Alom Ɛshɔwɔ nya long gɔ nwɛr Aluk 1 - Nnam

Nwɛr nyi Luk yɛlɛ jige Tiofilɔs

¹ Nshɔ Tiofilɔs; anɛ gbalɛgbalɛ garɛ rɛ bɔ yɛlɛ awɛr lagɛ nshɔl nyi milim gɔ ɛbgarɛ ɛblɔng.

² Bɔ yɛlɛ ji anɛ ba jɔlɔ nɔ gɔ ɛtɔmɔnab nyenɛ nɔ tɔng bɔ.

³ Ɔwɔ mɛ fufɔ mitɔb fɛdɛ nɔbɔnɔbɔ gɔ ɛjom ajingajingɛ ji bɔmɔ gɔ ɛtɔmɔnab. Rɛ mɛ tɔb yɛlɛ ajingajingɛ gɔ nji aji ka nshɔ Tiofilɔs.

⁴ Nɔngɔ ji alegbɛrɛ ɛlɔgɔlɔgɔ lagɛ ajingajingɛ ji bɔ ma teb.

Nlɔgɔ ɛbtom Ɛshɔwɔ tinge na bɔ jɛlɛ Jɔn nwongɔ anɛ alab

⁵ Gɔ ngarɛ Ntol a Ɛrɔd Judiya bɛlɛ njɔmanjɔm Ɛshɔwɔ nɔ bɔ jɔ lɔngɛ rɛ Sakariya, nɔ wɔbɔ ɛbshik gɛ bajɔmanjɔm Ɛshɔwɔ ba bɔ lɔngɔ bɔ lagɛ Abija, nkalɛwɛ bɔ jɔ lɔngɛ rɛ Ɛlisabɛt nɔ tɔb lɔngɔ ɛbange nab ji Ɛrɔn njɔmanjɔm Ɛshɔwɔ.

⁶ Bɔ anɛ abalabal bɛlɛ ɛtinge ɛbjini gɔ ɛshimar Ɛshɔwɔ, bɔ jɔ bomo njang anyinganyingɛ nyi Nshɔ fɛrɛ jɔ lim ji fomo nɔ.

⁷ Wɔ bɔ anɛ abalabal jɛlim teb Ɛlisabɛt jɔlɔ ngom, tɛtɛ bɔ kol.

⁸ Ɛfong abɔng Sakariya jɔ lime ɛbtomo ɛnɛ na njɔmanjɔm Ɛshɔwɔ teb ɛfongɔ bɔ bi jɔlɔ rɛ ɛblɔngɔ bɔ lim ɛbtom gɔ ji njɔm Ɛshɔwɔ,

⁹ Na ɛbjini ni bajɔmanjɔm tebe nɔ, bɔ jagɛ yɛ rɛ ajɔ yɛl gɔ atang ɛji njɔm Ɛshɔwɔ shɔng fii nshɔl nyi kpewɔgɔ nfam ka Ɛshɔwɔ.

¹⁰ Gɔ ngarɛ nyi ajɔ fii nshɔl nyi kpewɔgɔ nfam ka Ɛshɔwɔ, ɛblɔng anɛ yimi gɔ ɛlitak jɔ kag ɛrɔ.

¹¹ Ɔwɔ nlɔgɔ ɛbtom Ɛshɔwɔ a Nshɔ lɔngɔ biyimɛ, gɔ ɛjangɛ ɛbɔbnlom gɔ ɛji njɔm Ɛshɔwɔ ji bɔ kpejɔ fii nshɔl nyi kpewɔgɔ nfam.

¹² Ɔji Sakariya nyenɛ nɔ, ɛfalfal bɔbɛ anyar lamɛ.

¹³ Ɔwɔ nlɔgɔ ɛbtom Ɛshɔwɔ tɔngɛ rɛ: “Sakariya, Kǝfal, Ɛshɔwɔ ɛbwog ɛrɔ ɛba. Nkalɛwa Ɛlisabɛt kpejɛlɛ mɔnɔ nlom ka, ale kayɛ mbing rɛ Jɔn.

¹⁴ Akpe lime wan mbɛl ɛyɛbɛbtem gbalɛgbalɛ, anɛ gbalɛgbalɛ lebɛl yɛbɛbtem ɔji bɔ mɛjɛl,

¹⁵ teb akpe bɛlɛ ɛblobo gɔ ɛshimar Nshɔ. Anim tir wɔɔ amam anyinganyingɛ jɔlɔ akongho amam, ɛkɔ Ɛtinge ɛtɔgɔ kpejɔlɔ na nɛ bɔ kimawɛ jɛl.

¹⁶ Akpe kpede ntem anɛ ba Isɛrɛl gbalɛgbalɛ tu Nshɔ nɔ le Ɛshɔwɔ bɔ.

¹⁷ Yɛ kpe gbɔgɔmbang ka Nshɔ, gɔ ɛkɔ ji ɛtɔgɔ Ɛlayija, akpe kpede nteme ba ndɛ tu abɔn, fɛrɛ kpede nteme ba atɛntom tu anɛ ba ngbɛrɛ ba kpe ɛtinge ɛbjini, fɛrɛ tongo anɛ ba Ɛshɔwɔ bomɛ.”

¹⁸ Sakariya kim babɛ nlɔgɔ ɛbtom Ɛshɔwɔ rɛ, “Jɛn ji nle kɔ gbɛrɛ rɛ ɛlɔgɔlɔgɔ ji? Teb mɛ na nkalewamɛ ɛbkol.”

¹⁹ Nlɔgɔ ɛbtom Ɛshɔwɔ kim fangɛ rɛ, “Mɛ wɔ le Gɛbɛrɛl. Nyim gɔ mbing Ɛshɔwɔ, yɛ wɔ tomom tua rɛ mbobung na na, fɛrɛ tɔnga anɔba alom nyaa.

²⁰ Bɔmɔ anu shɔngɔ gɔ ɛshishɔng akpe gbɔgɔ ɛmum anim kpe mal bung ntɔng tɛtɛ ɛfong bi kpɛk kpɛ nshɔl nyaa lelem, teb atamim tu alom ɛnyiamɛ, nya lijini gɔ gɛya ngarɛ.”

²¹ Gɔ mɔngarɛ nɔ ɛblɔng anɛ ba yimi gɔ ɛlitak jɔ shek Sakariya, kime kagɛ bɔ ɛfigayɔ ji wangɛ amisha gɔ atang ɛji njɔm.

²² Ɔji alongo gɔ ɛlitak, ajɔm kpemal bung ntɔng na bɔ. Ɔwɔ linge bɔ rɛ anyɛn ɛjom ji lamɛ anyar gɔ atang ɛji njɔm Ɛshɔwɔ, teb ajɔ fɛr bungɔ na bɔ gɔ abɔ ajɔm kpɛmal bung ntɔng.

²³ Ɔji amalɛ na ɛbtom ɛnɛ gɔ ɛji njɔm Ɛshɔwɔ afɛrɛ nyi ɛtak.

²⁴ Na nshɔl nyiɔ shingɛ nɔ, Ɛlisabɛt ji nkal kim shagɛ ɛla sha gɔ njo gɔ nyang ɛlon. Arɛ,

²⁵ “Nshɔ ɛlim jiya kam. Amim teb ɛbkɔrɔ fɛrɛ yegim ndɔn gɔ ɛblɔng anɛ.”

Gɛbɛrɛl tinge ɛteb rɛ bɔ kpe jɛlɛ Jisɔs

²⁶ Gɔ nyang ɛragɛra ji Ɛlisabɛt jɔlɔ gɔ ɛla, Ɛshɔwɔ tomo nlɔgɔ ɛbtom a Gɛbɛrɛl tu gɔ Nasarɛt, ɛjabɛ ji le gɔ Galili,

²⁷ tu mgbamɛ nɔ bɔ jɔ lɔngɛ rɛ Mɛri nɔ Josɛf nɔ lɔngɔ ɛbange nab Defid migbɔ ɛkang nanɛ rɛ akpe kɔgɔ.

²⁸ Nlɔgɔ ɛbtom Ɛshɔwɔ shɔng kperɛ tɔngɛ rɛ, “Ma kag nyɔ, Ɛbfolo Ɛshɔwɔ jɔl nana! Nshɔ le nana.”

²⁹ Mɛri bɛlɛ ɛfigayɔ gbalɛgbalɛ gɔ alom nya nlɔgɔ ɛbtom Ɛshɔwɔ bungɔ nanɛ, fɛrɛ jɔ kɛrɛ lagɛ ɛkine nyɔ mi akagɛ nɔ.

³⁰ Ɔwɔ nlɔgɔ ɛbtom Ɛshɔwɔ tɔngɛ rɛ, “Mɛri, kǝfal, ɛbfolo Ɛshɔwɔ le nana.

³¹ Ale sha ɛla jɛl mɔn nɔ nlom, ale kayɛ mbing rɛ Jisɔs.

³² Ale bɛl ɛblobo, bɔ le jɔ lɔngɛ rɛ Mɔn Ɛshɔwɔ Nɔ Gbalɛ Shing. Nshɔ Ɛshɔwɔ kpɛ kagɛ ɛtol bi ndɛ ji Defid,

³³ Ale jɔl Ntol a ɛtitɔngɔ Jɛkɔb gɔ nkalkal; Ɛtol Ɛbɛ nim tir bɛl nkalshi.”

³⁴ Ɔwɔ Mɛri kim babɛ nlɔgɔ ɛbtom Ɛshɔwɔ rɛ, anu lijɔl rɛnan, “ɔji nkena shab nɛ?”

³⁵ Nlɔgɔ ɛbtom Ɛshɔwɔ kimawɛ fangɛ rɛ, “Ɛtinge ɛtɔgɔ kpa yɛlɛ, gɔ ɛkɔ ji Ɛshɔwɔ Nɔ Gbalɛ Shing. Ɔwɔ alijɛl ɛtinge Mɔn nɔ ale lɔngɛ rɛ Mɔn Ɛshɔwɔ.

³⁶ Ɛlisabɛt ji ɛkonoja kpetɔb jɛl mɔn tu ɔji amikol, nɔ anɛ mitɔng rɛ anim kpɛgɛ jɛl, a le gɔ ɛla nyang ɛragɛra.

³⁷ Teb ɛjom lim ji Ɛshɔwɔ lekemal lim.”

³⁸ Mɛri kimawɛ fangɛ rɛ, “Mɛ nlɔgɔ ɛbtom a Nshɔ wɔ. Nɔngɔ ɛjomajingajingɛ ji amobung lagim jɔl nɔ.” Ɔwɔ Nlɔgɔ ɛbtom Ɛshɔwɔ tamɛ sha.

Mɛri bɔngɔ Ɛlisabɛt

³⁹ Ɔji abɔn afong shingɛ nɔ Mɛri jɔ fɔmɔ shɔngɔ nyi ɛjabɛ Judiya ji le gɔ ɛwɔng.

⁴⁰ Ayɛlɛ gɔ ɛtakgɛ Sakariya shɔng kag Ɛlisabɛt nyɔ.

⁴¹ Ɔji Ɛlisabɛt wogo nyɔ Mɛri, mɔn gɔ nla yib, Ɛtinge ɛtɔgɔ bolɛ

⁴² Abung gbogbo rɛ, “Mɛri gɔ ɛblɔng abǝkal kpɛk kpɛ wɔ wɔ Ɛshɔwɔ ma ga folo, ɛbfolo jɔl ka mɔn nɔ akpe jɛlɛ.

⁴³ Jɛn ji wangɛ mbɛlɛ ɛnɔbɔ ɛshi na jiya, rɛ nyen Ɛshɔwɔ ɛbamɛ ba bǝ bɔngim?

⁴⁴ Na nwogo nyɔ ɛma, mɔn gɔ ala ɛyibɛ na ɛyɛbɛbtem.

⁴⁵ Ɛbfolo kpejɔlɔ ka yɛ nɔ tamɛ nɔ rɛ Nshɔ kpe lime ji atɔngɔ nɔ!”

Ɛshɛ ɛjijige Mɛri

⁴⁶ Mɛri rɛ: “Ɛbtem ɛnamɛ kpe jige Nshɔ;

⁴⁷ Ɛtɔgɔ ɛjamɛ kpe gɛrɛ teb Ɛshɔwɔ Ntitarɛ ɛwamɛ,

⁴⁸ Teb rɛ amim bomo na nlɔgɔ ɛbtom ɛwɛ. Bɔmɔ anu shɔngɔ anɛ kpɛk kpɛ lijɔ lɔngim rɛ ɛbfolo,

⁴⁹ Teb ajijɔgɔ nshɔl nya Ntol Ɛshɔwɔ milim kam. Mbing ɛnye le ɛtinge;

⁵⁰ Gɔ njini na njini Akpe bɛlɛ ndɔn ka anɛ ba kponɛ nɔ.

⁵¹ Atanɛ njijɔg ɛbɔ ɛbɛ Radɛ anɛ ba kpejɔ wɔr anyɔ na akɛkɛrɛ bɔ kpɛk kpɛ.

⁵² Arɛdɛ ajijɔg atol gɔ njia abɔ, Tab akibine warɛ.

⁵³ A ka anɛ ba njal atinge nshɔl, Kam afang anɛ tu gɔ na abɔ ɛnimɛnimɛ.

⁵⁴ Abom ɛlene ji akɔ na akuku ɛnyarɛ, Aba rɛ bitɔb abɔnɔnjo ɛbɛ Isɛrɛl.

⁵⁵ A bomo bɛl ndɔn ka Ɛbraham Na ɛtitɔngɔ ɛjɛ gɔ nkalkal!”

⁵⁶ Mɛri jɔlɔ gɔ ji Ɛlisabɛt gɔ jomo nyang ɛra kim fɛrɛ krɛ nyi ɛtak.

Na bɔ jɛlɛ Jɔn nwongɔ anɛ alab

⁵⁷ Ɔji ngarɛ ɛjɛl Ɛlisabɛt ringe nɔ, A jɛlɛ mɔn nɔ nlom.

⁵⁸ Na anɛ ba nkɔntak ɛnye na akono ɛnye wogo rɛ Nshɔ ɛmɛteb ɛbkɔrɔ gbalɛgbalɛ, bɔ anɛ kpɛk kpɛ bɛlɛ ɛyɛbɛbtem jɔ gɛrɛ na nɛ.

⁵⁹ Ɔji mɔn ringe nfong ɛnigeni nyi bɔ jɛlɛ nɔ, bɔ ba rɛ bɔ bǝkeme kimɛ ɛri, fɛrɛ jɔ shɛb rɛ bɔ kayɛ mbing a ndɛ nyi Sakariya,

⁶⁰ wɔ nyen ji Ɛlisabɛt kim bungɔ rɛ, “Ee! Mbing ɛnye nlelongɛ rɛ Jɔn.”

⁶¹ Bɔ kimawɛ tɔng rɛ, “Nɛ awɔngawɔngɔ gɔ nab ɛnya lim nɔ milene mbing nyiɔ.”

⁶² Bɔ jɔ garɛ gɔ abɔ teb ndɛ, babɛ mbing nyi likɔrɛ rɛ aka mɔn.

⁶³ Akim tɔngɔ rɛ bɔ kayɛ ɛjom yɛ yɛlɛ. Bɔ kimawɛ ka ɛkpagɛte akim yɛlɛ rɛ, “Mbing ɛnye Jɔn.” Lamɛ nɛ awɔngawɔngɔ anyar.

⁶⁴ Tutu ɔ, abɔm ntɔng abungɔ, jɔ jige Ɛshɔwɔ.

⁶⁵ Anɛ ba nkɔntak kpɛk kpɛ ɛfalfal bɔb bɔ, teb ɛka lagɛ nshɔl nyaa kpɛk kpɛ yalɛ gɔ ɛbjabɛ ɛwɔng Judiya.

⁶⁶ Nɛ awɔngawɔngɔ nɔ wogo nshɔl nyaa kime ɛkɛrɛ lagɛ, jɔ bab rɛ, “Ɛkine nɛ awɔ mɔn nɔa kpebagɛ jɔlɔ?” Teb kpe tebe rɛ ɛkɔ Ɛshɔwɔ le nanɛ.

Sakariya jige Ɛshɔwɔ

⁶⁷ Na ɛtinge ɛtɔgɔ yɛlɛ Sakariya ji ndɛ abɔmɔ ɛbungɔ alom Ɛshɔwɔ rɛ,

⁶⁸ “Ɛjijige jɔl ka Nshɔ, Ɛshɔwɔ Isɛrɛl, Teb aba rɛ abǝladɛ anɛ ɛbɛ fɛrɛ tarɛ bɔ yagɛ.

⁶⁹ Ɛshɔwɔ ɛbarɛ ɛka war njijɔg a ntitarɛ Nɔ lɔng ɛbange nab Defid nlɔgɔ ɛbtom ɛwɛ

⁷⁰ Na abungɔ nɔ gɔ nyɔ atinge ateb ɛnye nya manɛmanɛ,

⁷¹ Rɛ atarɛ war gɔ ji anɛbɛ ɛjang ɛbarɛ Na gɔ ɛbɔ anɛ ba ɛkpe ragɛ bɔ.

⁷² Ɛshɔwɔ rɛ akpe tebe ɛbnɔbɔ na akuku ɛnyarɛ, Afɛrɛ bomo ɛtinge ɛlene ɛjɛ ji akɔnɔ,

⁷³ Ɛlene ji akɔnɔ na nshɔjarɛ Ɛbraham:

⁷⁴ Rɛ atarɛ war gɔ abɔ anɛ ba ɛjang ɛbarɛ, nɔngɔ war mal kagɛ ɛkǝbɛl ɛfalfal

⁷⁵ Gɔ tingetinge na ɛbtem ating Na ɛbkpen ɛnarɛ kpɛk kpɛ.

⁷⁶ “Wɔ, mɔn ɛwamɛ, bɔ le lɔngɛ rɛ ntinge ateb ka Ɛshɔwɔ Nɔ Gbalɛ Shing; Akpe gbɔgɔ mbang ka Nshɔ Shɔng tongo Mbang bomɛ,

⁷⁷ Shɔng tɔng anɛ ɛbɛ rɛ bɔ Kpe bɛlɛ ɛbladɛ teb Ɛshɔwɔ kpe tamɛ ka bɔ gɔ abi afɛm,

⁷⁸ Teb Ɛshɔwɔ ɛbarɛ kpe nɔbɔ ɛbtem, Akpe lime njol afonfo nyi lɔng gɔ rɔ warɛ

⁷⁹ Nɔngɔ ya bolo war na anɛ ba le gɔ ɛjangɛ na ba kpe falɛ ɛbku, ababɛ war tu gɔ mbang ɛbkɔnɔ.”

⁸⁰ Jɔn gbalɛ, kongo gɔ ɛtɔgɔ. A jɔlɔ gɔ ɛwungwung tɛtɛ alɔng bitebe ɛnɛ ka anɛ ba Isɛrɛl.