JOHN 1 - KETHOLESI KESAO N.T. (BSI)

Jüo thüma meve kevori

¹ Süculü jüo tazo, Jüo Jihova züta, mu Jüo sü Jihova zo.

² Shüdülü Jihova zü tazo.

³ Mhametüko pütho thisü, mhathi kesüko püpo thikemo püridi.

⁴ Pülü kerhü ba, mu kerhü süo thüma keveo zo.

⁵ Keveo kezü vamve tayo, kezüno süo seyi mote.

⁶ Thümapü Jihova pü ketsüsü, püza John.

⁷ Thüma süo zhopola vori, Keveo zhopo kethila; size thüma metüko püyo melüyi ketola.

⁸ Püno Keveo mo, vele Keveo zhopo sü ketola ketsü kesüo.

⁹ Keve kethoo sü thüma metü vamve sü ketola vori.

¹⁰ Pü cejüo thisü mu cejülü vori, mu cejüo püsemo.

¹¹ Pütho pücejülü vorizori, püzhüko püse mota.

¹² Vele püzü keyikhü metü pü süko khipü Jihova nuneko thiyi keve keku kha tsüsü, püza melü keyiko metü.

¹³ Menu keyiko uzalü mozori, mori uthiupho medolü mozori, mori thüma medolü rimo vele Jihova medolü.

¹⁴ Jüo po uthi meve vori, pü udolü hü, hako püngo, zapozale Poo nu püyo ngokemezhe mu kethopo chupü.

¹⁵ John pü zhopo thi vori, se de poti, Hiohi püzo I poketao, Pü asa vori vele pü amhüjü tazo.

¹⁶ Püyo kekhrü chupü upo ngokemezhe kengo sari ngoyi.

¹⁷ Kekrelamori Moses thezho khapü utsü, vele ngokemezhe mu kejütho Jisu Khrista celü vori.

¹⁸ Mipüri Jihova sü ngomo. Süosü Nuo pümelülü kebaozo. Püpü mi mese kesüo.

John jülo kepüo zhopo

¹⁹ John zhopo kethi hiohi, thevoko mu Levimiko Jerusalem lü mi ketsüpü pü ketso, “No sopüa?”

²⁰ Pü ukoce potü süzo, pü mela mozo; vele phra sü, I Khrista mole.

²¹ Uko pü ketso ti, Süsa no sopü? No Elijah me? Pü poti I Elija mole. No saju kepo mime? Pü uko fü kela de, I süri mole.

²² Süsa uko püce poti, No sopü ta? Hako ketsü kesükoce jü püvo posü ketola. No sopüle zide poya?

²³ Pü po kesü, I füphrapü rayholü se ketao süle, Niepoo chode thi kemezi yite, side Isaiah popü meta tio.

²⁴ Uko ketsü kesüko sü Pharisee mikozo.

²⁵ Uko pü ketso de püce poti, Mhace no Khrista mo lize dipüla jülo khapü mi tsüya, Elijah ri mo mu Isaiah rimo mori saju kepomi rimo lize?

²⁶ John uko fü kela kesü, I jülü jülo khasüyo, vele mipü neko dolü tha neko pü semo.

²⁷ Pü süozo, pü asalü vori zü, pü amhüjü tazo; pü pheku kepharo ri I phrü shümo.

²⁸ Mha sükosü kethi Jordan khüco Bethany lü John jülo kha sü kebalü thisü.

Jihova Konuo

²⁹ Süsanha Jisu ta püce vori kezü ngo de John poti, Hihe, Jihova Konuo, Cejüo kephoma khi tata ketoo.

³⁰ Thüma hiohi I pü zhopo thi ketao süzo, Asaco vori kezüo amhüjü ketao, kekrelamori pü a mhüjü tazo tila.

³¹ I pü semo, vele püpü Israel miko mesesü, süla I jülo khapü mitsü tayo.

³² John zhopo kha kesü, I tülü Kemesa Rüpü kiri kezü mekhropü bi mu taki püyo ba yita.

³³ I pü semo, vele pü aketsüpü jülo kha mitsü, pü ace poti, No Kemesa Rüpü kiri kezü ngoto, de püyo ba yito, süosü Kemesa Rüpü lü jülo khapü mi tsüto.

³⁴ I süo ngo, süo zhopo khasüyo, hiohi Jihova Nuo zo.

Jisu saji kerathoko

³⁵ Süsanha John pü sajimi kena püzü tha kebace.

³⁶ Jisu chota keba peba, Pesüte, Jihova Konuo hi.

³⁷ Pü sajini mikena pü kepo sesü de Jisu sa meji ta.

³⁸ Jisu regüsü uni pe süri uni püsa meju kezü ngosü, de Jisu uni ketsoti, neni kedipü phuzü ze? Uni püce poti Rabbi (püco kemethao) No dipüce hü ba?

³⁹ Pü uni cepoti, Tavori pete. Uni tavo pü keba thethi pe de püzü bata sünhasü, süce keba mesü ketala.

⁴⁰ Uni mipü John kepo fü keseo sü Andrew, Simon Peter sazüo.

⁴¹ Pü jürao Simon ngoyi de püce poti, hani Messiah sü ngo yite, püco khrista-Greekmi jülü kenhü keyi kedeo.

⁴² Mu pü püjürao Simon züvo Jisu cesü. Jisu püpesü de poti, no Simon Jonah nu ncüpü Cephas püco ketsü thi tato.

Jisu Philip mu Nathanael ni cü keyi

⁴³ Süsanha Jisu ta Galilee lü ki keto lüta. Cholü Philip zü kesüyi de püce poti, Asa meji yite.

⁴⁴ Philip no Bethsaida lü kevorimi, Andrew mu Peter ni kehü nadelü.

⁴⁵ Philip no Nathanael ngoyi, de püce poti, Hako püngo yite Moses thezho lesilü mu saju kepoko thopü kemeta Jisu Nazareth mi, Joseph nu.

⁴⁶ Nathanael püce poti, Nazareth lü mhakeve hu voriyi veme? Philip püce po de Tavori pete.

⁴⁷ Jisu Nathanael püce vori kezü ngosü, de poti, Hihe, Israel mi kejo kedipü.

⁴⁸ Nathanael püce pode, kedi kethice no ase? Jisu püce poti, Philip nkecü mhüjü, no chüdü bo phelü kebace, I nngole.

⁴⁹ Nathanael püjü kelade poti, no Jihova Nu zole, Rabbi, no Israel mi Kedeo.

⁵⁰ Jisu püce pode, I chüdü bo phelü nngole si kesüla no melü teme? No süceri zhoku ti ngoto.

⁵¹ Püce posa kesü, I nce potü süto, no tüyo khri kesü ngoto hisa, tüyo choyi miko Nuo yo kho mu ki ketha ngoto.