛ è ma fɛfi ngɛ, è fɛfi tye me ne ebwa wɛ Masakɛ me fwɛʼ ngɛ.”

« Vorige

Volg ons:

Geborgde skakels

Advertensies